ພາຍຫລັງຕື່ນນອນ ຄວນເຮັດ 5 ສິ່ງນີ້ ເພື່ອໃຫ້ອາຍຸຍືນ-ສຸຂະພາບດີ

      ກິດຈະກໍາທີ່ຈະເຮັດພາຍຫລັງຕື່ນນອນທຸກເຊົ້າມີຜົນຕໍ່ສຸຂະພາບ ແລະ ອາຍຸທີ່ຍືນຍາວຂອງພວກເຮົາ ມາເບິ່ງກັນວ່າ 5 ສິ່ງທີ່ຄວນເຮັດພາຍຫລັງຕື່ນນອນມີຫຍັງແດ່ ?

      ການມີອາຍຸຍືນຍາວເປັນຄວາມຝັນຂອງໃຜຫລາຍໆຄົນ ທຸກຄົນຕ້ອງການມີສຸຂະພາບທີ່ດີ ແລະ ມີຄວາມອ່ອນເຍົາໃນໃບໜ້າ, ນິໃສປະຈໍາວັນຂອງຄົນເຮົາມີສ່ວນສໍາຄັນຫລາຍທີ່ເຮັດໃຫ້ມີອາຍຸຍືນຍາວ ແລະ ມີສຸຂະພາບທີ່ດີຂຶ້ນໄດ້.

       ຫລາຍຄົນມັກເວົ້າວ່າ: “ມື້ທີ່ດີເລີ່ມຕົ້ນໃນຕອນເຊົ້າ ປີທີ່ປະສົບຜົນສໍາເລັດເລີ່ມຕົ້ນໃນລະດູໃບໄມ້ປົ່ງ” ຖ້າທ່ານເລີ່ມຕົ້ນມື້ໄດ້ດີໃນຕອນເຊົ້າ ຈະເຮັດໃຫ້ທ່ານເບິ່ງມີຄວາມສົດໃສຢູ່ສະເໝີ.

      ສື່ຫວຽດນາມ Soha ໄດ້ແນະນໍາ 5 ສິ່ງທີ່ຄວນປະຕິບັດໃຫ້ເປັນນິໃສພາຍຫລັງຕື່ນນອນຕອນເຊົ້າ ເພື່ອໃຫ້ມີສຸຂະພາບທີ່ດີ ແລະ ອາຍຸຍືນ.

1. ນອນຢູ່ບ່ອນນອນໄລຍະໜຶ່ງ: ເຮົາບໍ່ຄວນລຸກຂຶ້ນທັນທີຫລັງຕື່ນນອນ ຄວນນອນຢູ່ບ່ອນປະມານ 5 ນາທີ ແລະ ບໍ່ແມ່ນການນອນຫລິ້ນໂທລະສັບ ແຕ່ຕ້ອງເປັນການນອນເສີຍໆ ເພື່ອໃຫ້ເລືອດໄດ້ແລ່ນເຂົ້າສູ່ສະໝອງ ໂດຍສະເພາະຜູ້ສູງອາຍຸ ຄວນຕື່ນນອນຢ່າງອ່ອນໂຍນ ໃຫ້ຮ່າງກາຍຜ່ອນຄາຍທີ່ສຸດກ່ອນຈະລຸກຂຶ້ນນັ່ງ ແລ້ວຄ່ອຍໆຢືນ.
2. ເຂົ້າຫ້ອງນໍ້າ: ເມື່ອຕື່ນຂຶ້ນມາໃຫ້ເຂົ້າຫ້ອງນໍ້າເພື່ອຂັບຂອງເສຍອອກຈາກຮ່າງກາຍ.
3. ດື່ມນໍ້າອຸ່ນ: ຫລັງຈາກນອນຫລັບມາໝົດຄືນ ຮ່າງກາຍຈະຂັບຂອງເສຍອອກມາເປັນຈໍານວນຫລາຍ ການດື່ມນໍ້າອຸ່ນໜຶ່ງຈອກໃນຕອນເຊົ້າສາມາດທໍາຄວາມສະອາດຮ່າງກາຍ ແລະ ເຕີມເຕັມປະລິມານນໍ້າທີ່ສູນເສຍໄປໃນເວລານອນຫລັບ ເຮັດໃຫ້ຮ່າງກາຍສົດຊື່ນ.
4. ເຄື່ອນໄຫວຮ່າງກາຍເບົາໆ: ຫລັງຕື່ນນອນໃຫ້ອອກກໍາລັງກາຍເບົາໆ ເພື່ອຊ່ວຍໃຫ້ຮ່າງກາຍຕື່ນຕົວ. ບາງຄົນບໍ່ໄດ້ນອນເດິກ ແຕ່ຕື່ນເຊົ້າມາຮ່າງກາຍອ່ອນເພຍບໍ່ມີເຫື່ອແຮງ ຈິດໃຈຫ່ຽວແຫ້ງ ບໍ່ຢາກໄປໂຮງຮຽນໄປເຮັດວຽກ ໃຫ້ລອງເຄື່ອນໄຫວຮ່າງກາຍ ຢືດແຂນຢືດຂາຫລັງຕື່ນນອນ ເພື່ອໃຫ້ເລືອດໄຫລວຽນໄປທົ່ວຮ່າງກາຍ ຈະເຮັດໃຫ້ສົດຊື່ນຂຶ້ນ.
5. ອາບນໍ້າ: ການອາບນໍ້າຕອນເຊົ້າເປັນສິ່ງທີ່ດີ ຖ້າທ່ານມີສຸຂະພາບຮ່າງກາຍທີ່ດີ ການອາບນໍ້າເຢັນຈະຊ່ວຍໃຫ້ຜິວຂອງທ່ານລຽບນຽນ, ເຕັ່ງຕຶງ ແລະ ເຮັດໃຫ້ຕື່ນຕົວ, ແຕ່ຖ້າຮູ້ສຶກໜາວໃຫ້ອາບນໍ້າອຸ່ນ.