ນາໆຊາດຮ່ວມກັນຮຽກຮ້ອງ ອິດສະລາແອນ-ກຸ່ມແຮັດໂບລາ ຢຸດຍິງ 21 ວັນ
ອາເມລິກາ, ຫລາຍປະເທດໃນເອີຣົບ ແລະ ຕາເວັນອອກກາງ ຮ່ວມກັນຮຽກຮ້ອງໃຫ້ອິດສະລາແອນ ແລະ ກຸ່ມແຮັດໂບລາຢຸດຍິງ ເປັນເວລາ 21 ວັນ ເພື່ອໃຫ້ເຈລະຈາກັນ.
ອາເມລິກາ, ອົດສະຕຣາລີ, ການາດາ, ສະຫະພາບເອີຣົບ (EU), ຝຣັ່ງ, ເຢຍລະມັນ, ອິຕາລີ, ຍີ່ປຸ່ນ, ຊາອຸດິອາຣະບີ, ສະຫະລັດອາຣັບເອມິເຣດ (UAE) ແລະ ກາຕາ ອອກຖະແຫລງການຮ່ວມກັນ ຮຽກຮ້ອງການໃຊ້ວິທີການທູດຫລຸດຜ່ອນຄວາມຂັດແຍ່ງ ລະຫວ່າງອິດສະລາແອນກັບກຸ່ມແຮັດໂບລາຢູ່ລີບັງ ເພື່ອໃຫ້ປະຊາຊົນຂອງທັງສອງປະເທດທີ່ຕ້ອງອົບພະຍົບໜີການສູ້ຮົບ ສາມາດເດີນທາງກັບພູມລໍາເນົາໄດ້ຢ່າງປອດໄພ.
ທັງນີ້, ຖະແຫລງການຮ່ວມຂອງປະເທດກຸ່ມນີ້ ຮຽກຮ້ອງການຢຸດຍິງເປັນເວລາ 21 ວັນ ແລ້ວໃນລະຫວ່າງນີ້ ຄູ່ກໍລະນີທຸກຝ່າຍຕ້ອງເຈລະຈາກັນຢ່າງຈິງຈັງ ເພື່ອປູທາງສູ່ການຢຸດຍິງຢ່າງຍືນຍົງໃນອະນາຄົດ.
ທ່ານ ແດນນີ ດານອນ ເອກອັກຄະລັດຖະທູດອິດສະລາແອນປະຈໍາສະຫະປະຊາຊາດ (UN) ກ່າວວ່າ: ອິດສະລາແອນເປີດກວ້າງສໍາລັບການເຈລະຈາ. ເຖິງຢ່າງໃດກໍຕາມ, ອິດສະລາແອນພ້ອມດໍາເນີນທຸກວິທີທາງເພື່ອໃຫ້ບັນລຸເປົ້າໝາຍ ນັ້ນຄືການຫລຸດຄວາມສ່ຽງຂອງກຸ່ມແຮັດໂບລາທີ່ຈະເກີດຂຶ້ນກັບອິດສະລາແອນ.
