ພັກລັດຖະບານຍີ່ປຸ່ນເລືອກທ່ານ ຊິເງຣຸ ອິຊິບະ ເປັນນາຍົກລັດຖະມົນຕີຄົນໃໝ່
ພັກ Liberal Democratic Party: LDP) ເຊິ່ງເປັນພັກລັດຖະບານຂອງຍີ່ປຸ່ນ ມີມະຕິເລືອກທ່ານ ຊິເງຣຸ ອິຊິບະ ອະດີດລັດຖະມົນຕີວ່າການກະຊວງປ້ອງກັນປະເທດ ອາຍຸ 67 ປີ ເປັນຫົວໜ້າພັກ ແລະ ນາຍົກລັດຖະມົນຕີຍີ່ປຸ່ນຄົນໃໝ່.
ໂດຍທ່ານ ອິຊິບະ ເປັນ 1 ໃນ 9 ສະມາຊິກພັກທີ່ລົງສະໝັກ ແລະ ສາມາດເອົາຊະນະທ່ານ ຊານາເອະ ທາກາອິຈິ ລັດຖະມົນຕີວ່າການກະຊວງຄວາມໝັ້ນຄົງທາງເສດຖະກິດ ທີ່ເປັນອີກໜຶ່ງຕົວເຕັງ ດ້ວຍຄະແນນໂຫວດ 215 ຕໍ່ 194 ສຽງ.
ໄຊຊະນະຂອງທ່ານ ອິຊິບະ ມີຂຶ້ນພາຍຫລັງທ່ານພະຍາຍາມລົງສະໝັກຊິງຕໍາແໜ່ງຜູ້ນໍາພັກເປັນຄັ້ງທີ 5 ແລະ ຕັ້ງເປົ້າໝາຍຈະລົງສະໝັກຄັ້ງນີ້ເປັນຄັ້ງສຸດທ້າຍ.
ໂດຍພາຍຫລັງການໂຫວດ ທ່ານປະກາດວ່າ: ພັກ LDP ຈະເກີດໃໝ່ ແລະ ໄດ້ຮັບຄວາມເຊື່ອຖືກັບມາອີກ ພາຍຫລັງຜະເຊີນຂ່າວຄັ້ງໃຫຍ່ຈາກກໍລະນີສໍ້ລາດບັງຫລວງພາຍໃນພັກ ເຊິ່ງສົ່ງຜົນເຮັດໃຫ້ກະແສຄວາມນິຍົມຂອງພັກຕົກຕໍ່າ ແລະ ເຮັດໃຫ້ນາຍົກລັດຖະມົນຕີ ຟູມິໂອ ຄິຊິດະ ຕັດສິນໃຈລາອອກຈາກຕໍາແໜ່ງໄປກ່ອນໜ້ານີ້ ເພື່ອກະຕຸ້ນໃຫ້ເກີດການປ່ຽນແປງພາຍໃນພັກ.
ທ່ານ ຊິເງຣຸ ອິຊິບະ ຖືເປັນສະມາຊິກອາວຸໂສຂອງພັກ LDP ທີ່ໄດ້ຮັບເລືອກຕັ້ງເປັນ ສສ ນັບແຕ່ປີ 1986 ແລະ ເຄີຍດໍາລົງຕໍາແໜ່ງລັດຖະມົນຕີໃນຫລາຍກະຊວງ.
ຜ່ານມາທ່ານມັກຈະວິພາກວິຈານການເຮັດວຽກຂອງທ່ານ ຄິຊິດະ ແລະ ບາງນະໂຍບາຍຂອງພັກເຊັ່ນ: ບໍ່ອະນຸຍາດໃຫ້ຄູ່ສົມຣົດໃຊ້ນາມສະກຸນແຍກກັນ.
ຂະນະທີ່ທ່ານໃຫ້ຄວາມສໍາຄັນບັນຫາຄວາມໝັ້ນຄົງ ໂດຍສະໜັບສະໜູນໃຫ້ຫລຸດການອາໄສອາເມລິກາໃນການປ້ອງກັນປະເທດ ລວມທັງສະໜັບສະໜູນໃຫ້ເພີ່ມການໃຊ້ພະລັງງານນິວເຄຼຍພາຍໃນປະເທດ.
ອ້າງອີງ:
- https://www.reuters.com/world/japan/shigeru-ishiba-outsider-set-lead-japan-2024-09-27/
- https://edition.cnn.com/2024/09/26/asia/japan-ruling-party-election-intl-hnk/index.html
- https://www.bbc.com/news/articles/cy89ez894rko
