ປີທ່ອງທ່ຽວລາວໜັກໃຈນຳເສັ້ນທາງ
ໂດຍ: ທິດກໍ່າ
ໃນອາທິດຜ່ານມານີ້, ທິດກໍ່າໄດ້ມີໂອກາດໄປບ້ານກອງລໍ ແລະ ຖ້ຳກອງລໍ-ນາຕານ ບົນເສັ້ນທາງອອກແຕ່ວຽງຈັນຜ່ານຍ່ານ 13 ໃຕ້ ລ້ຽວໃສ່ທາງແບ່ງຫລັກ 20 ຕາມສາຍທາງເລກ 8 ເຖິງເມືອງຄູນຄຳ ແຂວງຄຳມ່ວນ ແລ້ວກໍລ້ຽວຂວາຕາມສາຍທາງໄປເຖິງບ້ານກອງລໍ ແລະ ຖ້ຳກອງລໍທີ່ຢູ່ໃກ້ກັນບໍ່ພໍຮອດກິໂລແມັດ. ຕາມເສັ້ນທາງບາງຍ່ານຂອງສາຍທາງ 13 ໃຕ້ກໍເຫັນບາງບ່ອນເປ່ເພ ໂດຍສະເພາະໃນລະຫວ່າງບ້ານຫາງຊິງ ເມືອງປາກຊັນ, ຍ່ານເຂດບ້ານໂພນສີ ເມືອງປາກກະດິງ ແຂວງບໍລິຄຳໄຊ. ສ່ວນຕາມທາງເລກ 8 ຍ່ານຂຶ້ນພູລົງພູຜາມ່ານມີບາງຈຸດທີ່ປູຢາງມັນກໍຊຳຫລຸດເປ່ເພໄດ້ເອົາຫີນໄປຖົມໃສ່, ເຕັມທີແຕ່ລົດໜັກແລ່ນຜ່ານໄປມາຂຶ້ນພູລົງພູຕ້ອງໄດ້ຄ່ອຍໄປຄ່ອຍມາຢ່າງລະມັດລະວັງ, ສ່ວນວ່າເສັ້ນທາງແຕ່ຕົວເມືອງຄູນຄຳໄປຫາຖ້ຳກອງລໍນັ້ນກໍຍິ່ງຫຍຸ້ງຍາກ ໂດຍສະເພາະແມ່ນນັບແຕ່ບ້ານນ້ຳນອນ, ບ້ານມ່ວງ ແລະ ໃກ້ຈະຮອດບ້ານກອງລໍເທົ່າໃດ ລົດກໍແລ່ນຖູໄຖຊັກຊ້າຫົວງຸບເງີງໆຄືບຄານໄປປານເຕົ່າ. ອັນຈຸດທີ່ຫຍຸ້ງຍາກກວ່າໝູ່ອີກບ່ອນໜຶ່ງກໍແມ່ນຢູ່ກະໂຕຂົວນ້ຳໄຮ ສົ້ນຂົວຖືກຊຳຫລຸດມາແຕ່ຊ່ວງຍາມຝົນພຸ້ນຈົນເກືອບວ່າຈະເປັນອຳມະພາດ. ປັດຈຸບັນ ເຈົ້າໜ້າທີ່ກ່ຽວຂ້ອງເພິ່ນໄດ້ເອົາຮາວເຫລັກໄປກັ້ນດັນໄວ້ເທິງຮາວຂົວ ເພື່ອບໍ່ໃຫ້ລົດທີ່ມີນ້ຳໜັກເກີນ ແລະ ມີຄວາມສູງເກີນຜ່ານເຂົ້າໄປໄດ້ ເພາະຢ້ານບໍ່ມີຄວາມປອດໄພ.
ປັດຈຸບັນ ປະເພດລົດຂົນສົ່ງ, ລົດໂດຍສານ ແລະ ບັນດາລົດທີ່ມີນ້ຳໜັກເກີນສາມສີ່ໂຕນຂຶ້ນເມືອ ຫລື ລົດທີ່ມີຫລັງຄາສູງແມ່ນບໍ່ສາມາດຜ່ານໄປມາໄດ້, ຜູ້ຄົນໂດຍສານ ຫລື ນັກທ່ອງທ່ຽວ ຖ້າຕ້ອງການໄປກໍຕ້ອງໄດ້ຕໍ່ລົດອີກຄັນໃໝ່. ຕົວຢ່າງວ່າຄົນໂດຍສານ ຫລື ນັກທ່ອງທ່ຽວທີ່ຕ້ອງການເດີນທາງໄປຖ້ຳກອງລໍຂຶ້ນລົດໂດຍສານໄປແຕ່ວຽງຈັນຕ້ອງໄປລົງລົດຢູ່ເມືອງຄູນຄຳ ຫລື ໄປລົງລົດຢູ່ສົ້ນຂົວນ້ຳໄຮເບື້ອງນີ້ແລ້ວຈຶ່ງໄປຕໍ່ລົດຢູ່ຟາກເບື້ອງນັ້ນຈຶ່ງສາມາດເດີນທາງຕໍ່ໄປໄດ້. ສ່ວນຄ່າລົດນັ້ນກໍຕ້ອງໄດ້ເສຍສອງຕໍ່ເໝືອນກັນ. ຄ່າລົດໄປແຕ່ວຽງຈັນຫາຖ້ຳກອງລໍຕາມປົກກະຕິແລ້ວເສຍແຕ່ 80.000 ກີບຮອດຖ້ຳກອງລໍເລີຍ, ແຕ່ວ່າດຽວນີ້ເສຍ 80.000 ກີບຮອດແຕ່ຕົວເມືອງຄູນຄຳ, ຖ້າຈ້າງຕໍ່ໄປອີກກໍຕ້ອງໄດ້ເສຍຕື່ມ 25.000 ຫາ 30.000 ກີບຈຶ່ງໄປຮອດຈຸດທີ່ໝາຍ. ເປັນອັນຈະແຈ້ງວ່າ: ກ່ອນຂົວບໍ່ທັນເພໄປກອງລໍແມ່ນໄດ້ເສຍເງິນແຕ່ພຽງ 80.000 ກີບ, ບາດມາຕອນຂົວເພໄດ້ເສຍຕື່ມປະມານ 105.000 ຫລື 110.000 ກີບຈຶ່ງໄປຮອດ.
ຕາມທິດກໍ່າໄດ້ຍິນຄົນທ້ອງຖິ່ນແຖວນັ້ນເຂົາພາກັນຈົ່ມ ມີທັງອັນດີ ແລະ ໃນເຊີງຕຳໜິວ່າ: ພວກທີ່ຫາກິນນຳລົດເຂົາພໍທັງຢາກຕົບມື ແລະ ທັງຟ້ອນ ເພາະມັນໄດ້ເງິນດີໄລຍະທາງຊ້ຳພັດໃກ້, ສ່ວນຜູ້ທີ່ເສຍປຽບກໍແມ່ນຊຸມເຮົາເຈົ້າຂອຍທີ່ໄດ້ໃຊ້ບໍລິການໄປມາທາງລົດ, ໄປມາທາງໃດກໍຕ້ອງໄດ້ຈົກຖົງເສຍທັງເຕີ້ຍທັງເໜືອກ. ໃນມື້ທິດກໍ່າຈະກັບວຽງຈັນໄດ້ມີນັກທ່ອງທ່ຽວສອງຄົນມາຖາມຂໍຂຶ້ນລົດນຳວ່າ ເຂົາຕ້ອງການໄປທ່າແຂກ, ແຕ່ທິດກໍ່າພັດວ່າເຮົາຈະໄປວຽງຈັນ ສຸດທ້າຍກໍໄດ້ແຕ່ພາກັນຫົວແລ້ວກໍເອີ່ຍປາກ “Sorry” ຕໍ່ກັນ.
ກ່າວເຖິງບັນຍາກາດໃນການທ່ອງທ່ຽວ, ຜູ້ປະກອບການເຮືອນພັກ, ຮ້ານອາຫານກໍຂ້ອນຂ້າງງຽບເຫງົາ ຍ້ອນນັກທ່ອງທ່ຽວມີມະຍ່ອມມະແຍ່ມ ເຊິ່ງມັນແຕກຕ່າງກັບຕອນທາງຍັງບໍ່ທັນເພ. ເຂົາຍັງໄດ້ເລົ່າສູ່ທິດກໍ່າຟັງວ່າ: ປັດຈຸບັນ ນັກທ່ອງທ່ຽວຕ່າງປະເທດຈຳນວນໜຶ່ງເຂົາໄດ້ໄປລົງລົດຢູ່ທ່າແຂກແລ້ວກໍພາກັນເຊົ່າລົດຈັກຂີ່ມາທ່ອງທ່ຽວ ບາງຄົນຂີ່ໄວຍ້ອນເພິ່ນພາກັນກ໊ອກເບຍສົມທົບກັບທາງເພແດ່ກໍເລີຍເກີດອຸປະຕິເຫດກໍມີ. ເຂົາຍັງໄດ້ເລົ່າຕໍ່ໄປວ່າ: ມາຮອດດຽວນີ້ເຫັນທາງເມືອງ, ທາງແຂວງ, ທ່ານເຈົ້າເມືອງ, ເຈົ້າແຂວງ ແລະ ທ່ານລັດຖະມົນຕີກ່ຽວຂ້ອງເພິ່ນມາເຫັນແລ້ວ, ວິຊາການເພິ່ນກໍມາກວດເບິ່ງແລ້ວ ຄາດວ່າອີກບໍ່ດົນເພິ່ນກໍຈະລົງມືປັບປຸງແກ້ໄຂ. ເບື້ອງປະຊາຊົນພວກເຮົາໃນຜ່ານມາກໍໄດ້ພາກັນລະດົມເອົາດິນໄປຖົມເຂດບ້ານໃຜບ້ານມັນແຕ່ກໍພຽງໄດ້ຊົ່ວຄາວ ສຸດທ້າຍມາທາງມັນກໍເພຢູ່ຈຸດເກົ່າບ່ອນເກົ່າຫັ້ນລະ ! ກ່າວເຖິງລາຍຮັບຖ້າທຽບໃສ່ຕອນທາງບໍ່ທັນເພກໍຖືວ່າພໍອຸ່ນໃຈ, ຕົກມາເປັນສະພາບແບບນີ້ຫລາຍຄົນກໍຄໍເຕື່ອຍ.
