ລີບັງຢືນຢັນອິດສະລາແອນສົ່ງທະຫານຂ້າມແດນ ປະທະເດືອດກັບກຸ່ມແຮັດໂບລາ

      ທະຫານອິດສະລາແອນຂ້າມແດນໄປລີບັງ ເພື່ອປະຕິບັດການກັບກຸ່ມແຮັດໂບລາ. ເຖິງຢ່າງໃດກໍຕາມ, ກອງທັບອິດສະລາແອນຢືນຢັນ ທະຫານເສຍຊີວິດແລ້ວ 8 ຄົນ.

      ກອງທັບລີບັງອອກຖະແຫລງການວ່າ: ທະຫານອິດສະລາແອນຈໍານວນໜຶ່ງຂ້າມແດນເສັ້ນສີຟ້າ ເຊິ່ງເປັນເສັ້ນແບ່ງຊາຍແດນລະຫວ່າງລີບັງກັບອິດສະລາແອນເຂົ້າມາປະມານ 400 ແມັດ ໃນວັນທີ 25 ກັນຍາຜ່ານມາ ແລ້ວໃຊ້ເວລາຢູ່ພາຍໃນເຂດແດນຂອງລີບັງໄລຍະໜຶ່ງກ່ອນພາກັນກັບອອກໄປ.

      ກຸ່ມແຮັດໂບລາອອກຖະແຫລງການພຽງວ່າ: ມີການຕໍ່ສູ້ກັບທະຫານອິດສະລາແອນຈໍານວນໜຶ່ງ ເຊິ່ງແຊກຊຶມເຂົ້າມາທາງພາກໃຕ້ຂອງລີບັງ.

      ຖະແຫລງການຂອງກອງທັບອິດສະລາແອນ ເປີດເຜີຍຈໍານວນທະຫານທີ່ເສຍຊີວິດລະຫວ່າງປະຕິບັດການຂ້າມແດນຢູ່ລີບັງ ເພີ່ມເປັນຢ່າງໜ້ອຍ 8 ຄົນ ແລະ ໂຈມຕີທາງອາກາດຮອບໃໝ່ ເພື່ອທໍາລາຍເປົ້າໝາຍເຊື່ອມໂຍງກັບຖານທີ່ໝັ້ນຂອງກຸ່ມແຮັດໂບລາຢູ່ລີບັງ ເຊິ່ງລັດຖະບານເບຣຸດລາຍງານວ່າ: ມີຜູ້ເສຍຊີວິດເພີ່ມອີກຢ່າງໜ້ອຍ 46 ຄົນ ແລະ ໄດ້ຮັບບາດເຈັບອີກ 85 ຄົນ.

      ທັງນີ້, ອິດສະລາແອນ ແລະ ກຸ່ມແຮັດໂບລາໂຈມຕີຂ້າມແດນກັນບໍ່ເວັ້ນແຕ່ລະວັນ ນັບແຕ່ສົງຄາມຢູ່ເຂດກາຊາເລີ່ມຂຶ້ນ ໃນວັນທີ 7 ຕຸລາ 2023 ໂດຍຮອດປັດຈຸບັນ ມີຜູ້ເສຍຊີວິດຈາກການໂຈມຕີດັ່ງກ່າວແລ້ວ 1,205 ຄົນ ສ່ວນຫລາຍເປັນພົນລະເຮືອນ ແລະ ຈໍານວນຜູ້ເສຍຊີວິດເພີ່ມຂຶ້ນຫລາຍ ນັບແຕ່ອິດສະລາແອນຍົກລະດັບການໂຈມຕີກຸ່ມແຮັດໂບລາ ໃນເດືອນກັນຍາຜ່ານມາ.