ວິທະຍຸສື່ສານຂອງແຮັດໂບລາລະເບີດທົ່ວລີບັງ ມີຜູ້ເສຍຊີວິດແລ້ວ 20 ຄົນ ບາດເຈັບ 450 ກວ່າຄົນ
ມີຜູ້ເສຍຊີວິດຢ່າງໜ້ອຍ 20 ຄົນ ແລະ ໄດ້ຮັບບາດເຈັບອີກ 450 ກວ່າຄົນ ຈາກເຫດການວິທະຍຸສື່ສານຂອງກຸ່ມແຮັດໂບລາລະເບີດພ້ອມກັນຕາມພື້ນທີ່ຫລາຍແຫ່ງຂອງລີບັງ.
ວັນທີ 19 ກັນຍາ, ກະຊວງສາທາລະນະສຸກລີບັງ ລາຍງານການເກີດເຫດວິທະຍຸສື່ສານລະເບີດພ້ອມກັນໃນພື້ນທີ່ຫລາຍແຫ່ງຂອງປະເທດ ໃນວັນທີ 18 ກັນຍາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 20 ຄົນ ແລະ ມີຜູ້ໄດ້ຮັບບາດເຈັບອີກ 450 ກວ່າຄົນ.
ຂະນະທີ່ແຫລ່ງຂ່າວລະດັບສູງໃນກຸ່ມແຮັດໂບລາກ່າວວ່າ: ການລະເບີດສ່ວນຫລາຍເກີດຂຶ້ນຕາມຖານທີ່ໝັ້ນຂອງກຸ່ມແຮັດໂບລາ ຄືຢູ່ພາກໃຕ້, ພາກຕາເວັນອອກຂອງລີບັງ ແລະ ບາງເຂດຂອງນະຄອນຫລວງເບຣຸດ ໂດຍວິທະຍຸສື່ສານທີ່ສະມາຊິກກຸ່ມແຮັດໂບລາໃຊ້ ເກີດລະເບີດພ້ອມກັນ.
ເຫດການດັ່ງກ່າວເກີດຂຶ້ນພຽງວັນດຽວ ພາຍຫລັງເພຈເຈີຫລາຍຮ້ອຍເຄື່ອງທີ່ມີການນໍາໃຊ້ຢູ່ລີບັງ ເຊິ່ງເປັນໜຶ່ງໃນອຸປະກອນສື່ສານທີ່ກຸ່ມແຮັດໂບລານິຍົມໃຊ້ ເພື່ອຫລີກລ່ຽງການດັກຟັງສັນຍານ ລະເບີດພ້ອມກັນ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 12 ຄົນ ສ່ວນຫລາຍເປັນສະມາຊິກກຸ່ມແຮັດໂບລາ ລວມທັງເດັກນ້ອຍເພດຍິງອາຍຸ 10 ປີ ທີ່ເປັນລູກຂອງໜຶ່ງໃນສະມາຊິກກຸ່ມແຮັດໂບລາ ແລະ ມີຜູ້ໄດ້ຮັບບາດເຈັບ 2,800 ຄົນ.
ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ (UN) ຮຽກຮ້ອງຄູ່ກໍລະນີທຸກຝ່າຍອົດກັ້ນ ແລະ ຫລີກລ່ຽງການໃຊ້ຄວາມຮຸນແຮງຕອບໂຕ້ກັນ ແລະ ທ່ານ ຈອນ ເຄີບີ ໂຄສົກສະພາຄວາມໝັ້ນຄົງແຫ່ງຊາດອາເມລິກາ ກ່າວວ່າ: ການຍົກລະດັບ ຫລື ຂະຫຍາຍຂອບເຂດປະຕິບັດການທາງທະຫານ ບໍ່ອາດຊ່ວຍຫລຸດຜ່ອນຄວາມຂັດແຍ່ງ ແລະ ວິກິດທັງໝົດໄດ້.
ເຖິງວ່າອິດສະລາແອນຍັງບໍ່ມີຄວາມເຫັນຕໍ່ທັງສອງເຫດການ. ເຖິງຢ່າງໃດກໍຕາມ, ນາຍົກລັດຖະມົນຕີ ເບນຈາມິນ ເນທັນຢາຮູ ຜູ້ນໍາອິດສະລາແອນ ກ່າວວ່າ: ຄະນະລັດຖະມົນຕີຄວາມໝັ້ນຄົງທາງການເມືອງ ມີມະຕິຂະຫຍາຍເປົ້າໝາຍສົງຄາມ ວ່ານອກເໜືອຈາກການກວາດລ້າງກຸ່ມຮາມັດຢູ່ເຂດກາຊາ, ຊາຍແດນທາງເໜືອຂອງອິດສະລາແອນທີ່ຕິດກັບລີບັງຕ້ອງປອດໄພເຊັ່ນກັນ ເພື່ອໃຫ້ປະຊາຊົນທີ່ອົບພະຍົບອອກໄປກ່ອນໜ້ານັ້ນ ສາມາດກັບເຂົ້າໄປອາໄສໄດ້ຄືເກົ່າ.
ອີກດ້ານໜຶ່ງ, ບໍລິສັດໂກລ ອະພໍໂລ ຂອງໄຕ້ຫວັນ ແລະ ບໍລິສັດບີເອຊີ ຄອນຊໍຕິງ ເຄເອັຟທີ ເຊິ່ງເປັນພັນທະມິດຢູ່ຮົງກາລີຂອງໂກລ ອະພໍໂລ ຕ່າງອອກມາປະຕິເສດວ່າ: ບໍ່ໄດ້ເປັນຜູ້ຜະລິດເພຈເຈີທີ່ລະເບີດຢູ່ລີບັງ.
