ອິດສະລາແອນຖະຫລົ່ມພາກໃຕ້ຂອງລີບັງ ພາຍຫລັງໂຈມຕີນະຄອນຫລວງເບຣຸດມີຜູ້ເສຍຊີວິດແລ້ວ 37 ຄົນ
ສະຖານະການຕາມຊາຍແດນລະຫວ່າງອິດສະລາແອນກັບລີບັງເຄັ່ງຕຶງຂຶ້ນອີກ ພາຍຫລັງມີຜູ້ເສຍຊີວິດຢ່າງໜ້ອຍ 37 ຄົນ ຈາກເຫດການອິດສະລາແອນໂຈມຕີນະຄອນຫລວງເບຣຸດ ເພື່ອສັງຫານແກນນໍາກຸ່ມແຮັດໂບລາ.
ກອງທັບອິດສະລາແອນອອກຖະແຫລງການວ່າ: ເຮືອບິນຮົບຫລາຍລໍາຂອງກອງທັບອາກາດປະຕິບັດການໂຈມຕີເປັນວົງກວ້າງໃນເຂດທາງໃຕ້ຂອງລີບັງ ໃນວັນທີ 21 ກັນຍາຜ່ານມາ ເພື່ອກໍາຈັດໄພຄຸກຄາມທີ່ຈະເກີດຂຶ້ນຕໍ່ພົນລະເມືອງອິດສະລາແອນ ໂດຍຍັງບໍ່ມີການໃຫ້ຂໍ້ມູນເພີ່ມຕື່ມ, ແຕ່ມີການອອກຄໍາສັ່ງຈໍາກັດການລວມຕົວຂອງປະຊາຊົນຢູ່ເມືອງໄຮຟາ ເຊິ່ງເປັນເມືອງຂະໜາດໃຫຍ່ທີ່ສຸດທາງເໜືອຂອງປະເທດ.
ປະຕິບັດການດັ່ງກ່າວເກີດຂຶ້ນພຽງວັນດຽວ ພາຍຫລັງອິດສະລາແອນປະຕິບັດການໂຈມຕີທາງອາກາດ ທໍາລາຍເປົ້າໝາຍຢູ່ທາງພາກໃຕ້ຂອງນະຄອນຫລວງເບຣຸດ ໃນວັນທີ 20 ກັນຍາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 37 ຄົນ ລວມທັງສະມາຊິກອາວຸໂສສອງຄົນຂອງກຸ່ມແຮັດໂບລາ.
ຂະນະດຽວກັນ, ກອງທັບອິດສະລາແອນຢືນຢັນວ່າ: ມີການຍິງຈະຫລວດຫລາຍກວ່າ 90 ລູກ ອອກຈາກລີບັງມາໃສ່ຖານປະຈໍາການ 11 ແຫ່ງ ຂອງທະຫານອິດສະລາແອນທີ່ກະຈາຍຢູ່ທາງເໜືອຂອງປະເທດ.
ທ່ານ ນາຈິບ ມິກາຕີ ນາຍົກລັດຖະມົນຕີລີບັງ ປະນາມການສັງຫານໝູ່ຂອງອິດສະລາແອນ ແລະ ຍົກເລີກກໍານົດການເຂົ້າຮ່ວມກອງປະຊຸມສະມັດຊາສະຫະປະຊາຊາດ (UNGA) ຢູ່ນະຄອນນິວຢອກຂອງອາເມລິກາ. ຂະນະທີ່ທ່ານ ອັນໂຕນິໂອ ກູເຕເຣສ ເລຂາທິການສະຫະປະຊາຊາດ (UN) ຮຽກຮ້ອງຄູ່ກໍລະນີທຸກຝ່າຍຢຸດການໃຊ້ຄວາມຮຸນແຮງຕໍ່ກັນ.
ສ່ວນກະຊວງການຕ່າງປະເທດອາເມລິກາຂໍໃຫ້ພົນລະເມືອງຂອງຕົນ ເດີນທາງອອກຈາກລີບັງໃນໄລຍະນີ້ ເຊິ່ງເປັນເວລາທີ່ບໍລິການຖ້ຽວບິນການຄ້າສ່ວນຫລາຍຍັງໃຫ້ບໍລິການ.
ທັງນີ້, ອິດສະລາແອນ ແລະ ກຸ່ມແຮັດໂບລາ ເຊິ່ງມີຖານທີ່ໝັ້ນຢູ່ທາງໃຕ້ຂອງລີບັງ ໂຈມຕີຕອບໂຕ້ກັນ ນັບແຕ່ສົງຄາມຢູ່ເຂດກາຊາເລີ່ມຂຶ້ນໃນວັນທີ 7 ຕຸລາ 2023.
ເຖິງຢ່າງໃດກໍຕາມ, ສະຖານະການທະວີຄວາມຮຸນແຮງຂຶ້ນ ນັບແຕ່ເດືອນສິງຫາຜ່ານມາ ແລະ ເຄັ່ງຕຶງຂຶ້ນອີກ ເມື່ອເກີດເຫດການເພຈເຈີ ແລະ ວິທະຍຸສື່ສານຈໍານວນຫລາຍຂອງກຸ່ມແຮັດໂບລາ ລະເບີດພ້ອມກັນໃນວັນທີ 17 ກັນຍາ ແລະ 18 ກັນຍາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດລວມກັນຢ່າງໜ້ອຍ 37 ຄົນ ແລະ ໄດ້ຮັບບາດເຈັບອີກ 3,000 ກວ່າຄົນ ພາຍຫລັງເກີດເຫດກຸ່ມແຮັດໂບລາກ່າວຫາອິດສະລາແອນວ່າຢູ່ເບື້ອງຫລັງ.
