ອິດສະລາແອນສັງຫານຜູ້ບັນຊາການລະດັບສູງແຮັດໂບລາໃນປະຕິບັດການໂຈມຕີທາງອາກາດນະຄອນຫລວງເບຣຸດ
ອິດສະລາແອນເດີນໜ້າໂຈມຕີທາງອາກາດໃນນະຄອນຫລວງເບຣຸດຂອງລີບັງໃນວັນທີ 20 ກັນຍາ ໂດຍກອງທັບອິດສະລາແອນ ແລະ ແຫລ່ງຂ່າວຄວາມໝັ້ນຄົງຢູ່ລີບັງຢືນຢັນວ່າ: ທ່ານ ອິບຣາຮິມ ເອຄິລ ຜູ້ບັນຊາການຄົນສໍາຄັນຂອງລີບັງ ແລະ ຜູ້ນໍາລະດັບສູງອີກຫລາຍຄົນ ຖືກສັງຫານ.
ໃນປະຕິບັດການທາງທະຫານຄັ້ງນີ້ ກະຊວງສາທາລະນະສຸກລີບັງລະບຸວ່າ: ມີຜູ້ເສຍຊີວິດຢ່າງໜ້ອຍ 14 ຄົນ ແລະ ຄາດວ່າຕົວເລກຈະເພີ່ມສູງຂຶ້ນອີກ. ຂະນະທີ່ທີມກູ້ໄພຍັງຄົ້ນຫາຜູ້ລອດຊີວິດ ແລະ ຜູ້ເສຍຊີວິດເພີ່ມອີກ.
ໃນຖະແຫລງການຂອງແຮັດໂບລາໄດ້ເລົ່າປະຫວັດຂອງຜູ້ບັນຊາການ ເອຄິລ ທີ່ເສຍຊີວິດໃນເຂດຊານເມືອງດາຮິເຢ ໂດຍຍັງບໍ່ແນ່ນອນວ່າຕົວເລກຜູ້ເສຍຊີວິດດັ່ງກ່າວລວມທ່ານ ເອຄິລ ຫລື ຍັງ.
ກ່ອນໜ້ານີ້ມີຄວາມກັງວົນວ່າ: ການໂຈມຕີຫລາຍຮອບໃນອາທິດຜ່ານມາ ລວມທັງກໍລະນີການໂຈມຕີດ້ວຍລະເບີດທີ່ຝັງຢູ່ໃນເພຈເຈີ ແລະ ວິທະຍຸສື່ສານ ຈະເຮັດໃຫ້ສະຖານະການຢູ່ຕາເວັນອອກກາງເຄັ່ງຕຶງຂຶ້ນ ແລະ ສ່ຽງເຮັດໃຫ້ສົງຄາມຂະຫຍາຍວົງກວ້າງ ໂດຍມີຕົວສະແດງອື່ນທີ່ໜຸນຫລັງແຮັດໂບລາເຊັ່ນ: ອີຣານ ອາດເຂົ້າມາກ່ຽວຂ້ອງນໍາ.
ຫລ້າສຸດກຸ່ມຕິດອາວຸດຊີອະຢູ່ອີຣັກປະກາດວ່າ: ຈະແກ້ແຄ້ນໃຫ້ຜູ້ທີ່ເສຍຊີວິດຈາກການໂຈມຕີຂອງອິດສະລາແອນ.
ທັງນີ້, ອິດສະລາແອນ ແລະ ແຮັດໂບລາ ເລີ່ມໂຈມຕີກັນໄປມານັບແຕ່ວັນທີ 8 ຕຸລາ 2023 ພາຍຫລັງເກີດເຫດຮາມັດໂຈມຕີອິດສະລາແອນຄັ້ງໃຫຍ່ໃນວັນທີ 7 ຕຸລາ ໂດຍແຮັດໂບລາຖືເປັນພັນທະມິດສໍາຄັນຂອງກຸ່ມຮາມັດຢູ່ກາຊາ ແລະ ສະໜັບສະໜູນໃຫ້ປາແລັສຕິນເປັນລັດອິດສະຫລະ.
ຂະນະທີ່ປະຕິບັດການທາງທະຫານຂອງອິດສະລາແອນຮອບນີ້ມີຈຸດປະສົງເພື່ອສ້າງຄວາມປອດໄພໃຫ້ເຂດຊາຍແດນທາງເໜືອທີ່ຕິດກັບລີບັງ. ຂະນະທີ່ນັກວິເຄາະເຕືອນວ່າ: ມີຄວາມເປັນໄປໄດ້ທີ່ອິດສະລາແອນອາດບຸກເຂົ້າຢຶດຄອງເຂດທາງໃຕ້ຂອງລີບັງ ເພື່ອໃຊ້ເປັນບ່ອນກໍາບັງ ແລະ ໃຫ້ຊາວຢິວກັບໄປຕັ້ງຖິ່ນຖານ ເຊິ່ງອາດເຮັດໃຫ້ສະຖານະການຮ້າຍແຮງຂຶ້ນ.
ອ້າງອີງ:
- https://edition.cnn.com/world/live-news/lebanon-explosions-hezbollah-israel-09-20-24-intl-hnk/index.html
- https://www.reuters.com/world/middle-east/un-peacekeepers-lebanon-urge-de-escalation-after-heavy-airstrikes-2024-09-20/
