UN ຮັບຮອງຂໍ້ຕົກລົງສໍາຄັນເພື່ອສ້າງອະນາຄົດທີ່ສົດໃສຂອງມະນຸດ
ສະຫະປະຊາຊາດ (UN) ຮັບຮອງຂໍ້ຕົກລົງເພື່ອອະນາຄົດ ເຊິ່ງມີເປົ້າໝາຍແກ້ໄຂຄວາມທ້າທາຍຕ່າງໆໃນສະຕະວັດທີ 21 ນັບແຕ່ຄວາມຂັດແຍ່ງໄປຈົນຮອດການປ່ຽນແປງສະພາບດິນຟ້າອາກາດ ແລະ ສິດທິມະນຸດ. ເຖິງວ່າມີການຄັດຄ້ານໃນໄລຍະສຸດທ້າຍ ຈາກກຸ່ມປະເທດທີ່ນໍາໂດຍຣັດເຊຍກໍຕາມ.
ທ່ານ ອັນໂຕນິໂອ ກູເຕເຣສ ເລຂາທິການ UN ແລະ ຜູ້ຈັດກອງປະຊຸມສຸດຍອດແຫ່ງອະນາຄົດ ເອີ້ນກອງປະຊຸມຄັ້ງນີ້ວ່າເປັນໂອກາດຄັ້ງໜຶ່ງໃນຊົ່ວອາຍຸຄົນ ໃນການປ່ຽນແປງປະຫວັດສາດມະນຸດ ດ້ວຍການຈຸດປະກາຍການຮ່ວມມືລະຫວ່າງກັນຂຶ້ນໃໝ່.
ໃນກອງປະຊຸມດັ່ງກ່າວ ເຊິ່ງມີຂຶ້ນກ່ອນການປະກອບຄໍາຄິດຄໍາເຫັນຂອງເຈົ້າໜ້າທີ່ລະດັບສູງ ໃນກອງປະຊຸມສະມັດຊາສະຫະປະຊາຊາດ (UNGA) ສະໄໝສາມັນ ຄັ້ງທີ 79 ຈະເລີ່ມຂຶ້ນໃນວັນທີ 24 ກັນຍານີ້, ບັນດາຜູ້ນໍາຈາກຫລາຍສິບປະເທດ ມາລວມກັນເພື່ອລົງນາມໃນຂໍ້ຕົກລົງເພື່ອອະນາຄົດ ໂດຍໃຫ້ຄໍາໝັ້ນວ່າຈະສົ່ງເສີມລະບົບຫະພຸພາຄີ ເພື່ອກ້າວທັນໂລກທີ່ປ່ຽນແປງ ລວມທັງປົກປ້ອງຄວາມຕ້ອງການ ແລະ ຜົນປະໂຫຍດຂອງຄົນໃນປັດຈຸບັນ ແລະ ອະນາຄົດ ເຊິ່ງຜະເຊີນວິກິດຢ່າງຕໍ່ເນື່ອງ.
ທັງນີ້, ຂໍ້ຕົກລົງດັ່ງກ່າວລະບຸເຖິງການດໍາເນີນງານ 56 ປະການ ບໍ່ວ່າຈະເປັນ ພັນທະກໍລະນີຕໍ່ການຮ່ວມມືລະດັບພະຫຸພາຄີ, ການສະໜັບສະໜູນກົດບັດ UN ແລະ ການຮັກສາສັນຕິພາບ ຕະຫລອດຈົນຮຽກຮ້ອງໃຫ້ມີການປະຕິຮູບສະຖາບັນການເງິນສາກົນ ແລະ ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ຄຽງຄູ່ກັບຄວາມພະຍາຍາມຄັ້ງໃໝ່ໃນການຕໍ່ສູ້ການປ່ຽນແປງສະພາບດິນຟ້າອາກາດ, ການສົ່ງເສີມການຫລຸດອາວຸດ ແລະ ການຊີ້ນໍາການພັດທະນາປັນຍາປະດິດ (AI).
ການຮັບຮອງຂໍ້ຕົກລົງປະສົບຄວາມຊັກຊ້າ ເນື່ອງຈາກທ່ານ ເຊີເກ ເວີຊິິນິນ ລັດຖະມົນຕີກະຊວງການຕ່າງປະເທດຣັດເຊຍ ສະເໜີໃຫ້ມີການແກ້ໄຂຂໍ້ຕົກລົງ ໂດຍເນັ້ນເຖິງຫລັກການບໍ່ແຊກແຊງກິດຈະການພາຍໃນຂອງລັດ ແລະ ຮຽກຮ້ອງໃຫ້ UN ຫລີກລ່ຽງຄວາມພະຍາຍາມທີ່ຊໍ້າຊ້ອນ.
ເຖິງວ່າການຄັດຄ້ານຂອງຣັດເຊຍໄດ້ຮັບການສະໜັບສະໜູນຈາກປະເທດພັນທະມິດຄື: ເບລາຣຸສ, ສປປ ເກົາຫລີ, ອີຣານ, ນິກາຣາກົວ ແລະ ຊີເຣຍ, ແຕ່ຂໍ້ສະເໜີແກ້ໄຂຖືກປັດຕົກ ດ້ວຍຍັດຕິບໍ່ດໍາເນີນການໃດໆ.
ລະຫວ່າງການເຈລະຈາ, ທ່ານ ກູເຕເຣສ ຮຽກຮ້ອງໃຫ້ປະເທດຕ່າງໆ ສະແດງວິໄສທັດ ແລະ ຄວາມກ້າຫານ ລວມທັງຄວາມທະເຍີທະຍານສູງສຸດ ເພື່ອເພີ່ມຄວາມແຂງແຮງຂອງສະຖາບັນສາກົນ ເຊິ່ງປະສົບບັນຫາໃນການຕອບສະໜອງຕໍ່ໄພຄຸກຄາມໃນປັດຈຸບັນຢ່າງມີປະສິດທິພາບ.
