ອິດສະລາແອນບໍ່ຕັດທາງເລືອກ ເລັ່ງເປົ້າໂຈມຕີໂຮງງານນິວເຄຼຍອີຣານ
ເຈົ້າໜ້າທີ່ລະດັບສູງຂອງກະຊວງການຕ່າງປະເທດອາເມລິກາໃຫ້ສໍາພາດພິເສດຕໍ່ສໍານັກຂ່າວ CNN ໃນວັນທີ 4 ຕຸລາວ່າ: ທາງການອິດສະລາແອນບໍ່ໄດ້ໃຫ້ຄໍາໝັ້ນຕໍ່ລັດຖະບານອາເມລິກາວ່າຈະຫລີກລ່ຽງການໂຈມຕີໂຮງງານນິວເຄຼຍຂອງອີຣານ ພາຍຫລັງເກີດກໍລະນີທີ່ອີຣານລະດົມຍິງລູກສອນໄຟຖະຫລົ່ມອິດສະລາແອນໃນຕົ້ນອາທິດຜ່ານມາ ຈົນອິດສະລາແອນປະກາດວ່າຈະຕອບໂຕ້.
ເຈົ້າໜ້າທີ່ອາເມລິກາຍັງກ່າວອີກວ່າ: ປັດຈຸບັນຕອບບໍ່ໄດ້ ແລະ ອິດສະລາຈະໃຊ້ວັນທີ 7 ຕຸລາ 2024 ເພື່ອໂຈມຕີຕອບໂຕ້ກັບ ຫລື ບໍ່ ເນື່ອງຈາກວັນດັ່ງກ່າວຄືວັນຄົບຮອບ 1 ປີທີ່ກຸ່ມຮາມັດບຸກໂຈມຕີອິດສະລາແອນຄັ້ງໃຫຍ່.
ນັກຂ່າວ CNN ສໍາພາດເຈົ້າໜ້າທີ່ລະດັບສູງຄົນດັ່ງກ່າວ ໂດຍຕັ້ງຄໍາຖາມວ່າ: ອິດສະລາແອນໃຫ້ຄໍາໝັ້ນຕໍ່ອາເມລິກາຫລືບໍ່ວ່າ ຈະບໍ່ມີການໂຈມຕີໂຮງງານນິວເຄຼຍຂອງອີຣານ ເຊິ່ງເຈົ້າໜ້າທີ່ຕອບກັບມາວ່າ: ພວກເຮົາຄາດຫວັງວ່າຈະໄດ້ເຫັນທັງການຕັດສິນໃຈທີ່ຮອບຄອບ ແລະ ຄວາມແຂງແກ່ນ, ແຕ່ຄືທີ່ຮູ້ກັນຢູ່ແລ້ວວ່າ ມັນບໍ່ມີການຮັບປະກັນໃດໆທັງໝົດ.
ໃນຕົ້ນອາທິດຜ່ານມາ, ອີຣານຍິງລູກສອນໄຟໂຈມຕີໃສ່ຫລາຍເມືອງຂອງອິດສະລາແອນ ເພື່ອລ້າງແຄ້ນໃຫ້ຜູ້ນໍາແຮັດໂບລາທີ່ຖືກອິດສະລາແອນສັງຫານ. ເຖິງຢ່າງໃດກໍຕາມ, ອິດສະລາແອນລາຍງານວ່າລູກສອນໄຟສ່ວນຫລາຍຖືກສະກັດໄວ້ ເຊິ່ງໃນເວລາຕໍ່ມາເຈົ້າໜ້າທີ່ຂອງອາເມລິກາບາງສ່ວນກໍສະແດງຈຸດຢືນສະໜັບສະໜູນໃຫ້ອິດສະລາແອນຕອບໂຕ້ກັບ, ແຕ່ຂະນະດຽວກັນ ບາງສ່ວນກໍສະແດງຄວາມກັງວົນວ່າການສູ້ຮົບທີ່ເກີດຂຶ້ນຈະເຮັດໃຫ້ຄວາມຂັດແຍ່ງໃນພາກພື້ນຕາເວັນອອກກາງລຸກລາມ.
ປະທານາທິບໍດີ ໂຈ ໄບເດນ ອອກມາກ່າວຊັດເຈນວ່າ: ອາເມລິກາບໍ່ສະໜັບສະໜູນໃຫ້ອິດສະລາແອນໂຈມຕີໂຄງການນິວເຄຼຍອຂອງອີຣານ.
ສໍາລັບຄໍາຖາມທີ່ວ່າ: ອິດສະລາແອນຈະໃຊ້ໂອກາດຄົບຮອບໃນວັນທີ 7 ຕຸລາ ໃນການຕອບໂຕ້ກັບ ຫລື ບໍ່ນັ້ນ, ເຈົ້າໜ້າທີ່ຂອງອາເມລິກາກ່າວວ່າ: ໃນທາງໜຶ່ງ ຂ້າພະເຈົ້າຄິດວ່າພວກເຂົາອາດຫລີກລ່ຽງບໍ່ໂຈມຕີໃນວັນທີ 7. ດັ່ງນັ້ນ ຕາມການຄາດຄະເນຂອງຂ້າພະເຈົ້າ ຖ້າຈະມີຫຍັງເກີດຂຶ້ນອາດຈະເກີດຂຶ້ນກ່ອນ ຫລື ຫລັງມື້ນັ້ນ.
ເຈົ້າໜ້າທີ່ຄົນນີ້ຍັງກ່າວອີກວ່າ: ໃນປີຜ່ານມາ, ອາເມລິກາພະຍາຍາມປ້ອງກັນບໍ່ໃຫ້ຄວາມຂັດແຍ່ງທີ່ເກີດຂຶ້ນລຸກລາມກາຍເປັນສົງຄາມໃຫຍ່, ແຕ່ປັດຈຸບັນທ່ານເບິ່ງວ່າສະຖານະການຢູ່ໃນໄລຍະວິກິດ.
ອ້າງອີງ:
