ປະກາດແຕ່ງຕັ້ງ ທ່ານ ທອງເພັດ ຜຸຍຍະວົງ ເປັນປະທານສານປະຊາຊົນ ແຂວງຄຳມ່ວນ ຜູ້ໃໝ່

ວັນທີ 11 ຕຸລາ 2024, ສານປະຊາຊົນ ແຂວງຄຳມ່ວນ ໄດ້ປະກາດ ມອບ-ຮັບໜ້າທີ່ ປະທານສານປະຊາຊົນແຂວງຜູ້ໃໝ່, ມີ ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ເປັນປະທານເຂົ້າຮ່ວມ.

ໃນພິທີ, ຕາງໜ້າກົມຈັດຕັ້ງພະນັກງານ ສານປະຊາຊົນສູງສຸດ ໄດ້ຜ່ານມະຕິຂອງຄະນະປະຈຳສະພາແຫ່ງຊາດ ສະບັບເລກທີ 211 ແລະ 212/ຄປຈ ລົງວັນທີ 07 ຕຸລາ 2024 ວ່າດ້ວຍການຍົກຍ້າຍ ແລະ ການແຕ່ງຕັ້ງ ປະທານສານປະຊາຊົນທ້ອງຖິ່ນ ເຊິ່ງໄດ້ຕົກລົງຍົກຍ້າຍ ທ່ານ ພິມພອນ ສຸລິວົງສາ ປະທານສານປະຊາຊົນ ແຂວງຄຳມ່ວນ ຜູ້ເກົ່າ ໄປຢູ່ຄະນະກວດກາພັກແຂວງຄໍາມ່ວນ ແລະ ຕົກລົງແຕ່ງຕັ້ງ ທ່ານ ທອງເພັດ ຜຸຍຍະວົງ ຜູ້ພິພາກສາ ຊັ້ນສີ່ ສານປະຊາຊົນສູງສຸດ ເປັນປະທານສານປະຊາຊົນ ແຂວງຄຳມ່ວນ ຜູ້ໃໝ່.

ໂອກາດນີ້, ທ່ານ ປະທານສານປະຊາຊົນສູງສຸດ ໄດ້ເນັ້ນໃຫ້ຄະນະນຳສານປະຊາຊົນແຂວງ ເອົາໃຈໃສ່ຍົກສູງຄຸນທາດການເມືອງ, ຄຸນສົມບັດສິນທຳປະຕິວັດ, ມີຈັນຍາບັນ-ຈັນຍາທຳຕໍ່ວິຊາຊີບ, ເປັນເຈົ້າການປະຕິບັດຄໍາສັ່ງ, ຄໍາແນະນຳຂອງສານປະຊາຊົນສູງສຸດ ວາງອອກໃນແຕ່ລະໄລຍະ, ປະສານສົມທົບກັບທຸກຂະແໜງການທີ່ກ່ຽວຂ້ອງ ໃນການປະຕິບັດວຽກງານ, ເພີ່ມທະວີຄວາມສາມັກຄີຄວາມເປັນເອກະພາບ, ເດັດດ່ຽວປະຕິບັດໜ້າທີ່ຕາມລະບຽບກົດໝາຍຢ່າງເຂັ້ມງວດ, ສືບຕໍ່ປະຕິບັດໃນການແກ້ໄຂຄະດີຕ່າງໆໃຫ້ບັນລຸຕາມຄາດໝາຍ ໂດຍຕິດພັນກັບການປະຕິບັດ 2 ວາລະແຫ່ງຊາດ ແລະ ເພີ່ມທະວີການພົວພັນຮ່ວມມືກັບສາກົນ ພ້ອມທັງເອົາໃຈໃສ່ໃນວຽກງານກໍ່ສ້າງພັກ-ພະນັກງານ ໃຫ້ມີຄວາມໜັກແໜ້ນເຂັ້ມແຂງ.