ເລຂາທິການສະຫະປະຊາຊາດປະນາມອີຣານ ຫລັງຖືກອິດສະລາແອນແບນ
ເລຂາທິການ UN ປະນາມອີຣານຈາກເຫດການຍິງລູກສອນໄຟໂຈມຕີອິດສະລາແອນ ການເຄື່ອນໄຫວທີ່ເກີດຂຶ້ນ ພາຍຫລັງຖືກລັດຖະບານເທລອາວີບປະກາດໃຫ້ເປັນບຸກຄົນບໍ່ເພິ່ງປາຖະໜາ.
ທ່ານ ອັນໂຕນິໂອ ກູເຕເຣສ ເລຂາທິການສະຫະປະຊາຊາດ (UN) ກ່າວຕໍ່ກອງປະຊຸມສະພາຄວາມໝັ້ນຄົງແຫ່ງສະຫະປະຊາຊາດ (UNSC) ວ່າ: ເຖິງເວລາຈະຕ້ອງຢຸດວົງຈອນຄວາມຮຸນແຮງນອງເລືອດໃນພາກພື້ນຕາເວັນອອກກາງ.
ຂະນະດຽວກັນ, ທ່ານ ກູເຕເຣສ ຢືນຢັນວ່າ: ໃນຖານະເລຂາທິການ UN ທ່ານປະນາມເຫດການທີ່ອີຣານຍິງລູກສອນໄຟໂຈມຕີອິດສະລາແອນ ໃນເດືອນເມສາຜ່ານມາ ແລະ ປະນາມລະດັບດຽວກັນຕໍ່ເຫດການທີ່ເກີດຂຶ້ນໃນວັນທີ 2 ຕຸລາຜ່ານມາ ໂດຍກ່າວແບບກົງໄປກົງມາວ່າ: ຂໍປະນາມຢ່າງໜັກຕໍ່ການທີ່ອີຣານຍິງລູກສອນໄຟຄັ້ງຫລ້າສຸດໃສ່ອິດສະລາແອນ.
ທັງນີ້, ທ່ານ ກູເຕເຣສ ກ່າວອີກວ່າ: ການຍິງລູກສອນໄຟທີ່ເກີດຂຶ້ນຂັດແຍ່ງຕໍ່ການສະແດງຈຸດຢືນສະໜັບສະໜູນຊາວປາແລັສຕິນ ແລະ ບໍ່ໄດ້ຊ່ວຍບັນເທົາຄວາມເຈັບປວດຂອງຊາວປາແລັສຕິນແຕ່ຢ່າງໃດ, ແຕ່ຍັງກ່າວອີກວ່າ: ປະຕິບັດການທາງທະຫານຢູ່ເຂດກາຊາ ເຊິ່ງຍືດເຍື້ອມາແຕ່ວັນທີ 7 ຕຸລາ 2023 ຖືເປັນການໂຈມຕີທາງທະຫານຄັ້ງຮຸນແຮງ ແລະ ຮ້າຍແຮງທີ່ສຸດ ນັບແຕ່ເຂົ້າມາດໍາລົງຕໍາແໜ່ງເລຂາທິການສະຫະປະຊາຊາດ ນັບແຕ່ປີ 2017.
ການເຄື່ອນໄຫວດັ່ງກ່າວຂອງເລຂາທິການ UN ເກີດຂຶ້ນບໍ່ດົນ ພາຍຫລັງທ່ານ ອິດສະລາແອນ ຄັດ ລັດຖະມົນຕີວ່າການກະຊວງການຕ່າງປະເທດອິດສະລາແອນ ກ່າວວ່າ: ປະກາດໃຫ້ທ່ານ ກູເຕເຣສ ມີສະຖານະເປັນບຸກຄົນບໍ່ເພິ່ງປາຖະໜາ.
ທັງນີ້, ລັດຖະບານອິດສະລາແອນໃຫ້ເຫດຜົນວ່າ: ບຸກຄົນທີ່ບໍ່ປະນາມຢ່າງເປັນທາງການຕໍ່ການທີ່ອີຣານໂຈມຕີອິດສະລາແອນດ້ວຍລູກສອນໄຟ ໃນວັນທີ 2 ຕຸລາຜ່ານມາ ບໍ່ສົມຄວນໄດ້ຮັບສິດໃຫ້ກ້າວຂຶ້ນມາຢືນຢູ່ແຜ່ນດິນຂອງອິດສະລາແອນອີກຕໍ່ໄປ ແລະ ປະນາມວ່າ: ທ່ານ ກູເຕເຣສ ເປັນເລຂາທິການທີ່ມີຈຸດຢືນຊັດເຈນວ່າຕໍ່ຕ້ານອິດສະລາແອນ ແລະ ສະໜັບສະໜູນກຸ່ມກໍ່ການຮ້າຍ.
ພາຍຫລັງອີຣານປະກາດສໍາເລັດການຍິງລູກສອນໄຟປະມານ 200 ລູກໃສ່ອິດສະລາແອນ, UN ອອກຖະແຫລງການປະນາມຄວາມຂັດແຍ່ງຢູ່ຕາເວັນອອກກາງທີ່ລຸກລາມຂະຫຍາຍວົງກວ້າງ ແລະ ຄວາມຮຸນແຮງທີ່ທະວີຄູນໃນພາກພື້ນແຫ່ງນີ້.
