ອິດສະລາແອນຖະຫລົ່ມເປົ້າໝາຍ 280 ກວ່າແຫ່ງຢູ່ກາຊາ-ລີບັງ ເພື່ອທໍາລາຍຜູ້ກໍ່ການຮ້າຍ
ກອງທັບອິດສະລາແອນໂຈມຕີເປົ້າໝາຍ 280 ກວ່າຈຸດ ຢູ່ເຂດກາຊາ ແລະ ລີບັງ ເພື່ອສັງຫານຜູ້ກໍ່ການຮ້າຍ ແລະ ທໍາລາຍໂຄງລ່າງພື້ນຖານທີ່ກ່ຽວຂ້ອງ.
ກອງທັບອິດສະລາແອນອອກຖະແຫລງການວ່າ: ກອງທັບປະຕິບັດການໂຈມຕີທາງອາກາດ ທໍາລາຍເປົ້າໝາຍຢູ່ເຂດກາຊາ ແລະ ລີບັງ ລວມກັນ 280 ກວ່າແຫ່ງ ໃນວັນທີ 12 ຕຸລາຜ່ານມາ ໂດຍເປົ້າໝາຍທີ່ຖືກທໍາລາຍລວມທັງສາງອາວຸດ, ສູນບັນຊາການ, ຖານທີ່ໝັ້ນ ແລະ ໂຄງລ່າງພື້ນຖານທີ່ກ່ຽວຂ້ອງກັບພາລະກິດກໍ່ການຮ້າຍ.
ລາຍງານລະບຸອີກວ່າ: ປະຕິບັດການຢູ່ເຂດຈາບາເລຍ ທາງພາກເໜືອຂອງເຂດກາຊາ ຂ້າຊີວິດສະມາຊິກຜູ້ກໍ່ການຮ້າຍຢ່າງໜ້ອຍ 20 ຄົນ ແລະ ນັບແຕ່ເລີ່ມປະຕິບັດການຮອບຫລ້າສຸດຢູ່ເຂດກາຊາ ເມື່ອມໍ່ໆມານີ້ ກອງທັບອິດສະລາແອນອ້າງການສັງຫານຜູ້ກໍ່ການຮ້າຍໄປແລ້ວ 200 ກວ່າຄົນ.
ສ່ວນຢູ່ລີບັງ, ກອງທັບອິດສະລາແອນຢືນຢັນການສັງຫານສະມາຊິກກຸ່ມແຮັດໂບລາເພີ່ມອີກຢ່າງໜ້ອຍ 50 ຄົນ ແລະ ໂຄງລ່າງພື້ນຖານກ່ຽວກັບກຸ່ມແຮັດໂບລາປະມານ 200 ແຫ່ງ ຖືກທໍາລາຍ.
ທັງນີ້, ສົງຄາມລະຫວ່າງອິດສະລາແອນກັບກຸ່ມຮາມັດຢູ່ເຂດກາຊາ ເຊິ່ງຍືດເຍື້ອມາແຕ່ວັນທີ 7 ຕຸລາປີຜ່ານມາ ຂ້າຊີວິດປະຊາຊົນຢູ່ເຂດກາຊາ 41,000 ກວ່າຄົນ. ຂະນະທີ່ປະຕິບັດການທາງທະຫານກັບກຸ່ມແຮັດໂບລາຢູ່ລີບັງ ເຊິ່ງອິດສະລາແອນຍົກລະດັບນັບແຕ່ວັນທີ 23 ກັນຍາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດ 1,300 ກວ່າຄົນ ແລະ ປະຊາຊົນ 1 ລ້ານກວ່າຄົນຕ້ອງອົບພະຍົບ.
