ອິດສະລາແອນໂຈມຕີລີບັງຮອບໃໝ່ ພາຍຫລັງສັງຫານຫົວໜ້າກຸ່ມແຮັດໂບລາ

      ກອງທັບອິດສະລາແອນປະຕິບັດການໂຈມຕີເປົ້າໝາຍຢູ່ລີບັງຄັ້ງໃໝ່ ບໍ່ດົນພາຍຫລັງສັງຫານຜູ້ນໍາສູງສຸດຂອງກຸ່ມແຮັດໂບລາ.

      ກອງທັບອິດສະລາແອນອອກຖະແຫລງການວ່າ: ເຮືອບິນຮົບປະຕິບັດການໂຈມຕີເປົ້າໝາຍຫລາຍສິບແຫ່ງຢູ່ລີບັງ ເຊິ່ງເປັນຖານທີ່ໝັ້ນ ແລະ ສາງອາວຸດຂອງກຸ່ມແຮັດໂບລາ ໃນຕອນເຊົ້າຂອງວັນທີ 29 ກັນຍາ ຕາມເວລາທ້ອງຖິ່ນ ຕໍ່ເນື່ອງຈາກການໂຈມຕີເປົ້າໝາຍຫລາຍຮ້ອຍແຫ່ງຢູ່ລີບັງໃນວັນທີ 28 ກັນຍາຜ່ານມາ.

      ຂະນະທີ່ ພົນຕີ ດານຽວ ຮາກາຣີ ໂຄສົກກອງທັບອິດສະລາແອນ ກ່າວວ່າ: ໂລກຈະປອດໄພຫລາຍຂຶ້ນ ພາຍຫລັງອິດສະລາແອນສັງຫານທ່ານ ຮໍາຊັນ ນາສຣາລເລາະ ຜູ້ນໍາສູງສຸດຂອງກຸ່ມແຮັດໂບລາ ຈາກການໂຈມຕີເປົ້າໝາຍແບບເຈາະຈົງຢູ່ນະຄອນຫລວງເບຣຸດ ໃນວັນທີ 27 ກັນຍາຜ່ານມາ, ແຕ່ຢືນຢັນວ່າ: ພາລະກິດທາງທະຫານຂອງອິດສະລາແອນທີ່ມີຕໍ່ກຸ່ມແຮັດໂບລາຍັງບໍ່ຢຸດ ເນື່ອງຈາກຍັງມີສະມາຊິກ ແລະ ສາງອາວຸດຂອງກຸ່ມແຮັດໂບລາອີກຈໍານວນຫລາຍ.

      ສ່ວນແຫລ່ງຂ່າວຫລາຍກະແສລະບຸວ່າ: ທ່ານ ຮາເຊມ ຊາຟິດດີນ ເຊິ່ງເປັນລູກອ້າຍລູກນ້ອງຂອງທ່ານ ນາລຣາລເລາະ ໃຫ້ດໍາລົງຕໍາແໜ່ງຜູ້ນໍາຄົນໃໝ່ຂອງກຸ່ມແຮັດໂບລາ, ສ່ວນອີກຄົນໜຶ່ງທີ່ຫລາຍຝ່າຍຄາດກະໄວ້ ຄືທ່ານ ນາອິມ ກັສເຊັມ ຮອງຜູ້ນໍາກຸ່ມແຮັດໂບລາຄົນປັດຈຸບັນ.

      ສ່ວນທ່ານ ໂມຮໍາໝັດ ເຣຊາ ອາເຣຟ ຮອງປະທານາທິບໍດີອີຣານ ກ່າວວ່າ: ການສັງຫານທ່ານ ນາສຣາລເລາະ ຈະນໍາໄປສູ່ການທໍາລາຍລ້າງອິດສະລາແອນ ໂດຍອີຣານ, ລີບັງ, ອີຣັກ ແລະ ຊີເຣຍ ຕ່າງກໍປະກາດການໄວ້ອາໄລໃຫ້ທ່ານ ນາສຣາລເລາະ.

      ທັງນີ້, ນັບແຕ່ອິດສະລາແອນຍົກລະດັບປະຕິບັດການທາງທະຫານກັບກຸ່ມແຮັດໂບລາ ໃນຊ່ວງຕົ້ນເດືອນກັນຍາ ມີລາຍງານຜູ້ເສຍຊີວິດຢູ່ລີບັງແລ້ວ 700 ກວ່າຄົນ ສ່ວນຫລາຍເປັນຜູ້ເສຍຊີວິດຈາກການໂຈມຕີຄັ້ງຮຸນແຮງ ໃນວັນທີ 23 ກັນຍາຜ່ານມາ. ນອກຈາກນີ້ ປະຊາຊົນອີກ 200,000 ຄົນ ຕ້ອງກາຍເປັນຜູ້ບໍ່ມີບ່ອນຢູ່ອາໄສ.