ໝໍພົບນ໋ອດໂລຫະຝັງຢູ່ຮູດັງຂອງເດັກອາຍຸ 7 ປີດົນເຖິງ 2 ປີ
ໝໍພົບສາເຫດທີ່ເດັກນ້ອຍເພດຊາຍຊາວຈີນໄດ້ກິ່ນເໝັນຕິດດັງມາເປັນເວລາ 2 ປີ ກໍຄືນ໋ອດໂລຫະທີ່ຝັງຢູ່ໃນຮູດັງເບື້ອງໜຶ່ງ.
ເດັກນ້ອຍເພດຊາຍນິລະນາມອາຍຸ 7 ປີ ຈາກເມືອງຈຽວຊົວ ມົນທົນເຫີໜານ ສປ ຈີນ ມັກຈົ່ມໃຫ້ພໍ່ແມ່ຟັງວ່າລາວໄດ້ກິ່ນເໝັນຕິດດັງຢ່າງໜ້ອຍ 2 ປີແລ້ວ, ແຕ່ພວກເຂົາຫາບໍ່ເຫັນວ່າມັນຄືກິ່ນຫຍັງ. ພໍ່ແມ່ຂອງເດັກບໍ່ເຄີຍໄດ້ກິ່ນນັ້ນ ແລະ ເດັກເອງກໍອະທິບາຍບໍ່ຖືກວ່າກິ່ນເໝັນດັ່ງກ່າວເປັນແນວໃດ, ພໍ່ແມ່ຂອງເດັກຈຶ່ງຄິດວ່າລູກຂອງພວກເຂົາຄິດໄປເອງ.
ເຖິງຢ່າງໃດກໍຕາມ, ບໍ່ເທົ່າໃດອາທິດຜ່ານມາ ເດັກເລີ່ມໄດ້ກິ່ນເໝັນເລື້ອຍໆ ພໍ່ແມ່ຂອງເດັກຈຶ່ງຕັດສິນໃຈພາລູກໄປຫາໝໍ.
ພາຍຫລັງໝໍກວດອາການແລ້ວພົບວັດຖຸແປກປອມສີດໍາໃນຮູດັງເບື້ອງຊ້າຍຂອງເດັກ ເຊິ່ງຕໍ່ມາໄດ້ຮູບຊີທີສະແກນກະໂຫລກຫົວຊ່ວຍຢືນຢັນໄດ້ວ່າມີສິ່ງແປກປອມຢູ່ແທ້.
ເນື່ອງຈາກໝໍບໍ່ສາມາດລະບຸໄດ້ວ່າວັດຖຸລຶບລັບໃນຮູດັງຂອງເດັກຄືຫຍັງ. ອີກທັງວັດຖຸອັນນີ້ຍັງຝັງຢູ່ເລິກເຂົ້າໄປໃນໂພງດັງ ເຮັດໃຫ້ໝໍກັງວົນວ່າຈະເກີດຄວາມເສຍຫາຍຮ້າຍແຮງໄດ້ຖ້າພະຍາຍາມຈະດຶງອອກມາ, ແຕ່ຈະປ່ອຍປະໄວ້ກໍບໍ່ໄດ້ ເບິ່ງຄືວ່າຈະມີໜອງຢູ່ອ້ອມໆ ຄາດວ່າເປັນຍ້ອນຕິດເຊື້ອ.
ພາຍຫລັງປຶກສາກັບພໍ່ແມ່ຂອງເດັກ, ໝໍຜູ້ຊ່ຽວຊານດ້ານຫູ, ຄໍ, ດັງ ຈຶ່ງຕັດສິນໃຈຜ່າຕັດໃຫ້ເດັກຊາຍ.
ລາຍງານລະບຸວ່າ: ທີມແພດໝໍຕ້ອງໃຊ້ອຸປະກອນຜ່າຕັດເຖິງ 3 ຊະນິດກວ່າຈະນໍາເອົາວັດຖຸແປກປອມສີດໍາອອກມາຈາກຮູດັງຂອງເດັກຊາຍໄດ້ ວັດຖຸຊິ້ນນີ້ມີເຍື່ອຫຸ້ມຫລາຍຊັ້ນເຊິ່ງເກີດຈາກການຄັດຫລັ່ງ ແລະ ໜອງທີ່ແຫ້ງເກາະຕິດ ແລະ ເຄືອບໄວ້ພາຍນອກ. ດັ່ງນັ້ນ ຈຶ່ງບໍ່ມີໃຜເບິ່ງອອກວ່າມັນຄືຫຍັງໃນຕອນທໍາອິດ ຈົນອະນາໄມຮຽບຮ້ອຍແລ້ວຈຶ່ງຮູ້ວ່າມັນຄືນ໋ອດໂລຫະຊິ້ນໜຶ່ງ.
ພາຍຫລັງຜ່າຕັດຮຽບຮ້ອຍແລ້ວ ເດັກຊາຍອາຍຸ 7 ປີກໍສາມາດຟື້ນຕົວໄດ້ຢ່າງສົມບູນ ແລະ ບໍ່ເຄີຍໄດ້ກິ່ນເໝັນຕິດດັງອີກ.
