ທະນາຄານພັດທະນາອາຊີຊີ້ ການລົງທຶນໃນ AI ຊ່ວຍຂັບເຄື່ອນການເຕີບໃຫຍ່ພາກພື້ນ

     ທະນາຄານພັດທະນາອາຊີ (ADB) ລະບຸວ່າ: ການລົງທຶນລະດັບໂລກທີ່ເພີ່ມຂຶ້ນໃນປັນຍາປະດິດ (AI) ແລະ ອັດຕາເງິນເຟີ້ທີ່ຫລຸດລົງ ຊ່ວຍໃຫ້ປະເທດກໍາລັງພັດທະນາໃນອາຊີ ມີຮາກຖານສໍາລັບການເຕີບໃຫຍ່ທາງເສດຖະກິດທີ່ຍືນຍົງໃນປີ 2024 ແລະ 2025.

     ເນື່ອງຈາກການສົ່ງອອກສິນຄ້າເພີ່ມຂຶ້ນ 8% ໃນເດືອນກັນຍາຜ່ານມາ ADB ຈຶ່ງປັບເພີ່ມຄາດຄະເນການເຕີບໃຫຍ່ທາງເສດຖະກິດຂອງພາກພື້ນໃນປີ 2024 ເປັນ 5% ໃນປີນີ້ ຈາກເຄີຍຄາດຄະເນໄວ້ 4.9% ໃນເດືອນເມສາ.

     ຜູ້ສົ່ງອອກເຕັກໂນໂລຊີທີ່ມີລາຍໄດ້ສູງ ໄດ້ຮັບຜົນປະໂຫຍດຈາກຍອດຂາຍເຊມິຄອນດັກເຕີທົ່ວໂລກເພີ່ມຂຶ້ນ ທ່າມກາງຄວາມຕ້ອງການຜະລິດຕະພັນ AI ໃນລະດັບສູງ ຈາກຈີນ, ໄຕ້ຫວັນ ແລະ ສ.ເກົາຫລີ. ທ່ານ ອັລເບິດ ພາກ ຫົວໜ້ານັກເສດຖະສາດຂອງ ADB ກ່າວ.

     ນອກຈາກນີ້, ADB ຍັງຫລຸດຄາດຄະເນອັດຕາເງິນເຟີ້ຂອງພາກພື້ນໃນປີນີ້ ເຫລືອ 2.8% ຈາກ 3.2% ໃນເດືອນເມສາຜ່ານມາ ເນື່ອງຈາກລາຄາອາຫານຢູ່ຈີນຫລຸດເຖິງລະດັບຕໍ່າສຸດຊ້າວ່າການຄາດຄະເນໄວ້.

     ADB ລະບຸໃນລາຍງານວ່າ: ອັດຕາເງິນເຟີ້ທີ່ຫລຸດລົງ, ຄວາມຕ້ອງການອຸປະກອນເອເລັກໂຕຣນິກທົ່ວໂລກເພີ່ມຂຶ້ນ ລວມທັງລົດ ແລະ ເຮືອຈາກຈີນ ແລະ ສ.ເກົາຫລີ ແລະ ທ່າອ່ຽງການເຕີບໃຫຍ່ທາງເສດຖະກິດທີ່ດີຂຶ້ນຂອງປະເທດພັດທະນາແລ້ວ ກໍາລັງຊ່ວຍສົ່ງເສີມທ່າອ່ຽງຂອງອາຊີ.

     ເຖິງຢ່າງໃດກໍຕາມ, ADB ລະບຸອີກວ່າ: ລັດຖະບານປັກກິ່ງຈະບໍ່ບັນລຸເປົ້າໝາຍການເຕີບໃຫຍ່ທາງເສດຖະກິດ 5% ໃນປີ 2024 ໂດຍຄາດວ່າຈະຂະຫຍາຍຕົວພຽງ 4.8%.