ຜູ້ເສຍຊີວິດຈາກນໍ້າຖ້ວມຄັ້ງໃຫຍ່ຢູ່ມຽນມາເພີ່ມຂຶ້ນເກີນ 300 ຄົນ ປະຊາຊົນຍັງລໍຖ້າການຊ່ວຍເຫລືອ
ຈໍານວນຜູ້ເສຍຊີວິດຈາກອຸທົກກະໄພຄັ້ງໃຫຍ່ຢູ່ມຽນມາເພີ່ມເປັນ 300 ກວ່າຄົນ, ຂະນະທີ່ປະຊາຊົນ 800,000 ກວ່າຄົນ ຍັງລໍຖ້າການຊ່ວຍເຫລືອຈາກໜ່ວຍງານທີ່ກ່ຽວຂ້ອງ.
ກະຊວງຂ່າວສານມຽນມາລາຍງານຈໍານວນຜູ້ເສຍຊີວິດຈາກອຸທົກກະໄພຄັ້ງໃຫຍ່ ເຊິ່ງເປັນຜົນມາຈາກອິດທິພົນຂອງພາຍຸຢາກິໃນເດືອນນີ້ເພີ່ມເປັນຢ່າງໜ້ອຍ 384 ຄົນ, ແຕ່ຍັງມີຜູ້ສູນຫາຍອີກຢ່າງໜ້ອຍ 89 ຄົນ ຈຶ່ງມີຄວາມເປັນໄປໄດ້ສູງວ່າຈໍານວນຜູ້ເສຍຊີວິດຈະເພີ່ມຂຶ້ນອີກ.
ຂະນະທີ່ຂໍ້ມູນໂດຍສໍານັກງານເພື່ອການປະສານງານດ້ານມະນຸດສະທໍາແຫ່ງສະຫະປະຊາຊາດ (OCHA) ຄາດຄະເນຈໍານວນປະຊາຊົນປະມານ 887,000 ຄົນຢູ່ມຽນມາ ກໍາລັງປະສົບຄວາມເດືອດຮ້ອນຈາກອຸທົກກະໄພຄັ້ງນີ້ ແລະ ຕ້ອງການການຊ່ວຍເຫລືອດ້ານມະນຸດສະທໍາຢ່າງຮີບດ່ວນ.
ຢ້ອນກັບໄປໃນປີ 2008 ມຽນມາໄດ້ຮັບຄວາມເສຍຫາຍຢ່າງຮຸນແຮງຈາກອິດທິພົນຂອງພາຍຸໄຊໂຄນນາກິດ ເຊິ່ງຂ້າຊີວິດປະຊາຊົນບໍ່ຕໍ່າກວ່າ 138,000 ຄົນ, ທໍາອິດລັດຖະບານທະຫານມຽນມາໃນເວລານັ້ນຢືນຢັນປະຕິເສດການຊ່ວຍເຫລືອຈາກຕ່າງປະເທດ, ແຕ່ຍິນຍອມໃນເວລາຕໍ່ມາ ພາຍຫລັງຖືກກົດດັນຢ່າງໜັກຈາກຫລາຍຝ່າຍ.
