ດ່ວນ! ອັດຕະປື ແຈ້ງເຕືອນກຽມຮັບມື ພາຍຸດີເປຣຊັນ ຈະພັດຜ່ານ ວັນທີ 18-21 ກັນຍານີ້
ພະແນກຊັບພະຍາກອນທຳມະຊາດ ແລະ ສິ່ງແວວລ້ອມ ແຂວງອັດຕະປື ອອກແຈ້ງເຕືອນພາຍຸເຂດຮ້ອນ ວ່າ: ພາຍຸດີເປຣຊັນກໍາລັງເຄື່ອນທີ່ຢູ່ໃກ້ດ້ານຕາເວັນຕົກທາງພາກເໜືອຂອງປະເທດຟິລິປິນດ້ວຍຄວາມໄວ 35 ກິໂລແມັດຕໍ່ຊົ່ວໂມງ ແລະ ມຸ້ງໜ້າມາທາງທະເລຈີນໃຕ້ ຕອນກາງ ແລະ ຈະເພີ່ມກໍາລັງແຮງຂຶ້ນກາຍເປັນພາຍຸໜູນ ເຂດຮ້ອນໃນຕອນແລງຂອງມື້ນີ້, ຄາດວ່າພະຍຸຫົວນີ້ຈະເຄື່ອນທີ່ຂຶ້ນຝັ່ງຂອງ ສສ ຫວຽດນາມ ໃນວັນທີ 20 ກັນຍາ 2024, ຈາກນັ້ນຈະອອ່ນກໍາລັງລົງເປັນພາຍຸດີເປຣຊັນຈາກທ່າອ່ຽງຂອງພາຍຸດັ່ງກ່າວຈະເຮັດໃຫ້ມີຝົນຕົກໃນລະດັບ ຄ່ອຍ ຫາ ປານກາງເປັນບໍລິເວນກ້ວາງໃນແຕ່ລະພາກ ແລະ ຕົກໜັກ ຫາ ໜັກຫລາຍ ພ້ອມຈະມີລົມພັດແຮງຢູ່ບາງ ທ້ອງຖິ່ນ ໂດຍສະເພາະແຂວງອັດຕະປື.
ດັ່ງນັ້ນ, ຈຶ່ງແຈ້ງເຕືອນມາຍັງປະຊາຊົນບັນດາເຜົ່າ, ອົງການປົກຄອງ ແລະ ອົງການຈັດຕັ້ງທຸກພາກສ່ວນທົ່ວແຂວງອັດຕະປື ຈົ່ງມີສະຕິລະມັດລະວັງຕໍ່ເຫດການດັ່ງກ່າວທີ່ອາດຈະເກີດຂຶ້ນໃນຕໍ່ໜ້າ, ກຽມພ້ອມຕໍ່ສະພາບຝົນຕັກໜັກທີ່ຈະເຮັດໃຫ້ມີນໍ້າຖ້ວມຊຸ, ດິນເຈື່ອນ ແລະ ເກີດມີຕົ້ນໄມ້ໃຫຍ່ຫັກລົ້ມ ແລະ ໃຫ້ຕິດຕາມ ການລາຍງານສະພາບອາກາດເປັນປະຈໍາ.
