ຫວຽດນາມ-ອາເມລິກາ ລົງນາມຂໍ້ຕົກລົງ ການຄ້າຊຸດໃຫຍ່ໄລຍະທ່ານ ທຣຳ ຢ້ຽມຢາມ
ຫວຽດນາມ ແລະ ອາເມລິກາ ລົງນາມຂໍ້ຕົກລົງການຄ້າດ້ານພະລັງງານ ແລະ ການບິນໃນໄລຍະທີ່ປະທານາທິບໍດີ ໂດນັນ ທຣຳ ໄປຮ່ວມກອງປະຊຸມສຸດຍອດກຸ່ມການຮ່ວມມືທາງເສດຖະກິດໃນພາກພື້ນອາຊີ-ປາຊີຟິກ (ອາເປກ) ຢູ່ນະຄອນດານັງ ສສ ຫວຽດນາມ.
ການລົງນາມມີຂຶ້ນໃນວັນທີ 12 ພະຈິກນີ້ ຫລັງກອງປະຊຸມສຸດຍອດອາເປກສິ້ນສຸດລົງໃນວັນທີ 11 ພະຈິກ. ປະທານເຈົ້າໜ້າທີ່ບໍລິຫານສາຍການບິນຫວຽດນາມແອລາຍຖະແຫລງຫລັງລົງນາມຂໍ້ຕົກລົງມູນຄ່າ 1.500 ລ້ານໂດລາສະຫະລັດ ຊື້ເຄື່ອງຈັກ ແລະ ບໍລິການດ້ານການສະໜັບສະໜູນປະຕິບັດການຈາກແພຣແອນວິດນີຂອງອາເມລິກາວ່າ: ຂໍ້ຕົກລົງນີ້ຈະຊ່ວຍເພີ່ມການເປັນຫຸ້ນສ່ວນທາງເສດຖະກິດ, ການຄ້າ ແລະ ການລົງທຶນຂອງສອງປະເທດ. ຂະນະທີ່ບໍລິສັດພັດທະນາທໍ່ແກັສອະແລສກາ ແລະ ບໍລິສັດເອອີເອສຂອງອາເມລິກາກໍລົງນາມຂໍ້ຕົກລົງກັບບໍລິສັດຫວຽດນາມເຊັ່ນກັນ, ແຕ່ບໍ່ມີການເປີດເຜີຍໃນລາຍລະອຽດ.
ປະທານາທິບໍດີ ທຣຳ ກ່າວຂະນະພົບກັບນາຍົກລັດຖະມົນຕີ ຫງວຽນ ຊວນຟຸກ ຂອງຫວຽດນາມ ໃນວັນທີ 12 ພະຈິກວ່າ: ອາເມລິກາຂາດດຸນການຄ້າໃຫ້ຫວຽດນາມສູງເຖິງ 32.000 ລ້ານໂດລາສະຫະລັດ ໃນປີກ່ອນ ຈຳເປັນຕ້ອງຫາທາງແກ້ໄຂ ບໍ່ສາມາດປ່ອຍໃຫ້ການຄ້າບໍ່ສົມດຸນແບບນີ້ໄດ້ອີກຕໍ່ໄປ ເພາະລັດຖະບານຕ້ອງເບິ່ງແຍງບໍລິສັດອາເມລິກາ ແລະ ຄົນເຮັດວຽກຊາວອາເມລິກາ, ສ່ວນຫວຽດນາມພະຍາຍາມຮັດແໜ້ນການຄ້າ ແລະ ການລົງທຶນກັບອາເມລິການັບແຕ່ທ່ານ ທຣຳ ຂຶ້ນເປັນປະທານາທິບໍດີ ໂດຍສະເພາະຕອນທ່ານ ທຣຳ ຖອນຕົວອອກຈາກການເປັນຫຸ້ນສ່ວນຂ້າມມະຫາສະໝຸດປາຊີຟິກ ທີ່ຫວຽດນາມຈະໄດ້ຮັບປະໂຫຍດມະຫາສານຈາກຂໍ້ຕົກລົງນີ້. ຍອດສົ່ງອອກຂອງຫວຽດນາມໄປອາເມລິກາເພີ່ມຂຶ້ນ 5 ເທົ່າໃນໄລຍະ 10 ປີຈົນເຖິງປີກ່ອນ, ຂະນະທີ່ຍອດສົ່ງອອກຂອງອາເມລິກາໄປຫວຽດນາມເພີ່ມຂຶ້ນ 9 ເທົ່າໃນໄລຍະດຽວກັນ ໂດຍມີມູນຄ່າຫລາຍກວ່າ 10.000 ລ້ານໂດລາສະຫະລັດ ໃນປີກ່ອນ.
