ອາເມລິກາອະນຸມັດວັກຊີນປ້ອງກັນໄຂ້ຫວັດໃຫຍ່ແບບສະເປສີດໃສ່ດັງ

      ໃນວັນທີ 20 ກັນຍາຜ່ານມາ, ຄະນະກໍາມະການອາຫານ ແລະ ຢາ (FDA) ຂອງອາເມລິກາ ອະນຸມັດວັກຊີນປ້ອງກັນໄຂ້ຫວັດໃຫຍ່ແບບສະເປສີດໃສ່ດັງສໍາລັບນໍາໃຊ້ດ້ວຍຕົນເອງເປັນຄັ້ງທໍາອິດ.

     ນັບແຕ່ລະດູໃບໄມ້ຫລົ່ນປີໜ້າເປັນຕົ້ນໄປ ວັກຊີນ FluMist ຂອງບໍລິສັດ ແອສຕຣາເຊເນກາ ຜູ້ຜະລິດຢາລາຍໃຫຍ່ຂອງໂລກຈາກອັງກິດ ຈະວາງຈໍາໜ່າຍໃຫ້ຊາວອາເມລິກາທົ່ວໄປ ຜ່ານຮ້ານຂາຍຢາອອນລາຍ.

     “ການອະນຸມັດວັກຊີນປ້ອງກັນໄຂ້ຫວັດໃຫຍ່ຊະນິດທໍາອິດ ສໍາລັບນໍາໃຊ້ດ້ວຍຕົນເອງ ຫລື ສໍາລັບຜູ້ເບິ່ງຄົນປ່ວຍໃນຄັ້ງນີ້ຖືເປັນທາງເລືອກໃໝ່ໃນການຮັບວັກຊີນປ້ອງກັນໄຂ້ຫວັດໃຫຍ່ຕາມລະດູການທີ່ປອດໄພ ແລະ ມີປະສິດທິພາບ ເຊິ່ງອາດມີຄວາມສະດວກ, ຄວາມຫົດຢືດ ແລະ ການເຂົ້າເຖິງໄດ້ຫລາຍຂຶ້ນສໍາລັບບຸກຄົນ ແລະ ຄອບຄົວ” ທ່ານ ປີເຕີ ມາຣກ ເຈົ້າໜ້າທີ່ອາວຸໂສຂອງ FDA ກ່າວ.

     ທັງນີ້, ຜູ້ທີ່ມີອາຍຸຫລາຍກວ່າ 18 ປີ ຈະໄດ້ຮັບອະນຸຍາດໃຫ້ໃຊ້ວັກຊີນດັ່ງກ່າວສໍາລັບຕົນເອງ ຫລື ຜູ້ອື່ນ ໂດຍວັກຊີນແບບສະເປສີດໃສ່ດັງນີ້ ໄດ້ຮັບການອະນຸມັດໃຫ້ໃຊ້ນໍາຜູ້ທີ່ມີອາຍຸແຕ່ 2 ປີ ຫາ 49 ປີ.