ພັກລັດຖະບານຍີ່ປຸ່ນເລືອກ ທ່ານ ຊິເງຣຸ ອິຊິບະ ເປັນນາຍົກລັດຖະມົນຕີ ຄົນໃໝ່

ວັນທີ 27 ກັນຍາ 2024 ສຳນັກຂ່າວຕ່າງປະເທດລາຍງານວ່າ: ພັກແອລດີພີ (Liberal Democratic Party: LDP) ເຊິ່ງເປັນພັກຂອງລັດຖະບານຍີ່ປຸ່ນ ມີມະຕິເລືອກ ທ່ານ ຊິເງຣຸ ອິຊິບະ ອາຍຸ 67 ປີ ອະດີດລັດຖະມົນຕີກະຊວງປ້ອງກັນປະເທດ ເປັນຫົວໜ້າພັກ ແລະ ເປັນນາຍົກລັດຖະມົນ ຕີ ຄົນໃໝ່ ແທນ ທ່ານ ຟູມິໂອ ຄິຊິດະ ທີ່ຕັດສິນໃຈລາອອກຈາກຕຳແໜ່ງນາຍົກລັດຖະມົນຕີກ່ອນ ໜ້ານີ້, ທ່ານ ຊິເງຣຸ ອິຊິບະ ເປັນ 1 ໃນ 9 ສະມາຊິກພັກທີ່ລົງສະໝັກ ແລະ ສາມາດເອົາຊະນະ ທ່ານ ຊານາເອະ ທາກາອິຈິ ລັດຖະມົນຕີກະຊວງຄວາມໝັ້ນຄົງທາງເສດຖະກິດ ທີ່ເປັນອີກຄົນໜຶ່ງທີ່ຄາດວ່າຈະຖືກເລືອກໃຫ້ດຳລົງຕຳແໜ່ງສຳຄັນນີ້ ດ້ວຍຄະແນນໂຫວດ 215 ຕໍ່ 194 ສຽງ.

ໄຊຊະນະຂອງ ທ່ານ ຊິເງຣຸ ອິຊິບະ ມີຂຶ້ນຫລັງຈາກທີ່ທ່ານໄດ້ພະຍາຍາມລົງສະໝັກຊິງຕຳແໜ່ງຜູ້ນຳພັກເປັນຄັ້ງທີ 5 ແລະ ຕັ້ງເປົ້າໝາຍທີ່ຈະລົງສະໝັກຄັ້ງນີ້ເປັນຄັ້ງສຸດທ້າຍ. ພາຍຫລັງການລົງມະຕິ ທ່ານໄດ້ກ່າວວ່າ: ພັກແອລດີພີ ( LDP ) ຈະເກີດໃໝ່ ແລະ ຈະໄດ້ຮັບຄວາມເຊື່ອໝັ້ນອີກຄັ້ງໃໝ່, ພາຍຫລັງມີຂ່າວການທຸຈະລິດຄັ້ງໃຫຍ່ພາຍໃນພາຍພັກ ເຮັດໃຫ້ກະແສນິຍົມຂອງພັກຕົກຕ່ຳ, ຈົນນາຍົກລັດຖະມົນຕີີ ຟູມິໂອ ຄິຊິດະ ຕັດສິນໃຈລາອອກຈາກຕຳແໜ່ງກ່ອນໜ້ານີ້ ເພື່ອກະຕຸ້ນໃຫ້ມີການປ່ຽນແປງໃໝ່ພາຍໃນພັກ.

ທ່ານ ຊິເງຣຸ ອິຊິບະ ຖືວ່າເປັນສະມາຊິກອາວຸໂສຂອງພັກ ແອລດີພີ ທີ່ໄດ້ຮັບເລືອກຕັ້ງເປັນ ສສ ຕັ້ງແຕ່ປີ 1986 ແລະ ເຄີຍເປັນລັດຖະມົນຕີໃນຫລາຍກະຊວງ.