ບານເຕະຊີງແຊ໊ມແມ່ຂອງຄັບ 2017 ຈະເປີດສາກຂຶ້ນຕົ້ນເດືອນທັນວານີ້.

ໃນວັນທີ 13 ພະຈິກ 2017 ທີ່ປະເທດໄທ ໄດ້ມີພິທີ ຖະແຫລງຂ່າວການແຂ່ງຂັນບານເຕະຊີງແຊ໊ມແມ່ຂອງ ຄລັບ 2017 ຈະມີຂຶ້ນວັນທີ 9 ທັນວາ ຫາ ວັນທີ 6 ມັງກອນ 2018 ນີ້ ໂດຍເປັນປະທານ ຂອງ ທ່ານ ຮາວ ກວກ ທຽນ ກຳມະການຜູ້ຈັດການໃຫຍ່ ບໍລິສັດ ໂຕໂຢ ຕ້າ ມໍເຕີ້ ເອເຊຍ ປາຊີຟິກ, ພ້ອມດ້ວຍຜູ້ຕາງໜ້າ ແຕ່ລະສະຫະພັນບານເຕະ ແຫ່ງຊາດ ຂອງບັນດາປະເທດ ໃນເຂດແມ່ນ້ຳຂອງ ແລະ ແຂກຖືກເຊີນເຂົ້າຮ່ວມ.
ຂະນະທີ່ສະຫະພັນບານ ເຕະແຫ່ງຊາດລາວ ໄດ້ສົ່ງ ຕົວແທນເຂົ້າຮ່ວມ ໂດຍທ່ານ ປະສາດໄຊ ພິລາພັນເດຊ ຮອງ ປະທານ ສະຫະພັນບານເຕະ ແຫ່ງຊາດລາວ ແລະ ທ່ານ ໄຊບັນດິດ ຣາຊະພົນ ເລຂາທິ ການ ສະຫະພັນບານເຕະແຫ່ງ ຊາດລາວ .
ການແຂ່ງຂັນເຕະບານ ຊີງແຊ໊ມແມ່ຂອງເລີ່ມຂຶ້ນແຕ່ ປີ 2014, ໂດຍຈຸດປະສົງຮ່ວມ ສ້າງກິດຈະກຳໃຫ້ແກ່ຊຸມຊົນ ທ້ອງຖິ່ນຂອງປະເທດໃນເຂດ ແມ່ນ້ຳຂອງດ້ວຍກິລາບານ ເຕະ, ໂດຍລາຍການດັ່ງກ່າວ ໄດ້ຈັດຂຶ້ນຄັ້ງທໍາອິດຢູ່ປະເທດຫວຽດນາມມີ 4 ປະເທດເຂົ້າ ຮ່ວມຄື: ລາວ, ກຳປູເຈຍ, ມຽນມາ ແລະ ຫວຽດນາມ ແຊ໊ມຕົກເປັນຂອງ ສະໂມ ສອນ ບີຄາເມັກ ບິງເດືອງ ຈາກປະເທດຫວຽດນາມ, ຕໍ່ ມາໃນປີ 2015 ທີມຈາກປະ ເທດໄທໄດ້ເຂົ້າຮ່ວມ ແລະ ສາມາດຍາດໄດ້ແຊ໊ມເປັນຄັ້ງທໍາອິດໂດຍສະໂມສອນ ບູຣິລໍາ ຢູໄນເຕັດ. ມາຮອດປີ 2016 ສະໂມສອນ ບູຣິລໍາ ຢູໄນເຕັດ ສາມາດໄດ້ແຊ໊ມອີກສະໄໝ ແລະ ສະໂມສອນ ລ້ານຊ້າງ ຢູ ໄນເຕັດ ຕົວແທນຈາກປະເທດ ລາວເປັນຮອງແຊ໊ມ.
ສຳລັບການແຂ່ງຂັນເຕະບານຊີງແຊ໊ມແມ່ຂອງ 2017 (TMCC) ປີນີ້ເປັນປີທີ 4 ເຊິ່ງຈະແຂ່ງຂັນ ໃນວັນທີ 9 ທັນວາ 2017 ຫາ ວັນທີ 6 ມັງກອນ 2018, ໂດຍມີຕົວ ແທນຈາກສະໂມສອນແຊ໊ມ ບານເຕະ 4 ປະເທດເຂົ້າຮ່ວມ ແຂ່ງຂັນຄື: ລາວພຣີເມຍລີກ ສະໂມສອນ ລາວໂຕໂຢຕ້າ, ເມັດໂຟນ ກຳປູເຈຍ ພຣີເມຍ ລີກ, ໂຕໂຢຕ້າລີກຄັບໄທ ແລະ ໂຕໂຢຕາວີລີກ 1 ຫວຽດ ນາມ.