ໂບອິ້ງ 787 ພ້ອມຜູ້ໂດຍສານ 160 ກວ່າຊີວິດຕ້ອງປ່ຽນເສັ້ນທາງ ພາຍຫລັງໜ້າຈໍຄວບຄຸມດັບ
ເຮືອບິນໂດຍສານຂອງສາຍການບິນຢູໄນເຕັດ ແອຣລາຍ ຈໍາເປັນຕ້ອງປ່ຽນຈຸດໝາຍປາຍທາງຢ່າງກະທັນຫັນ ເນື່ອງຈາກພົບວ່າໜ້າຈໍຄວບຄຸມການບິນບໍ່ປາກົດພາບໃດໆ ເຮັດໃຫ້ບໍ່ສາມາດສັ່ງການເພື່ອບັງຄັບເຮືອບິນໄດ້.
ວັນທີ 10 ຕຸລາ 2024 ມີລາຍງານຂ່າວເຖິງກໍລະນີເຮືອບິນໂບອິ້ງ 787 ລຸ້ນດຣີມໄລເນີ ຂອງສາຍການບິນຢູໄນເຕັດ ແອຣລາຍ ຖ້ຽວບິນ 231 ຈາກລອດແອງເຈລິສ ຂອງອາເມລິກາ ມຸ້ງໜ້າສູ່ນະຄອນຫລວງລອນດອນ ຂອງອັງກິດ ຈໍາເປັນຕ້ອງປ່ຽນເສັ້ນທາງເພື່ອລົງຈອດຢູ່ສະໜາມບິນໃນເມືອງຊິຄາໂກແທນ ເນື່ອງຈາກປະສົບບັນຫາທາງເຕັກນິກຈົນນັກບິນບໍ່ສາມາດບັງຄັບເຮືອບິນຕໍ່ໄປໄດ້ ລະຫວ່າງບິນຢູ່ເໜືອນ່ານຟ້າປະເທດການາດາ.
ເຫດການດັ່ງກ່າວເກີດຂຶ້ນເມື່ອວັນທີ 26 ກັນຍາ 2024 ຖ້ຽວບິນດັ່ງກ່າວມີຜູ້ໂດຍສານ 165 ແລະ ຈຸບິນອີກ 11 ຄົນ.
ຕາມລາຍງານຂອງຄະນະກໍາມະການຄວາມປອດໄພການຂົນສົ່ງຂອງການາດາ (TSBC) ຂະນະເຮືອບິນລໍາດັ່ງກ່າວບິນຢູ່ເໜືອອ່າວຮັດສັນ ຈໍພາບສະແດງການຄວບຄຸມການບິນຫລັກຂອງກັບຕັນ ແລະ ຈໍພາບນໍາທາງເກີດດັບມືດ ບໍ່ປາກົດພາບ ຫລື ສັນຍາລັກໃດໆ.
ນອກຈາກນີ້, ຄອມພິວເຕີຄວບຄຸມການບິນທັງສອງໜ່ວຍຍັງເຂົ້າສູ່ໂໝດ Degraded ນໍາອີກ ເຊິ່ງໝາຍເຖິງສະຖານະທີ່ເຮືອບິນມີປະສິດທິພາບຫລຸດລົງ ແລະ ມີຂີດຄວາມສາມາດຈໍາກັດ.
ລາຍງານຂອງ TSBC ຊີ້ວ່າ: ສະຖານະການແບບນີ້ເທົ່າກັບເຮືອບິນລໍາດັ່ງກ່າວໄຮ້ລະບົບການນໍາລ່ອງ LNAV (Lateral Navigation) ເຊິ່ງເປັນລະບົບການບິນອັດຕະໂນມັດທີ່ເຮັດໃຫ້ເຮືອບິນບິນຕາມເສັ້ນທາງທີ່ຕັ້ງໂປຣແກຣມໄວ້.
ຈາກນັ້ນໄດ້ມີການປະກາດສະຖານະການສຸກເສີນ ແລະ ຕ້ອງປ່ຽນເສັ້ນທາງການບິນເພື່ອໄປລົງຈອດຢູ່ຊິຄາໂກແທນຈຸດໝາຍປາຍທາງເກົ່າ.
ລາຍງານລະບຸວ່າ: ທີມນັກບິນຍັງສາມາດໃຊ້ໂໝດບັງຄັບເຄື່ອງຕົ້ນຕໍໄດ້ ແລະ ສາມາດຕິດຕໍ່ກັບທີມພາກພື້ນດິນຜ່ານທາງຄື້ນວິທະຍຸ ແລະ ລະບົບດາວທຽມ.
ທັງທີ່ທີມນັກບິນປະສົບບັນຫາທາງເຕັກນິກກັບລະບົບຄອມພິວເຕີ ພວກເຂົາຍັງສາມາດໃຊ້ລະບົບນໍາລ່ອງ ແລະ ຄວບຄຸມແຮງຂັບເຄື່ອນສໍາຮອງ ເພື່ອລົງຈອດຢູ່ສະໜາມບິນນາໆຊາດໂອແຣໃນຊິກາໂກໄດ້ຢ່າງປອດໄພ.
ໂຄສົກຂອງຢູໄນເຕັດ ແອຣລາຍ ຢືນຢັນຜ່ານຖະແຫລງການວ່າ: ເຮືອບິນລໍາດັ່ງກ່າວຈໍາເປັນຕ້ອງປ່ຽນເສັ້ນທາງການບິນເພື່ອແກ້ໄຂສະຖານະການທີ່ມີທ່າອ່ຽງວ່າຈະເກີດຈາກບັນຫາທາງເຕັກໂນໂລຊີການບິນ. ນອກຈາກນີ້ ຍັງລະບຸວ່າ: ເຮືອບິນລົງຈອດຢ່າງປອດໄພຕາມປົກກະຕິ ແລະ ໄດ້ຈັດເຮືອບິນລໍາອື່ນເພື່ອໃຫ້ບໍລິການຜູ້ໂດຍສານໄດ້ເດີນທາງໄປຈຸດໝາຍປາຍທາງເກົ່າແລ້ວ.
ສ່ວນ TSBC ໄດ້ບັນທຶກລາຍງານເຫດການນີ້ວ່າເປັນເຫດການລະດັບ 5 ເຊິ່ງໝາຍຄວາມວ່າບໍ່ຈໍາເປັນຕ້ອງມີການສອບສວນເຫດການທີ່ເກີດຂຶ້ນຢ່າງຄວບຄຸມທຸກດ້ານ.
ໃນອາທິດຜ່ານມາ, ສາຍການບິນຢູໄນເຕັດ ແອຣລາຍ ຫາຈະຜ່ານພົ້ນການກວດສອບຄວາມປອດໄພໃນໄລຍະ 6 ເດືອນຈາກສໍານັກງານບໍລິຫານການບິນແຫ່ງອາເມລິກາ ໂດຍໜ່ວຍງານດັ່ງກ່າວລະບຸວ່າ: ບໍ່ພົບບັນຫາຮຸນແຮງດ້ານຄວາມປອດໄພເນື່ອງມາຈາກເຫດການສ່ຽງຫລາຍຄັ້ງກ່ຽວກັບການບິນໃນໄລຍະຕົ້ນປີ 2024 ລວມທັງກໍລະນີຢາງລໍ້ຫລຸດຈາກເຮືອບິນໂບອິ້ງ 777 ລະຫວ່າງຂຶ້ນບິນ.
