ຜູ້ນຳຍີ່ປຸ່ນຄົນໃໝ່ເລັ່ງຈັດການເລືອກຕັ້ງກ່ອນກໍານົດ ຮຽກຄວາມເຊື່ອໝັ້ນຂອງປະຊາຊົນ

      ນາຍົກລັດຖະມົນຕີຄົນໃໝ່ຂອງຍີ່ປຸ່ນ ຢືນຢັນແຜນການຈັດການເລືອກຕັ້ງກ່ອນກໍານົດໃນທ້າຍເດືອນຕຸລາ ເພື່ອກວດສອບການຍອມຮັບຈາກປະຊາຊົນ.

      ທ່ານ ຊິເງຣຸ ອິຊິບະ ຫົວໜ້າພັກເສລີປະຊາທິປະໄຕ (LDP) ແລະ ວ່າທີ່ນາຍົກລັດຖະມົນຕີຍີ່ປຸ່ນ ເຊິ່ງຈະຮັບຕໍາແໜ່ງຢ່າງເປັນທາງການໃນວັນທີ 1 ຕຸລານີ້, ຢືນຢັນລາຍງານຂອງສື່ມວນຊົນຫລາຍແຫ່ງກ່ຽວກັບການກຽມຈັດການເລືອກຕັ້ງທົ່ວໄປກ່ອນກໍານົດໃນວັນທີ 27 ຕຸລານີ້ ໂດຍກ່າວວ່າ: ຈໍາເປັນຢ່າງຍິ່ງທີ່ລັດຖະບານຊຸດໃໝ່ຕ້ອງໄດ້ຮັບຄວາມເຫັນພ້ອມຈາກປະຊາຊົນໃຫ້ໄວທີ່ສຸດ.

      ຂະນະດຽວກັນ, ທ່ານ ອິຊິບະ ໃຫ້ຄໍາໝັ້ນກ່ຽວກັບການຟື້ນຟູຄວາມເຊື່ອໝັ້ນພາຍໃນພັກ LDP ຈາກກໍລະນີຂ່າວລືຈໍານວນຫລາຍ ໂດຍສະເພາະທີ່ກ່ຽວຂ້ອງກັບການລະດົມທຶນພາຍໃນພັກ ແລະ ການສົ່ງເສີມການຮ່ວມມືດ້ານຄວາມໝັ້ນຄົງກັບປະເທດໃກ້ຄຽງ ເຊິ່ງລວມທັງການເພີ່ມງົບປະມານໃຊ້ຈ່າຍດ້ານປ້ອງກັນປະເທດ ແລະ ການຍົກລະດັບການຮ່ວມມືດ້ານຄວາມໝັ້ນຄົງທີ່ກ່ຽວຂ້ອງກັບອາເມລິກາ.

      ທັງນີ້, ລາຍງານຫລາຍກະແສລະບຸວ່າ: ທ່ານ ອິຊິບະ ກຽມແຕ່ງຕັ້ງທ່ານ ເກນ ນາຄາທານິ ອະດີດລັດຖະມົນຕີກະຊວງປ້ອງກັນປະເທດ ແລະ ຜູ້ຊ່ຽວຊານດ້ານນະໂຍບາຍຄວາມໝັ້ນຄົງ ໃຫ້ກັບມາດໍາລົງຕໍາແໜ່ງເກົ່າອີກ ແລະ ແຕ່ງຕັ້ງທ່ານ ທາເຄຊິ ອິວາຍະ ອະດີດລັດຖະມົນຕີກະຊວງປ້ອງກັນປະເທດອີກຄົນໜຶ່ງ ໃຫ້ເຮັດໜ້າທີ່ ລັດຖະມົນຕີກະຊວງການຕ່າງປະເທດ.

      ເຖິງຢ່າງໃດກໍຕາມ, ຄໍາຖາມສໍາຄັນທີ່ຫລາຍຝ່າຍຍັງສົງໄສ ຄືນະໂຍບາຍຂອງລັດຖະບານຍີ່ປຸ່ນໃນການເພີ່ມຈໍານວນບຸກຄະລາກອນທະຫານຂອງປະເທດ ສວນທາງກັບຈໍານວນປະຊາກອນທີ່ຫລຸດລົງຢ່າງຕໍ່ເນື່ອງ ແລະ ການປະຕິຮູບການໃຊ້ຈ່າຍຂອງລັດ ເນື່ອງຈາກຍີ່ປຸ່ນເປັນໜຶ່ງໃນປະເທດທີ່ມີອັດຕາສ່ວນໜີ້ສາທາລະນະຕໍ່ລວມຍອດຜະລິດຕະພັນພາຍໃນ (GDP) ໃນລະດັບສູງທີ່ສຸດໃນໂລກ.