ກໍາປູເຈຍ-ມາເລເຊຍ ໃຊ້ລະບົບເຊື່ອມຕໍ່ຊໍາລະເງິນຜ່ານ QRCode ຂ້າມແດນ

     ກໍາປູເຈຍ ແລະ ມາເລເຊຍ ເປີດຕົວລະບົບເຊື່ອມຕໍ່ການຊໍາລະເງິນຂ້າມແດນຜ່ານ QR code.

     ທ່ານ ເຈຍ ສະເຣຍ ຜູ້ວ່າການທະນາຄານກາງກໍາປູເຈຍ ກ່າວວ່າ: ຕໍ່ຈາກນີ້ ຊາວມາເລເຊຍ ແລະ ຊາວກໍາປູເຈຍ ຈະສາມາດຊໍາລະເງິນຂ້າມແດນໄດ້ແລ້ວ ຜ່ານແອັບພິເຄຊັນບາກອງ (Bakong) ຫລື ເມແບງ ເອັມ2ຢູ ເຄເຮັສ (Maybamk M2U KH) ຂອງກໍາປູເຈຍ  ແລະ ດູອິດນາວ ຄິວອາຣ (DuitNow QR) ຂອງເພເນັດ ເຄືອຂ່າຍການຊໍາລະເງິນໃນມາເລເຊຍ.

     ການເຊື່ອມຕໍ່ໄລຍະທໍາອິດຈະເອື້ອອໍານວຍໃຫ້ນັກທ່ອງທ່ຽວກໍາປູເຈຍຊໍາລະເງິນໄດ້ຢ່າງມີປະສິດທິພາບ ແລະ ປອດໄພຍິ່ງຂຶ້ນ ຜ່ານການໃຊ້ແອັບບາກອງ ຫລື ເອັມ2ຢູ ເຄເຮັສ ເພື່ອສະແກນ ແລະ ຊໍາລະເງິນຢູ່ຮ້ານຄ້າ 2 ລ້ານກວ່າແຫ່ງ ທີ່ສະແດງສັນຍາລັກດູອິດນາວ ອິວອາຣ ຂອງເພເນັດ ເຊິ່ງເປັນລະບົບຊໍາລະເງິນຜ່ານຄິວອາຣໂຄ໊ດລະດັບປະເທດຂອງມາເລເຊຍ ໂດຍໃຊ້ສະກຸນເງິນຣຽວກໍາປູເຈຍ ເປັນສະກຸນເງິນຕົ້ນຕໍໃນການເຮັດທຸລະກໍາ.

    ສໍາລັບໄລຍະຕໍ່ໄປ ປະຊາຊົນຢູ່ມາເລເຊຍຈະສາມາດໃຊ້ແອັບພິເຄຊັນຂອງທະນາຄານການຄ້າທີ່ເຂົ້າຮ່ວມ ເພື່ອສະແກນເຄເຮັສຄິວອາຣໂຄ໊ດ (KHQR Codes) ຕາມຮ້ານຄ້າໃນກໍາປູເຈຍທີ່ເຂົ້າຮ່ວມໂຄງການ.

     ທັງນີ້, ທະນາຄານກາງກໍາປູເຈຍໃຫ້ຄວາມເຫັນວ່າ: ລະບົບໃໝ່ນີ້ຈະມີບົດບາດສໍາຄັນໃນການສົ່ງເສີມການທ່ອງທ່ຽວ, ກະຕຸ້ນກິດຈະກໍາການຄ້າ ແລະ ພັດທະນາການເຂົ້າເຖິງບໍລິການທາງການເງິນໃນສອງປະເທດ. ອີກທັງຖືເປັນບາດກ້າວສໍາຄັນໃນການບັນລຸລະບົບການຊໍາລະເງິນທີ່ວ່ອງໄວ, ມີປະສິດທິພາບ, ປອດໄພ ແລະ ເຊື່ອມໂຍງກັນທົ່ວພາກພື້ນອາຊຽນ.

     ນອກຈາກມາເລເຊຍແລ້ວ, ກໍາປູເຈຍຍັງເປີດຕົວໂຄງການຊໍາລະເງິນຂ້າມແດນຜ່ານຄິວອາຣໂຄ໊ດທະວີພາຄີກັບປະເທດພັນທະມິດຫລາຍປະເທດເຊັ່ນ: ໄທ, ຫວຽດນາມ, ລາວ, ຈີນ ແລະ ສ.ເກົາຫລີ.