ເຮີລິເຄນເຮເລນ ສັງຫານຄົນຢູ່ອາເມລິກາເກີນ 60 ຄົນ ທ່ານ ໄບເດນ ສັ່ງເລັ່ງຊ່ວຍເຫລືອຜູ້ປະສົບໄພ
ຜູ້ເສຍຊີວິດຈາກອິດທິພົນຂອງເຮີລິເຄນເຮເລນຢູ່ອາເມລິກາເພີ່ມຂຶ້ນຕໍ່ເນື່ອງເປັນ 60 ກວ່າຄົນ ໂດຍລັດຖະບານເລັ່ງໃຫ້ການຊ່ວຍເຫລືອປະຊາຊົນທີ່ເດືອດຮ້ອນເປັນຈໍານວນຫລາຍ.
ກ່ຽວກັບຄວາມຄືບໜ້າ ພາຍຫລັງເຮີລິເຄນເຮເລນ ທີ່ມີຄວາມຮຸນແຮງລະດັບ 4 ຕາມມາດຕາວັດແທກພາຍຸຊັບເຟີ-ຊິມສັນ ພັດຂຶ້ນຝັ່ງລັດຟໍຣິດາ ທາງຕາເວັນອອກສຽງໃຕ້ຂອງປະເທດ ໃນວັນທີ 26 ກັນຍາຜ່ານມາ ກ່ອນເຄື່ອນທີ່ຕໍ່ໄປລັດຈໍເຈຍ, ລັດເຊົາແຄໂຣໄລນາ ແລະ ລັດນອດແຄໂຣໄລນາ.
ທໍານຽຂາວເຜີຍແຜ່ຖະແຫລງການຂອງປະທານາທິບໍດີ ໂຈ ໄບເດນ ວ່າ: ໄດ້ສັ່ງໃຫ້ສໍານັກງານຈັດການພາວະສຸກເສີນສູນກາງ (ຟີມາ) ເລັ່ງສົ່ງມອບການຊ່ວຍເຫລືອໃຫ້ຜູ້ປະສົບໄພໃນທຸກລັດ ໂດຍຜູ້ນໍາອາເມລິກາຍອມຮັບວ່າ: ຄວາມເສຍຫາຍທີ່ເກີດຂຶ້ນຈາກອິດທິພົນຂອງພາຍຸເຮເລນນັ້ນເປັນວົງກວ້າງ.
ເຖິງວ່າພາຍຸອ່ອນກໍາລັງລົງຢ່າງຕໍ່ເນື່ອງເມື່ອເຄື່ອນທີ່ເຂົ້າສູ່ແຜ່ນດິນ, ແຕ່ໜ່ວຍງານຫລາຍແຫ່ງຂອງອາເມລິກາຍັງເຕືອນໄພປະຊາຊົນໃຫ້ລະມັດລະວັງອັນຕະລາຍຈາກກະແສລົມແຮງ, ນໍ້າຖ້ວມກະທັນຫັນ ແລະ ຄື້ນພາຍຸພັດເຂົ້າຝັ່ງ ຕະຫລອດຈົນຄວາມສ່ຽງຂອງການເກີດທໍນາໂດ.
ສື່ທ້ອງຖິ່ນຂອງອາເມລິກາລາຍງານວ່າ: ມີຜູ້ເສຍຊີວິດຈາກອິດທິພົນຂອງເຮີລິເຄນເຮເລນເພີ່ມເປັນຢ່າງໜ້ອຍ 22 ຄົນ ໃນລັດເຊົາແຄໂຣໂລນາ, ຢ່າງໜ້ອຍ 17 ຄົນ ໃນລັດຈໍເຈຍ, ຢ່າງໜ້ອຍ 11 ຄົນ ໃນລັດຟໍຣິດາ, ຢ່າງໜ້ອຍ 10 ຄົນ ໃນລັດນອດແຄໂຣໄລນາ ແລະ ຢ່າງໜ້ອຍ 1 ຄົນ ໃນລັດເວີຈິເນຍ.
ທັງນີ້, ພາຍຸເຮເລນຖືເປັນເຮີລິເຄນທີ່ມີຄວາມໄວລົມຮຸນແຮງທີ່ສຸດອັນດັບ 14 ໃນປະຫວັດສາດຂອງອາເມລິກາ ແລະ ມີເສັ້ນຜ່ານສູນກາງປະມານ 675 ກິໂລແມັດ ເປັນຮອງພຽງເຮີລິເຄນໄອດາ ໃນປີ 2017 ແລະ ເຮີລິເຄນໂອປໍ ໃນປີ 1996 ທີ່ມີເສັ້ນຜ່ານສູນກາງເທົ່າກັນ ຄືປະມານ 739 ກິໂລແມັດ.
