11 ປະເທດ TPP ຕົກລົງເດີນໜ້າຕໍ່ໂດຍບໍ່ມີອາເມລິກາ
ລັດຖະມົນຕີການຄ້າຈາກ 11 ປະເທດໃນພາກພື້ນອາຊີ-ປາຊີຟິກຕົກລົງເຫັນພ້ອມກັນໃນວັນທີ 11 ພະຈິກນີ້ວ່າ: ໃຫ້ເດີນໜ້າຕໍ່ໄປໃນການເຮັດຂໍ້ຕົກລົງການຄ້າຂະໜາດໃຫຍ່ ໂດຍບໍ່ມີອາເມລິກາ ປະເທດທີ່ມີເສດຖະກິດຂະໜາດໃຫຍ່ທີ່ສຸດໃນໂລກ ເຊິ່ງເນັ້ນນະໂຍບາຍອາເມລິກາຕ້ອງມາກ່ອນໃນຍຸກປະທານາທິບໍດີ ໂດນັນ ທຣຳ.
ກ່ອນໜ້ານີ້ ປະທານາທິບໍດີ ທຣຳ ນຳອາເມລິກາຖອນຕົວຈາກຂໍ້ຕົກລົງຫຸ້ນສ່ວນຂ້າມປາຊີຟິກ (TPP) ໃນຕົ້ນປີນີ້ ເຮັດໃຫ້ປະເທດພັນທະມິດຜິດຫວັງ ແລະ ບໍ່ໝັ້ນໃຈວ່າຈະເດີນໜ້າຕາມຂໍ້ຕົກລົງຕໍ່ໄປໄດ້ ຫລື ບໍ່ຕາມສັນຍາທີ່ຈະຫລຸດອັດຕາພາສີອາກອນບັນຫາສິ່ງແວດລ້ອມ ແລະ ແຮງງານ. ທ່ານ ທຣຳ ກ່າວຢືນຢັນຢ່າງໜັກແໜ້ນໃນກອງປະຊຸມສຸດຍອດອາເປກ ຢູ່ນະຄອນດານັງ ສສ ຫວຽດນາມ ວ່າ: ອາເມລິກາຈະຍຶດຫລັກປົກປ້ອງຜົນປະໂຫຍດຂອງປະເທດກ່ອນ ເຮັດໃຫ້ຫລາຍຝ່າຍກັງວົນວ່າຈະເກີດນະໂຍບາຍກີດກັນທາງການຄ້າ. ຂະນະທີ່ຜູ້ນຳປະເທດອື່ນໆໃນກອງປະຊຸມ ລວມທັງປະທານປະເທດ ສີ ຈິ້ນຜິງ ຂອງຈີນ ຖະແຫລງເນັ້ນສົ່ງເສີມການຄ້າເສລີ ແລະ ຂໍ້ຕົກລົງການຄ້າພະຫຸພາຄີ. ຖະແຫລງການຮ່ວມຈາກກອງປະຊຸມຂອງກຸ່ມປະເທດທີ່ເຫລືອຢູ່ໃນຂໍ້ຕົກລົງທີ່ເອີ້ນວ່າ: TPP-11 ລະບຸວ່າ: ໄດ້ມີຄວາມເຫັນພ້ອມຕາມຫລັກການພື້ນຖານຂອງຂໍ້ຕົກລົງຮ່ວມກັນລະຫວ່າງການຫາລືນອກຮອບກອງປະຊຸມກຸ່ມການຮ່ວມມືທາງເສດຖະກິດໃນພາກພື້ນອາຊີ-ປາຊີຟິກ (ອາເປກ) ຢູ່ດານັງ, ພາຍຫລັງຫລາຍຝ່າຍຢ້ານວ່າຂໍ້ຕົກລົງ TPP ອາດຫລົ້ມ ເພາະບໍ່ມີອາເມລິກາເປັນຜູ້ນຳ. ຄະນະລັດຖະມົນຕີໃນຂໍ້ຕົກລົງ TPP ຖະແຫລງວ່າ: ຈຳເປັນຕ້ອງມີການຫາລືກັນຕໍ່ໄປ ເພື່ອໃຫ້ສອດຄ່ອງກັບຄວາມຕ້ອງການຂອງທຸກຝ່າຍກ່ອນລົງນາມໃນຂໍ້ຕົກລົງຮ່ວມກັນ.
