ອຸຕຸເຕືອນ! ລະດັບນໍ້າແມ່ນໍ້າຂອງປາກເຊ, ເຊຈໍາພອນ ແລະ ເຊບັ້ງໄຟ ເພີ່ມຂຶ້ນສູງອາດຈະເກີດນ້ຳຖ້ວມ

ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນເຝົ້າລະວັງສະພາບລະດັບນໍ້າຖ້ວມ ວັນທີ 23 ກັນຍາ 2024 ວ່າ: ຮ່ອງຄວາມກົດດັນອາກາດຕ່ຳ ຍັງຈະສືບຕໍ່ພາດຜ່ານຢູ່ພາກກາງ ແລະ ພາກໃຕ້ຂອງປະເທດລາວ, ສົມທົບກັບກະແສລົມມໍລະສຸມຕາເວັນຕົກສ່ຽງໃຕ້ພັດປົກຄຸມ. ເຊິ່ງຈະເຮັດໃຫ້ຈະມີຝົນຕົກຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ຢູ່ເກືອບທົ່ວໄປ ແລະ ຈະຕົກໜັກຢູ່ບາງທ້ອງຖິ່ນໃນແຕ່ລະພາກ ພ້ອມມີລົມພັດແຮງເປັນບາງໂອກາດ. ພ້ອມດຽວກັນນີ້ ສະພາບລະດັບນໍ້າ ແມ່ນໍ້າຂອງ ແລະ ແມ່ນໍ້າສາຂາ ຢູ່ແຂວງພາກກາງ ແລະ ພາກໃຕ້ ແມ່ນຈະສືບຕໍ່ເພີ່ມຂຶ້ນສູງ ເຊັ່ນ: ສະຖານີ ປາກເຊ, ສະຖານີຂົວເຊ ແລະ ສະຖານີແກ້ງກອກ.

ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນ ທີ່ອາໃສຢູ່ ລຽບຕາມແຄມແມ່ນໍ້າ ແລະ ເຂດພື້ນທີ່ຕໍ່າຕາມລໍານໍ້າ ແມ່ນໍ້າຂອງ ແລະ ແມ່ນໍ້າສາຂາເຊັ່ນ: ເຊຈໍາພອນ ແລະ ເຊບັ້ງໄຟ. ຈົ່ງມີສະຕິລະມັດລະວັງຕໍ່ສະພາບຝົນຕົກຕໍ່ເນື່ອງ ທີ່ອາດຈະເຮັດໃຫ້ເກີດນໍ້າຖ້ວມ. ພ້ອມທັງໃຫ້ມີສະຕິຕິດຕາມເຝົ້າລະວັງລະດັບນໍ້າແມ່ນໍ້າຂອງ ສະຖານີປາກເຊ, ນະຄອນປາກເຊ, ແຂວງຈໍາປາສັກ, ທີ່ອາດຈະເກີດມີນໍ້າຖ້ວມຍິ່ງ ແລະ ນໍ້າ ຖ້ວມຂັງ. ດັ່ງນັ້ນຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນໍ້າ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.