ອິດສະລາແອນຖິ້ມລະເບີດຖະຫລົ່ມເບຣຸດ ອ້າງທໍາລາຍສາງອາວຸດຂອງກຸ່ມແຮັດໂບລາ
ກອງທັບອິດສະລາແອນສົ່ງເຮືອບິນຮົບລະດົມຖິ້ມລະເບີດໂຈມຕີທາງອາກາດໃນເຂດດາຮິເຢ ທາງພາກໃຕ້ຂອງນະຄອນຫລວງເບຣຸດ ປະເທດລີບັງ ເຊິ່ງເປັນຖານທີ່ໝັ້ນຂອງກຸ່ມຕິດອາວຸດແຮັດໂບລາ ໂດຍອ້າງວ່າເປັນການມຸ້ງເປົ້າໂຈມຕີອາຄານທີ່ເປັນສາງອາວຸດຂອງກຸ່ມແຮັດໂບລາ.
ການໂຈມຕີສົ່ງຜົນເຮັດໃຫ້ອາຄານຫລາຍຫລັງພັງຖະຫລົ່ມ ແລະ ມີລາຍງານຜູ້ເສຍຊີວິດແລ້ວ 6 ຄົນ, ບາດເຈັບ 100 ກວ່າຄົນ, ແຕ່ຄາດວ່າຈໍານວນຜູ້ເສຍຊີວິດອາດເພີ່ມສູງຂຶ້ນອີກ ເນື່ອງຈາກຍັງມີປະຊາຊົນທີ່ຖືກຝັງໃຕ້ຊາກອາຄານ ເຊິ່ງລົດພະຍາບານຍັງບໍ່ສາມາດເຂົ້າໄປຄົ້ນຫາ ແລະ ຊ່ວຍເຫລືອໄດ້ ເນື່ອງຈາກຍັງມີຄວາມສ່ຽງຈາກການໂຈມຕີທາງອາກາດທີ່ຍັງຮຸນແຮງ.
ການໂຈມຕີນະຄອນຫລວງເບຣຸດມີຂຶ້ນຫລັງຈາກອິດສະລາແອນເດີນໜ້າໂຈມຕີທາງອາກາດໃນພື້ນທີ່ຕອນໃຕ້ຂອງລີບັງຢ່າງຕໍ່ເນື່ອງນັບແຕ່ອາທິດຜ່ານມາ ເຊິ່ງມາຮອດປັດຈຸບັນພົບວ່າຈໍານວນລວມຜູ້ເສຍຊີວິດຈາກການໂຈມຕີທັງໝົດເພີ່ມເປັນເກືອບ 800 ຄົນແລ້ວ.
ນອກຈາກນີ້ ຍັງມີລາຍງານຈາກສື່ທ້ອງຖິ່ນອາເມລິກາວ່າ: ທ່ານ ຮໍາຊັນ ນາສຣັລເລາະ ຜູ້ນໍາກຸ່ມແຮັດໂບລາ ຕົກເປັນເປົ້າໝາຍໃນການໂຈມຕີທາງອາກາດຮອບຫລ້າສຸດນໍາ, ແຕ່ຍັງບໍ່ມີລາຍງານຢືນຢັນວ່າທ່ານຖືກໂຈມຕີ ຫລື ບໍ່.
ອ້າງອີງ:
- https://www.aljazeera.com/news/liveblog/2024/9/28/israel-attacks-lebanon-deaths-mount-as-beirut-buildings-bombed-to
- https://www.bbc.com/news/live/c981g8mrl8lt
