ອິດສະລາແອນ-ແຮັດໂບລາ ປະທະເດືອດ ຍົກລະດັບຄວາມຮຸນແຮງຫລາຍສຸດໃນຮອບປີ
ໃນໄລຍະ 48 ຊົ່ວໂມງຜ່ານມາ ການປະທະກັນລະຫວ່າງອິດສະລາແອນ ແລະ ກຸ່ມແຮັດໂບລາທະວີຄວາມຮຸນແຮງຂຶ້ນເຖິງລະດັບສູງສຸດ ນັບແຕ່ສົງຄາມຢູ່ເຂດກາຊາດໍາເນີນເກືອບປີ ໂດຍກຸ່ມແຮັດໂບລາທີ່ມີຖານທີ່ໝັ້ນຢູ່ທາງພາກໃຕ້ຂອງລີບັງຍິງລູກສອນໄຟເລິກເຂົ້າໄປໃນດິນແດນອິດສະລາແອນ ເຊິ່ງຫລາຍກວ່າທຸກຄັ້ງທີ່ເຄີຍມີມາ.
ທັງນີ້, ໃນວັນທີ 21 ກັນຍາຜ່ານມາ, ອິດສະລາແອນເປີດການໂຈມຕີເປົ້າໝາຍຂອງແຮັດໂບລາ 300 ກວ່າຄັ້ງ ໂດຍອ້າງວ່າເປັນການດໍາເນີນການທາງບຸກ ເພື່ອປ້ອງກັນການໂຈມຕີທີ່ແຮັດໂບລາວາງແຜນໄວ້. ຂະນະທີ່ແຮັດໂບລາຕອບໂຕ້ດ້ວຍການຍິງຈະຫລວດ ແລະ ອາວຸດອື່ນໆໃສ່ອິດສະລາແອນ ໂດຍລະບຸວ່າເປັນການລ້າງແຄ້ນຈາກການໂຈມຕີຂອງອິດສະລາແອນຢູ່ລີບັງ.
ແຮັດໂບລາ ເຊິ່ງເປັນກຸ່ມຕິດອາວຸດທີ່ໄດ້ຮັບການສະໜັບສະໜູນຈາກອີຣານ ກໍາລັງຜະເຊີນການສູນເສຍຢ່າງໜັກ ພາຍຫລັງການໂຈມຕີດ້ວຍການຝັງລະເບີດໃນເພຈເຈີ ແລະ ວິທະຍຸສື່ສານຂອງສະມາຊິກກຸ່ມ ແລະ ການໂຈມຕີທາງອາກາດຈາກອິດສະລາແອນຢູ່ທາງໃຕ້ຂອງນະຄອນຫລວງເບຣຸດ ເຊິ່ງມີຜູ້ເສຍຊີວິດຢ່າງໜ້ອຍ 45 ຄົນ ລວມທັງຜູ້ບັນຊາການລະດັບສູງ ແລະ ເຈົ້າໜ້າທີ່ສໍາຄັນຂອງກຸ່ມ.
ເຖິງວ່າຜູ້ນໍາແຮັດໂບລາຈະເຄີຍປະກາດວ່າບໍ່ຕ້ອງການຂະຫຍາຍຄວາມຂັດແຍ່ງໄປສູ່ສົງຄາມລະດັບພາກພື້ນ, ແຕ່ຜູ້ຊ່ຽວຊານຫລາຍຝ່າຍຊີ້ວ່າ: ປັດຈຸບັນແຮັດໂບລາອາດຜະເຊີນແຮງກົດດັນໃຫ້ຕ້ອງຕອບໂຕ້ໜັກຂຶ້ນ ພາຍຫລັງເກີດເຫດລະເບີດຕໍ່ເນື່ອງ ແລະ ອິດສະລາແອນກໍເລີ່ມຂະຫຍາຍເປົ້າໝາຍທາງທະຫານໄປຊາຍແດນທາງເໜືອຂອງປະເທດນໍາອີກ.
ທ່ານ ໄອແຊກ ເຮີຊ໊ອກ ປະທານາທິບໍດີຂອງອິດສະລາແອນ ໃຫ້ສໍາພາດຕໍ່ Sky News ໃນວັນທີ 22 ກັນຍາວ່າ: ອິດສະລາແອນບໍ່ຕ້ອງການເຮັດສົງຄາມກັບລີບັງ ແລະ ຕໍາໜິແຮັດໂບລາວ່າເປັນສາເຫດຂອງຄວາມຮຸນແຮງທີ່ຍົກລະດັບຂຶ້ນໃນຄັ້ງນີ້.
ເຖິງຢ່າງໃດກໍຕາມ, ເຖິງວ່າແຮັດໂບລາຈະຍອມຮັບວ່າ: ການໂຈມຕີເຮັດໃຫ້ພວກເຂົາອ່ອນແອລົງ, ແຕ່ບໍ່ມີທ່າທີວ່າຈະຍອມຖອຍ ໂດຍທ່ານ ແນມ ຄັສຊິມ ຜູ້ນໍາອັນດັບສອງຂອງກຸ່ມ ລະບຸວ່າ: ການຕໍ່ສູ້ທີ່ໄຮ້ຂີດຈໍາກັດກໍາລັງເລີ່ມຕົ້ນຂຶ້ນ.
ອ້າງອີງ:
