ສີລັງກາຜະເຊີນສະພາບເງິນຝືດຄັ້ງທໍາອິດໃນຮອບ 29 ປີ
ເສດຖະກິດຂອງສີລັງກາຜະເຊີນສະພາບເງິນຝືດ ຫລື ສະພາບທີ່ລາຄາສິນຄ້າຫລຸດລົງຢ່າງຕໍ່ເນື່ອງ ເປັນຄັ້ງທໍາອິດໃນຮອບ 29 ປີ ເນື່ອງຈາກຕົວເລກອັດຕາເງິນເຟີ້ໃນເດືອນກັນຍາຜ່ານມາ ຫລຸດລົງເຫລືອຕິດລົບ 0.5%.
ຂໍ້ມູນຂອງກົມສໍາມະໂນຄົວ ແລະ ສະຖິຕິ (DCS) ຂອງສີລັງກາ ສະແດງໃຫ້ເຫັນວ່າ: ການຫລຸດລົງຂອງລາຄາອາຫານ ແລະ ສິນຄ້າທີ່ບໍ່ແມ່ນອາຫານ ສົ່ງຜົນເຮັດໃຫ້ເກີດອັດຕາເງິນຝືດໃນເດືອນກັນຍາ ເມື່ອທຽບໃສ່ອັດຕາເງິນເຟີ້ 0.5% ໃນເດືອນສິງຫາຜ່ານມາ.
ສີລັງກາປະສົບສະພາບເງິນຝືດຄັ້ງຫລ້າສຸດໃນເດືອນມີນາ 1995 ໂດຍຕົວເລກຢູ່ລະດັບຕິດລົບ 0.9%, ສ່ວນເຫດການລາຄາສິນຄ້າຫລຸດລົງຄັ້ງກ່ອນໜ້າ ເກີດຂຶ້ນໃນປີ 1985 ເຊິ່ງໃນເວລານັ້ນອັດຕາເງິນເຟີ້ຂອງປະເທດຢູ່ລະດັບຕິດລົບ 2.1%.
ໃນທາງກົງກັນຂ້າມ, ສີລັງກາມີອັດຕາເງິນເຟີ້ສູງສຸດ 69.8% ເມື່ອສອງປີກ່ອນ ທ່າມກາງວິກິດທາງການເງິນທີ່ບໍ່ເຄີຍເກີດຂຶ້ນມາກ່ອນ ເຊິ່ງການຂາດເຂີນອາຫານ, ເຊື້ອໄຟ ແລະ ຢາຢ່າງຮຸນແຮງ ເຮັດໃຫ້ເກີດການປະທ້ວງເປັນເວລາຫລາຍເດືອນ ຈົນປະທານາທິບໍດີ ນາງ ໂກຕາພະຍາ ຣາຊປັກສາ ຜູ້ນໍາປະເທດໃນເວລານັ້ນ ລາອອກຈາກຕໍາແໜ່ງ ໃນເດືອນກໍລະກົດ 2022.
ເຖິງວ່າປະທານາທິບໍດີ ຣານິລ ວິກົມສິງເຫ ຜູ້ນໍາຄົນຕໍ່ມາ ໄດ້ຮັບເງິນຊ່ວຍເຫລືອຈາກກອງທຶນການເງິນສາກົນ (IMF) ມູນຄ່າ 2,900 ລ້ານໂດລາສະຫະລັດ ລວມທັງປັບຂຶ້ນພາສີ ແລະ ລາຄາສິນຄ້າ ເພື່ອຮັກສາສະຖຽນລະພາບຂອງເສດຖະກິດ, ແຕ່ທ່ານລາອອກຈາກຕໍາແໜ່ງພາຍຫລັງເສຍໄຊການເລືອກຕັ້ງປະທານາທິບໍດີ ໃນເດືອນຜ່ານມາ.
ສ່ວນປະທານາທິບໍດີ ອານຸຣາ ກຸມານ ດິບຢາຍາເກ ຜູ້ນໍາຄົນປັດຈຸບັນ ໃຫ້ຄໍາໝັ້ນວ່າຈະຮັກສາໂຄງການຂອງ IMF, ແຕ່ຈະຫລຸດຜ່ອນມາດຕະການຮັດສາຍແອວບາງສ່ວນທີ່ປະກາດໃຊ້ໃນລັດຖະບານສະໄໝປະທານາທິບໍດີ ວິກົມສິງເຫ.
