ຫວຽດນາມຕັ້ງເປົ້າປະຊາກອນ 99% ເຂົ້າເຖິງສັນຍານ 5G ພາຍໃນປີ 2030
ແຜນຍຸດທະສາດໂຄງລ່າງພື້ນຖານທາງດິຈີຕອນສະບັບໃໝ່ຂອງຫວຽດນາມ ລະບຸວ່າ: ການຄວບຄຸມຂອງເຄືອຂ່າຍສັນຍານ 5G ໃນປະເທດ ຕ້ອງຄວບຄຸມ 99% ຂອງປະຊາກອນ ພາຍໃນປີ 2030.
ເຄືອຂ່າຍສັນຍານ 5G ຂອງຫວຽດນາມຈະຄວບຄຸມທຸກເມືອງ, ທຸກແຂວງ, ເຂດເຕັກໂນໂລຊີຂັ້ນສູງ, ສູນວິໄຈ ແລະ ພັດທະນາ, ນິຄົມອຸດສາຫະກໍາ, ສະຖານີ, ທ່າເຮືອ ແລະ ສະໜາມບິນສາກົນທຸກແຫ່ງຂອງປະເທດພາຍໃນປີ 2025.
ຂະນະດຽວກັນ, ພົນລະເມືອງຊາວຫວຽດນາມທຸກຄົນຈະມີການເຊື່ອມຕໍ່ອິນເຕີເນັດແຫ່ງສັບພະສິ່ງ ຢ່າງໜ້ອຍ 1 ຈຸດ ພາຍໃນປີ 2025 ແລະ ຕົວເລກດັ່ງກ່າວຈະເພີ່ມຂຶ້ນເປັນ 4 ຈຸດ ພາຍໃນອີກ 5 ປີຕໍ່ໜ້າ.
ນອກຈາກນີ້, ລັດຖະບານຫວຽດນາມກໍານົດເປົ້າໝາຍການໃຊ້ລາຍເຊັນດິຈີຕອນໃນປະຊາກອນໄວຜູ້ໃຫຍ່ຂອງປະເທດໃຫ້ເພີ່ມຂຶ້ນຈາກຫລາຍກວ່າ 50% ເປັນຫລາຍກວ່າ 70% ລະຫວ່າງປີ 2025-2030.
ທັງນີ້, ຍຸດທະສາດໂຄງລ່າງພື້ນຖານທາງດິຈີຕອນສະບັບໃໝ່ຂອງຫວຽດນາມກໍານົດເປົ້າໝາຍມີສາຍເຄເບິນໃຍແກ້ວນໍາແສງໃຕ້ທະເລລະຫວ່າງປະເທດໃໝ່ຢ່າງໜ້ອຍ 2 ສາຍ, ສ້າງສູນຂໍ້ມູນປັນຍາປະດິດ (AI) ແລະ ພັດທະນາສູນຂໍ້ມູນໃໝ່ ຕາມມາດຕະຖານສີຂຽວລະດັບສາກົນ ພາຍໃນປີ 2025.
