ອິດສະລາແອນຖະຫລົ່ມຖານຍິງຈະຫລວດ 100 ແຫ່ງຢູ່ລີບັງ ຕອບໂຕ້ກຸ່ມແຮັດໂບລາ
ກອງທັບອິດສະລາແອນຢືນຢັນວ່າ: ສາມາດທໍາລາຍຖານຍິງຈະຫລວດຈໍານວນຫລາຍຂອງກຸ່ມແຮັດໂບລາ ໂດຍຍັງບໍ່ມີການກ່າວເຖິງເຫດການອຸປະກອນສື່ສານລະເບີດຢູ່ລີບັງ.
ກອງທັບອິດສະລາແອນອອກຖະແຫລງການກ່ຽວກັບຜົນຂອງປະຕິບັດການໂຈມຕີທາງອາກາດໃນພື້ນທີ່ທາງໃຕ້ຂອງລີບັງ ໃນວັນທີ 19 ກັນຍາຜ່ານມາວ່າ: ສາມາດທໍາລາຍຖານຍິງຈະຫລວດຂອງກຸ່ມແຮັດໂບລາປະມານ 100 ແຫ່ງ ເຊິ່ງສາມາດຍິງຈະຫລວດໄດ້ລວມກັນປະມານ 1,000 ລູກ.
ທັງນີ້, ຖະແຫລງການຂອງກອງທັບອິດສະລາແອນເນັ້ນວ່າ: ຈະເດີນໜ້າໂຈມຕີໂຄງລ່າງພື້ນຖານຂອງກຸ່ມແຮັດໂບລາຕໍ່ໄປ ເພື່ອທໍາລາຍປະສິດທິພາບຂອງອີກຝ່າຍ ຈາກການກໍ່ການຮ້າຍກັບອິດສະລາແອນ.
ການເຄື່ອນໄຫວດັ່ງກ່າວຂອງກອງທັບອິດສະລາແອນເກີດຂຶ້ນ ພາຍຫລັງກຸ່ມແຮັດໂບລາຍິງຈະຫລວດຫລາຍສິບລູກຂ້າມແດນຈາກພາກໃຕ້ຂອງລີບັງໄປພາກເໜືອຂອງອິດສະລາແອນ ພາຍຫລັງເກີດເຫດເພຈເຈີ ແລະ ວິທະຍຸສື່ສານຈໍານວນຫລາຍ ເຊິ່ງເປັນເຄື່ອງມືຕິດຕໍ່ຫລັກຂອງກຸ່ມແຮັດໂບລາ ລະເບີດພ້ອມກັນ ໃນວັນທີ 17 ແລະ 18 ກັນຍາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດລວມກັນຢ່າງໜ້ອຍ 37 ຄົນ ແລະ ມີຜູ້ໄດ້ຮັບບາດເຈັບລວມກັນ 3,000 ກວ່າຄົນ.
ຮອດປັດຈຸບັນ, ອິດສະລາແອນຍັງປະຕິເສດໃຫ້ຄວາມເຫັນຢ່າງເປັນທາງການ, ແຕ່ທ່ານ ໂຢອາບ ກັລລັນ ລັດຖະມົນຕີປ້ອງກັນປະເທດຂອງອິດສະລາແອນ ກ່າວເມື່ອບໍ່ດົນມານີ້ວ່າ: ແຮງໂນ້ມຖ່ວງຂອງສົງຄາມງ່ຽງໄປທາງເໜືອຂອງອິດສະລາແອນແລ້ວ ທີ່ໝາຍເຖິງພາກໃຕ້ຂອງລີບັງ ເຊິ່ງເປັນຖານທີ່ໝັ້ນຂອງກຸ່ມແຮັດໂບລາ ແລະ ມີຊາຍແດນຕິດກັບພາກເໜືອຂອງອິດສະລາແອນ.
