OECD ປັບເພີ່ມຄາດຄະເນເສດຖະກິດໂລກປີນີ້ GDP ມີທ່າອ່ຽງເຕີບໃຫຍ່ 3.2%
ອົງການເພື່ອການຮ່ວມມື ແລະ ການພັດທະນາທາງເສດຖະກິດ (OECD) ປັບເພີ່ມຄາດຄະເນການເຕີບໃຫຍ່ທາງເສດຖະກິດໂລກປີ 2024 ເລັກໜ້ອຍ, ພ້ອມຮຽກຮ້ອງໃຫ້ເພີ່ມພາສີຊັບສິນ ແລະ ສິ່ງແວດລ້ອມ ເພື່ອຕໍ່ສູ້ບັນຫາໜີ້ສິນທີ່ເພີ່ມສູງຂຶ້ນໃນຫລາຍປະເທດ.
ລາຍງານທ່າອ່ຽງເສດຖະກິດລະບຸວ່າ: ລວມຍອດຜະລິດຕະພັນພາຍໃນ (GDP) ທົ່ວໂລກ ຈະຂະຫຍາຍຕົວ 3.2% ເມື່ອທຽບໃສ່ 3.1% ຈາກການຄາດຄະເນກ່ອນໜ້ານີ້ “ການເຕີບໃຫຍ່ຂອງຜົນຜະລິດທົ່ວໂລກຍັງຢືດຢຸ່ນ ແລະ ອັດຕາເງິນເຟີ້ຍັງຂະຫຍາຍຕົວຊ້າ” ລາຍງານກ່າວ.
ທັງນີ້, ທະນາຄານກາງຢູ່ອາເມລິກາ ແລະ ເອີຣົບ ເລີ່ມຫລຸດອັດຕາດອກເບ້ຍ ເນື່ອງຈາກອັດຕາເງິນເຟີ້ທີ່ເພີ່ມສູງຂຶ້ນ ຈາກການລະບາດຂອງພະຍາດໂຄວິດ-19 ແລະ ສົງຄາມລະຫວ່າງອູແກຣນກັບຣັດເຊຍເຂົ້າສູ່ສະພາບທີ່ເອີ້ນໄດ້ວ່າ: ຄົງທີ່.
OECD ອ້າງເຖິງການເຕີບໃຫຍ່ທີ່ຂ້ອນຂ້າງແຂງແຮງຢູ່ອາເມລິກາ, ເບຣຊິນ, ອັງກິດ, ອິນເດຍ ແລະ ອິນໂດເນເຊຍ ແລະ ຫລຸດຄາດຄະເນການເຕີບໃຫຍ່ຂອງ GDP ຣັດເຊຍຂຶ້ນອີກ 1.1% ເປັນ 3.7%.
ຂະນະດຽວກັນ OECD ຫລຸດຄາດຄະເນເສດຖະກິດຂອງເຢຍລະມັນ ເຊິ່ງເປັນເສດຖະກິດຂະໜາດໃຫຍ່ທີ່ສຸດຂອງເອີຣົບ ເຫລືອ 0.1% ແລະ ລະບຸວ່າ: GDP ຂອງຍີ່ປຸ່ນ ຈະຫລຸດລົງ 0.1%. ຂະນະທີ່ເສດຖະກິດຂອງອາກຊັງຕິນ ຈະຫລຸດລົງເຖິງ 4%.
ສໍາລັບໜີ້ສາທາລະນະທົ່ວໂລກທີ່ເພີ່ມຂຶ້ນເຖິງລະດັບສູງສຸດເປັນປະຫວັດສາດ 97 ພັນລ້ານໂດລາສະຫະລັດ ເຊິ່ງເພີ່ມຂຶ້ນເປັນ 2 ເທົ່າ ເມື່ອທຽບໃສ່ປີ 2010. OECD ເຕືອນວ່າ: ຖ້າບໍ່ມີການດໍາເນີນງານຢ່າງຕໍ່ເນື່ອງ ພາລະໜີ້ໃນອະນາຄົດອາດເພີ່ມຂຶ້ນ. ດັ່ງນັ້ນ ລັດຕ້ອງເພີ່ມລາຍໄດ້ຈາກພາສີທາງອ້ອມເຊັ່ນ: ພາສີສິ່ງແວດລ້ອມ ແລະ ຊັບສິນ.
