ທ່ານ ໄບເດນ ໂທລະສັບເຖິງທ່ານ ເນທັນຢາຮູ ຢືນຢັນສະໜັບສະໜູນອິດສະລາແອນ ປະນາມອີຣານໂຈມຕີ

      ທໍານຽມຂາວ ອາເມລິກາ ເຜີຍແຜ່ຖະແຫລງການລະບຸວ່າ: ທ່ານ ໂຈ ໄບເດນ ປະທານາທິບໍດີອາເມລິກາ ໄດ້ໂທລະສັບເຖິງທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ໃນວັນທີ 9 ຕຸລາ ໂດຍເປັນການເຈລະຈາກັນຄັ້ງທໍາອິດຂອງທັງສອງນັບແຕ່ເດືອນສິງຫາ ທ່າມກາງສະຖານະການການສູ້ຮົບຢູ່ເຂດກາຊາ ແລະ ລີບັງທະວີຄວາມຮຸນແຮງຂຶ້ນ.

      ການຫາລືລະຫວ່າງທັງສອງຜູ້ນໍາມີຂຶ້ນປະມານ 30 ນາທີ ໂດຍທໍານຽບຂາວເປີດເຜີຍວ່າ: ທ່ານ ນາງ ຄາມາລາ ແຮຣິສ ຮອງປະທານາທິບໍດີອາເມລິກາ ແລະ ຜູ້ສະໝັກຊີງຕໍາແໜ່ງປະທານາທິບໍດີອາເມລິກາ ຂອງພັກເດໂມແຄຣດ ໄດ້ຮ່ວມໃນການສົນທະນານໍາ.

     ຖະແຫລງການລະບຸວ່າ: ປະທານາທິບໍດີ ໄບເດນ ໄດ້ຢືນຢັນຄວາມມຸ້ງໝັ້ນຢ່າງແນ່ນອນຕໍ່ຄວາມໝັ້ນຄົງຂອງອິດສະລາແອນ, ພ້ອມປະນາມການກະທໍາຂອງອີຣານທີ່ຍິງລູກສອນໄຟໂຈມຕີອິດສະລາແອນໃນວັນທີ 1 ຕຸລາ.

     ຂະນະທີ່ທ່ານ ຄາຣີນ ມອງ ປີແອ ໂຄສົກທໍານຽບຂາວ ເປີດເຜີຍວ່າ: ການໂທລະສັບໂອ້ລົມເປັນໄປແບບກົງໄປກົງມາ ແລະ ສ້າງສັນ, ແຕ່ຍອມຮັບວ່າຍັງມີຄວາມເຫັນທີ່ບໍ່ກົງກັນໃນຫລາຍບັນຫາ.

     ການໂອ້ລົມລະຫວ່າງທ່ານ ໄບເດນ ແລະ ທ່ານ ເນທັນຢາຮູ ເກີດຂຶ້ນໃນຂະນະທີ່ອິດສະລາແອນກໍາລັງພິຈາລະນາການຕອບໂຕ້ການໂຈມຕີຂອງອີຣານ ໂດຍທ່ານ ໂຢອັບ ກັລລັນ ລັດຖະມົນຕີວ່າການກະຊວງປ້ອງກັນປະເທດອິດສະລາແອນ ໄດ້ເຜີຍແຜ່ວິດີໂອຢືນຢັນວ່າ: ການຕອບໂຕ້ຂອງອິດສະລາແອນຈະເປັນໄປຢ່າງຮຸນແຮງ, ແນ່ນອນ ແລະ ສ້າງຄວາມປະຫລາດໃຈ.

      ກ່ອນໜ້ານີ້, ທ່ານ ເນທັນຢາຮູ ໃຫ້ຄໍາໝັ້ນວ່າ: ອີຣານຈະຕ້ອງຊົດໃຊ້ສໍາລັບການຍິງລູກສອນໄຟໂຈມຕີອິດສະລາແອນ. ຂະນະທີ່ລັດຖະບານອີຣານເຕືອນວ່າ: ການຕອບໂຕ້ໃດໆກໍຕາມຂອງອິດສະລາແອນຈະຕ້ອງຜະເຊີນການທໍາລາຍລ້າງຄັ້ງໃຫຍ່ ເຊິ່ງສົ່ງຜົນເຮັດໃຫ້ເກີດຄວາມກັງວົນຕໍ່ການຂະຫຍາຍຕົວຂອງສົງຄາມສູ່ລະດັບພາກພື້ນ ແລະ ອາດດຶງໃຫ້ພັນທະມິດຕົ້ນຕໍຂອງອິດສະລາແອນ ຄືອາເມລິກາ ເຂົ້າມາມີສ່ວນຮ່ວມໃນສົງຄາມ.

ອ້າງອີງ:

• https://www.aljazeera.com/news/2024/10/9/biden-and-netanyahu-hold-productive-call-amid-middle-east-violence
• https://www.reuters.com/world/biden-netanyahu-speak-with-focus-israeli-plans-retaliation-against-iran-2024-10-09/