ພາຍຸບໍຣິສ ຂ້າຊີວິດປະຊາຊົນຢູ່ເອີຣົບກາງ-ຕາເວັນອອກ ເພີ່ມເປັນຢ່າງໜ້ອຍ 18 ຄົນ
ອິດທິພົນຂອງພາຍຸບໍຣິສ ຍັງສົ່ງຜົນກະທົບຕໍ່ສະພາບອາກາດໃນຫລາຍປະເທດທາງພາກກາງ ແລະ ຕາເວັນອອກຂອງທະວີບເອີຣົບ ແລະ ສົ່ງຜົນເຮັດໃຫ້ຈໍານວນຜູ້ເສຍຊີວິດເພີ່ມລວມກັນເປັນ 18 ຄົນແລ້ວ.
ວັນທີ 17 ກັນຍາ, ຜູ້ເສຍຊີວິດຈາກອິດທິພົນຂອງພາຍຸບໍຣິສ ເຊິ່ງເຮັດໃຫ້ເກີດລົມພັດແຮງ ແລະ ນໍ້າຖ້ວມຄັ້ງໃຫຍ່ໃນຫລາຍປະເທດຂອງທາງພາກກາງ ແລະ ຕາເວັນອອກຂອງທະວີບເອີຣົບ ເພີ່ມເປັນຢ່າງໜ້ອຍ 7 ຄົນ ໃນໂຣມາເນຍ 4 ຄົນ, ໂປໂລຍ 4 ຄົນ, ໂອຕຣິດ ແລະ ອີກຢ່າງໜ້ອຍ 3 ຄົນ ຢູ່ ສ.ເຊັກ.
ຂະນະທີ່ຢູ່ຮົງກາລີຍັງບໍ່ມີການຢືນຢັນຜູ້ເສຍຊີວິດຈາກໄພທໍາມະຊາດຄັ້ງນີ້, ແຕ່ມີລາຍງານການລະດົມກໍາລັງທະຫານຫລາຍກວ່າ 350 ຄົນ, ເພີ່ມຖົງຊາຍຕາມແຄມຝັ່ງແມ່ນໍ້າດານູບ ແລະ ສາຂາອີກຫລາຍເສັ້ນ ເນື່ອງຈາກມີທ່າອ່ຽງວ່າ ລະດັບນໍ້າຈະເພີ່ມສູງຂຶ້ນ.
ປະທານາທິບໍດີ ເຄລາ ໂຢຮັນນິສ ແຫ່ງໂຣມາເນຍ ກ່າວວ່າ: ໄພທໍາມະຊາດທີ່ເກີດຂຶ້ນໃນປະເທດ ແລະ ອີກຫລາຍພື້ນທີ່ຂອງເອີຣົບ ສະທ້ອນຜົນກະທົບຮ້າຍແຮງຮອບຫລ້າສຸດຈາກສະພາບການປ່ຽນແປງຂອງສະພາບອາກາດໂລກ ເຊິ່ງທະວີບເອີຣົບໄດ້ຮັບຜົນກະທົບນໍາ ແລະ ຮຽກຮ້ອງໃຫ້ທຸກພາກສ່ວນຍົກລະດັບການຮ່ວມມື ເພື່ອກຽມຄວາມພ້ອມຮັບມືສະພາບອາກາດປ່ຽນແປງທີ່ຈະເກີດຂຶ້ນອີກໃນອະນາຄົດ.
ຂະນະທີ່ນາຍົກລັດຖະມົນຕີ ໂດນັລ ທັສ ຜູ້ນໍາໂປໂລຍ ປະກາດຈັດສັນງົບປະມານຈາກສູນກາງ 1,000 ລ້ານສະວໍຕື ເພື່ອຊ່ວຍເຫລືອຜູ້ປະສົບໄພ ແລະ ກຽມຍື່ນເລື່ອງຂໍຮັບການພິຈາລະນາເງິນສະໜັບສະໜູນຈາກກອງທຶນສຸກເສີນຂອງສະຫະພາບເອີຣົບ (EU).
