ໝາກມັງກອນໝາກໄມ້ຊົງຄຸນຄ່າ ກິນຕອນໃດດີທີ່ສຸດ ?

     ໝາກມັງກອນ ມີປະໂຫຍດຕໍ່ສຸຂະພາບຫລວງຫລາຍ, ແຕ່ເຮົາຄວນຮັບປະທານຕອນໃດຈຶ່ງຈະໄດ້ປະໂຫຍດຈາກໝາກໄມ້ຊະນິດນີ້ດີທີ່ສຸດ ?

     ໝາກມັງກອນ ເປັນໝາກໄມ້ທີ່ມີປະໂຫຍດຕໍ່ສຸຂະພາບຫລວງຫລາຍເຊັ່ນ: ຫລຸດນໍ້າໜັກ, ປັບປຸງລະບົບຍ່ອຍອາຫານ, ເສີມສ້າງສຸຂະພາບຜິວ, ເສີມສ້າງກະດູກ, ຄວບຄຸມນໍ້າຕານໃນເລືອດ, ຫລຸດຄໍເລສເຕີຣໍ ແລະ ເສີມສ້າງພູມຕ້ານທານ.

     ໝາກມັງກອນມີໃຫ້ເລືອກຫລາຍປະເພດ ໄດ້ແກ່ ໝາກມັງກອນສີແດງ, ໝາກມັງກອນສີເຫລືອງ ແລະ ໝາກມັງກອນສີຂາວ ທີ່ມີສີ ແລະ ຊີ້ນສໍາຜັດຕ່າງກັນ.

ປະໂຫຍດຕໍ່ສຸຂະພາບຂອງການຮັບປະທານໝາກມັງກອນ

ຊ່ວຍຫລຸດນໍ້າໜັກ

     ໝາກມັງກອນມີປະລິມານແຄລໍຣີຕໍ່າ ແລະ ມີຄາຣໂບໄຮເດດໜ້ອຍ ຈຶ່ງຊ່ວຍຫລຸດນໍ້າໜັກໄດ້ຢ່າງມີປະສິດທິພາບ ບໍ່ພຽງເທົ່ານັ້ນ ໝາກມັງກອນຍັງອຸດົມໄປດ້ວຍເສັ້ນໃຍເພື່ອປ້ອງກັນການຮັບປະທານອາຫານຫລາຍເກີນໄປໃນລະຫວ່າງຄາບອາຫານ. ໝາກໄມ້ຊະນິດນີ້ຍັງມີສານທີ່ເອີ້ນວ່າ: ເບຕາໄຊຢານິນ ທີ່ຊ່ວຍຮັກສາລະດັບໄຂມັນ ແລະ ນໍ້າໜັກ ສານນີ້ຍັງຊ່ວຍຫລຸດຄວາມຕ້ານທານຕໍ່ອິນຊູລິນ ແລະ ຄວາມສ່ຽງຕໍ່ການເກີດໄຂມັນສະສົມໃນຕັບ.

ປົກປ້ອງເຊລ

      ໝາກມັງກອນມີລິດຕ້ານການອັກເສບ ແລະ ຕໍ່ຕ້ານອະນຸມິນອິດສະຫລະ ຊ່ວຍທໍາລາຍເຊລທີ່ອາດພັດທະນາໄປເປັນພະຍາດຊໍ້າເຮື້ອ, ມະເຮັງ ແລະ ພະຍາດຂໍ້ອັກເສບ. ໝາກໄມ້ຊະນິດນີ້ຍັງສົ່ງເສີມການສ້າງຄໍລາເຈນ, ປ້ອງກັນຮ່ອງຮອຍກ່ອນອາຍຸ ເນື່ອງຈາກມີວິຕາມິນຊີ.

ເສີມສ້າງສຸຂະພາບຜິວ

      ການຮັບປະທານໝາກມັງກອນເປັນປະຈໍາ ຈະຊ່ວຍເຮັດໃຫ້ຜິວເບິ່ງອ່ອນເຍົາ ເພາະອຸດົມໄປດ້ວຍວິຕາມິນ ເຊິ່ງຊ່ວຍສ້າງຄໍລາເຈນໃຫ້ຮ່າງກາຍ. ນອກຈາກນີ້ ຍັງຊ່ວຍຮັກສາຄວາມກະຊັບ ແລະ ຄວາມຢືດຢຸ່ນຂອງຜິວ ຈຶ່ງປ້ອງກັນຮ່ອງຮອຍໄດ້ເປັນຢ່າງດີ.

ປັບປຸງການຍ່ອຍອາຫານ

     ຈາກການວິໄຈ ໝາກມັງກອນຍັງເຮັດໜ້າທີ່ເປັນໂປຣໄບໂອຕິກ ເຊິ່ງໝາຍຄວາມວ່າປະລິມານເສັ້ນໃຍໃນໝາກໄມ້ບໍ່ໄດ້ຖືກຍ່ອຍຢ່າງສົມບູນ, ແຕ່ຖືກໝັກໂດຍການເພີ່ມແບດທີເຣຍໃນອາຫານໃນລໍາໄສ້ ຊ່ວຍໃຫ້ລະບົບຍ່ອຍອາຫານດີຂຶ້ນ.

ເສີມສ້າງກະດູກ

      ໝາກມັງກອນອຸດົມໄປດ້ວຍແຄລຊ້ຽມ, ແມກນີຊ້ຽມ ແລະ ຟອດຟໍຣັສ ເຊິ່ງມີບົດບາດສໍາຄັນໃນການເສີມສ້າງກະດູກ ແລະ ຟັນຂອງຮ່າງກາຍ. ດັ່ງນັ້ນ ໝາກມັງກອນຈຶ່ງເປັນທາງເລືອກທີ່ສົມບູນແບບ ສໍາລັບຜູ້ທີ່ມີປະຫວັດພະຍາດກະດູກພຣຸນ ໝາກໄມ້ຊະນິດນີ້ຍັງເປັນທາງເລືອກທີ່ດີສໍາລັບເດັກ ເພາະຊ່ວຍສົ່ງເສີມການຈະເລີນເຕີບໃຫຍ່ ແລະ ພັດທະນາລະບົບໂຄງກະດູກ.

ຄວບຄຸມລະດັບນໍ້າຕານໃນເລືອດ

      ໝາກມັງກອນ (ສ່ວນຫລາຍເປັນໝາກມັງກອນສີແດງ) ຊ່ວຍຫລຸດອາການດື້ຕໍ່ອິນຊູລິນ ເນື່ອງຈາກມີສານຕ້ານອະນຸມູນອິດສະຫລະ, ຊ່ວຍຄວບຄຸມລະດັບນໍ້າຕານໃນເລືອດ ແລະ ຍັງຊ່ວຍປ້ອງກັນບໍ່ໃຫ້ເປັນພະຍາດເບົາຫວານ.

ຫລຸດຄໍເລສເຕີຣໍ

      ການເພີ່ມໝາກມັງກອນໃນອາຫານເພື່ອສຸຂະພາບ ຈະຊ່ວຍຫລຸດຄໍເລສເຕີຣໍ ເຊິ່ງຊ່ວຍໃຫ້ປ້ອງກັນບໍ່ໃຫ້ເປັນພະຍາດຫົວໃຈ ແລະ ຫລອດເລືອດ ເນື່ອງຈາກປະລິມານເສັ້ນໃຍທີ່ສູງກວ່າໝາກໄມ້ຊະນິດອື່ນໆ ຈຶ່ງຊ່ວຍດູດຊັບຄໍເລສເຕີຣໍໃນລໍາໄສ້ນ້ອຍໄດ້ດີ.

ເສີມສ້າງພູມຕ້ານທານ

      ໝາກມັງກອນເປັນແຫລ່ງວິຕາມິນຊີ ແລະ ສານຕ້ານອະນຸມູນອິດສະຫລະ ຊ່ວຍເສີມສ້າງລະບົບພູມຕ້ານທານ ຈຶ່ງຊ່ວຍໃຫ້ຮ່າງກາຍຕໍ່ສູ້ພະຍາດຕ່າງໆເຊັ່ນ: ໄຂ້ເລືອດອອກ, ເຊື້ອລາ ໄດ້ເປັນຢ່າງດີ.

ເວລາໃດດີທີ່ສຸດທີ່ຄວນກິນໝາກມັງກອນ ?

     ຊ່ວງເຊົ້າຖືເປັນເວລາເໝາະສົມທີ່ສຸດໃນການຮັບປະທານໝາກມັງກອນ ເພາະລະບົບຍ່ອຍອາຫານຈະສະຫລາຍນໍ້າຕານໃນໝາກໄມ້ຢ່າງວ່ອງໄວ ແລະ ໃຫ້ສານອາຫານທີ່ຈໍາເປັນຄົບຖ້ວນ.