ອິດສະລາແອນຖະຫລົ່ມລີບັງຢ່າງໜັກໃຫຍ່ສຸດໃນຮອບ 20 ປີ ຜູ້ເສຍຊີວິດສູງເຖິງເຄິ່ງພັນ
ລັດຖະບານລີບັງຢືນຢັນຜູ້ເສຍຊີວິດຢ່າງໜ້ອຍ 492 ຄົນ ຈາກປະຕິບັດການໂຈມຕີທາງທະຫານຄັ້ງໃຫຍ່ທີ່ສຸດໃນຮອບ 20 ປີ ຂອງກອງທັບອິດສະລາແອນທີ່ທໍາລາຍສະຖານທີ່ 1,000 ກວ່າແຫ່ງໃນປະເທດ ເຊິ່ງເຊື່ອວ່າກ່ຽວຂ້ອງກັບກຸ່ມແຮັດໂບລາ.
ກອງທັບອິດສະລາແອນອອກຖະແຫລງການກ່ຽວກັບປະຕິບັດການລູກທະນູເໜືອ (Operation Northern Arrows) ທີ່ເປັນການໂຈມຕີເປົ້າໝາຍເກືອບ 1,300 ແຫ່ງ ຢູ່ພາກໃຕ້ ແລະ ພາກຕາເວັນອອກຂອງລີບັງ ລວມທັງການໂຈມຕີເປົ້າໝາຍແບບສະເພາະເຈາະຈົງຢູ່ນະຄອນຫລວງເບຣຸດ ເພື່ອທໍາລາຍຖານທີ່ໝັ້ນຂອງກຸ່ມແຮັດໂບລາ ໃນວັນທີ 23 ກັນຍາຜ່ານມາ.
ທ່ານ ພົນໂທ ເຮີຊີ ຮາເລວີ ປະທານຄະນະເສນາທິການທະຫານຮ່ວມອິດສະລາແອນ ກ່າວວ່າ: ປະຕິບັດການທາງທະຫານຄັ້ງນີ້ ຄືການທໍາລາຍໂຄງລ່າງພື້ນຖານທາງທະຫານທັງໝົດ ທີ່ກຸ່ມແຮັດໂບລາສ້າງຂຶ້ນໃນໄລຍະ 20 ປີຜ່ານມາ ແລະ ເພື່ອເປັນຫລັກປະກັນຄວາມປອດໄພໃຫ້ປະຊາຊົນຢູ່ພາກເໜືອຂອງອິດສະລາແອນ.
ເຖິງຢ່າງໃດກໍຕາມ, ກອງທັບອິດສະລາແອນຢືນຢັນວ່າ: ເນັ້ນປະຕິບັດການໂຈມຕີທາງອາກາດເທົ່ານັ້ນ ພາຍຫລັງມີການວິເຄາະຈາກບາງຝ່າຍກ່ຽວກັບປະຕິບັດການທາງທະຫານພາກພື້ນດິນ ເພື່ອກໍານົດແນວກັນລະຫວ່າງພາກໃຕ້ຂອງລີບັງກັບພາກເໜືອຂອງອິດສະລາແອນ.
ຂະນະທີ່ກະຊວງສາທາລະນະສຸກລີບັງລາຍງານວ່າ: ຈໍານວນຜູ້ເສຍຊີວິດຈາກປະຕິບັດການດັ່ງກ່າວຂອງກອງທັບອິດສະລາແອນ ເຊິ່ງຮຸນແຮງທີ່ສຸດນັບແຕ່ສົງຄາມລະຫວ່າງອິດສະລາແອນກັບລີບັງໃນປີ 2006 ເພີ່ມເປັນຢ່າງໜ້ອຍ 492 ຄົນ ໃນຈໍານວນນີ້ລວມທັງເດັກນ້ອຍຢ່າງໜ້ອຍ 35 ຄົນ ແລະ ຜູ້ຍິງ 58 ຄົນ ແລະ ມີຜູ້ໄດ້ຮັບບາດເຈັບອີກຢ່າງໜ້ອຍ 1,645 ຄົນ. ນອກຈາກນີ້ ອີກຫລາຍພັນຄອບຄົວບໍ່ມີບ່ອນຢູ່ອາໄສ.
ທັງນີ້, ແຫລ່ງຂ່າວລະດັບສູງຂອງຝ່າຍຄວາມໝັ້ນຄົງຢູ່ລີບັງ ກ່າວວ່າ: ເປົ້າໝາຍສໍາຄັນຂອງການໂຈມຕີໂດຍກອງທັບອິດສະລາແອນຄັ້ງນີ້ ຄືຄວາມຕ້ອງການສັງຫານທ່ານ ອາລີ ອາຣາກີ ເຊິ່ງເປັນຜູ້ບັນຊາການກອງກໍາລັງພາກໃຕ້ຂອງກຸ່ມແຮັດໂບລາ, ແຕ່ກຸ່ມແຮັດໂບລາຍັງຢືນຢັນວ່າ: ທ່ານ ອາຣາກີ ປອດໄພດີ ແລະ ມີການຍິງຈະຫລວດ 200 ກວ່າລູກ ຂ້າມແດນເພື່ອຕອບໂຕ້ອິດສະລາແອນ.
ອີກດ້ານໜຶ່ງ, ທ່ານ ອັນໂຕນິໂອ ກູເຕເຣສ ເລຂາທິການສະຫະປະຊາຊາດ (UN) ກ່າວເຖິງສະຖານະການສົງຄາມຢູ່ເຂດກາຊາທີ່ກໍາລັງຈະຄົບ 1 ປີ ໃນວັນທີ 7 ຕຸລານີ້ວ່າ: ຄູ່ກໍລະນີອິດສະລາແອນ ແລະ ກຸ່ມຮາມັດ ຕ່າງຍັງບໍ່ມີຄວາມສົນໃຈຢ່າງຈິງຈັງກ່ຽວກັບການຢຸດຍິງຄັ້ງໃໝ່. ພ້ອມເນັ້ນວ່າ: ສົງຄາມຢູ່ເຂດກາຊາຕ້ອງຢຸດໂດຍໄວທີ່ສຸດ.
ກ່ຽວກັບຄວາມຮຸນແຮງທີ່ເພີ່ມຂຶ້ນລະຫວ່າງອິດສະລາແອນກັບກຸ່ມແຮັດໂບລາ, ເລຂາທິການ UN ກ່າວວ່າ: ຕິດຕາມສະຖານະການທີ່ເກີດຂຶ້ນດ້ວຍຄວາມກັງວົນວ່າ: ມີຄວາມເປັນໄປໄດ້ທີ່ລີບັງຈະກາຍເປັນເຂດກາຊາແຫ່ງທີສອງ ແລະ ທຸກຝ່າຍຕ້ອງຮ່ວມກັນຫາທາງຢັບຢັ້ງ ເພື່ອບໍ່ໃຫ້ສະຖານະການລຸກລາມ.
