ເຊັນສັນຍາຮັບເໝົາໂຄງການກໍ່ສ້າງປ້ອງກັນຕາຝັ່ງເຈື່ອນ ໄລຍະທີ 2 ແລະ 3 ຢູ່ເມືອງຫ້ວຍຊາຍ ແຂວງບໍ່ແກ້ວ ມູນຄ່າ 236 ຕື້ກວ່າກີບ

ວັນທີ 27 ກັນຍາ 2024 ນີ ພະແນກໂຍທາທິການແລະ ຂົນສົ່ງແຂວງ  ເຊັນສັນຍາຮັບເໝົາກໍ່ສ້າງ ໂຄງການປ້ອງກັນຕາຝັ່ງເຈື່ອນ ໄລຍະທີ 2 ແລະ 3 ຢູ່ບ້ານດ່ານຖິ່ນ ເມືອງຫ້ວຍຊາຍ ແຂວງບໍ່ແກ້ວ ລະຫວ່າງ ອົງການປົກຄອງແຂວງ ຕາງໜ້າພະແນກໂຍທາທິການ ແລະ ຂົນສົ່ງແຂວງ ກັບ ບໍລິສັດ ຜູ້ຮັບເໝົາກໍ່ສ້າງ ໂດຍການເຂົ້າຮ່ວມຂອງ ທ່ານ ທອງຈັນ ມະນີໄຊ ເຈົ້າແຂວງບໍ່ແກ້ວ.

ທ່ານ ສົມອົກ ມະນີຈັນ ຮອງຫົວໜ້າ ພະແນກໂຍທາທິການ ແລະ ຂົນສົ່ງແຂວງ  ລາຍງານວ່າ: ໂຄງການກໍ່ສ້າງປ້ອງກັນຕາຝັ່ງເຈື່ອນ ບ້ານດອນສະຫວັນ ຫາ ບ້ານດ່ານຖິ່ນ ໄລຍະທີ 2 ມີຄວາມຍາວ 3,300 ແມັດ, ມູນຄ່າ 89,836,520,000 ກີບ ແລະ ໂຄງການກໍ່ສ້າງປ້ອງກັນຕາຝັ່ງເຈື່ອນ ບ້ານດ່ານຖິ່ນ ໄລຍະ 3, ມີຄວາມ ຍາວ 2,669 ແມັດ ໃນມູນຄ່າ 146,321,070,000 ກີບ  ເປັນການລົງທຶນດ້ວຍງົບປະມານຂອງລັດ ຮັບເໝົາໂດຍ ບໍລິສັດ ເຮືອງປະເສີດ ກໍ່ສ້າງສ້ອມແປງ ເຄຫາສະຖານ ແລະ ຂົວທາງຈໍາກັດຜູ້ດຽວ.