ຫລວງພະບາງ, ຊຽງຄານ, ນະຄອນຫລວງວຽງຈັນ, ໜອງຄາຍ ນ້ຳຈະຖ້ວມ 13-17 ກັນຍາ
ຄະນະກໍາມາທິການແມ່ນໍ້າຂອງປະກາດເຕືອນລະດັບນໍ້າຢູ່ຫລວງພະບາງສູງກວ່າລະດັບນໍ້າຖ້ວມ 1 ແມັດແລ້ວ. ຂະນະທີ່ຊຽງຄານ, ນະຄອນຫລວງວຽງຈັນ ແລະ ໜອງຄາຍ ກຽມຜະເຊີນນໍ້າຖ້ວມນັບແຕ່ວັນທີ 13 ກັນຍານີ້.
ເພຈເຟສບຸກ Mekong River Commission ແຈ້ງເຕືອນຜົນການຕິດຕາມລະດັບນໍ້າໃນແມ່ນໍ້າຂອງປະຈໍາວັນທີ 12 ກັນຍາ ໂດຍລະບຸວ່າ: ລະດັບນໍ້າຢູ່ສະຖານີຫລວງພະບາງຢູ່ລະດັບ 19 ແມັດ ເຊິ່ງສູງກວ່າລະດັບນໍ້າຖ້ວມ 1 ແມັດ. ຂະນະທີ່ສະຖານີຊຽງຄານ ແລະ ໜອງຄາຍ ນໍ້າເພີ່ມສູງຂຶ້ນຈົນມາຮອດລະດັບເຕືອນໄພແລ້ວ (Alarm Level).
ພ້ອມກັນນີ້ ຍັງຄາດຄະເນວ່າ: ໃນໄລຍະ 5 ວັນຕໍ່ໜ້າ (13-17 ກັນຍາ) ລະດັບນໍ້າຢູ່ຫລວງພະບາງຈະຍັງສູງເໜືອລະດັບນໍ້າຖ້ວມຈົນຮອດວັນທີ 16 ກັນຍາ, ສ່ວນສະຖານີຊຽງຄານ ແລະ ໜອງຄາຍຄາດວ່າຈະຮອດລະດັບນໍ້າຖ້ວມໃນວັນທີ 13 ກັນຍາ. ສ່ວນສະຖານີນະຄອນຫລວງວຽງຈັນຄາດວ່າຈະຮອດລະດັບນໍ້າຖ້ວມວັນທີ 14 ກັນຍາ. ຂະນະທີ່ສະຖານີປາກຊັນ ແລະ ນະຄອນພະນົມຄາດວ່ານໍ້າຈະຮອດລະດັບເຕືອນໄພໃນວັນທີ 16 ກັນຍາ.
ສ່ວນໃນໄລຍະ 24 ຊົ່ວໂມງຕໍ່ໜ້າ ຄາດວ່າຫລາຍພື້ນທີ່ຝົນຕົກໜັກ ແບ່ງເປັນ 3 ປະເພດດັ່ງນີ້:
- ໄທ: ຊຽງຄາຍ, ເລີຍ, ໜອງຄາຍ, ບຶງການ, ໜອງບົວລໍາພູນ, ອຸດອນທານີ, ສະກົນນະຄອນ, ນະຄອນພະນົມ, ມະຫາສາລະຄາມ, ໄຊຍະພູມ, ມຸກດາຫານ, ກາລະສິນ, ຍະໂສທອນ, ຂອນແກ່ນ, ອໍານາດຈະເລີນ ແລະ ອຸບົນລາດຊະທານີ.
- ກໍາປູເຈຍ: ກໍາປົງຊະນັງ, ກໍາປອດ, ກົງໄພລິນ, ພະຕະບອງ ແລະ ຣັດຕະນະຄີຣີ.
- ລາວ: ຫລວງພະບາງ, ນະຄອນຫລວງວຽງຈັນ, ຊຽງຂວາງ, ບໍລິຄໍາໄຊ ແລະ ຄໍາມ່ວນ.
ທັງນີ້, ລະຫວ່າງວັນທີ 13-17 ກັນຍາ ຄາດວ່າຈະມີຝົນຕົກໜັກບາງແຫ່ງບໍລິເວນພາກກາງຂອງລຸ່ມແມ່ນໍ້າຂອງຕອນລຸ່ມ.
ນອກຈາກນີ້, ຄະນະກໍາມາທິການແມ່ນໍ້າຂອງຍັງລາຍງານອີກວ່າ: ລະດັບນໍ້າຢູ່ສະຖານີສໍາຫລວດທາງອຸທົກວິທະຍາຈິງຫົງ (Jinghong Hydrological Station) ຂອງຈີນ ຍັງຢູ່ໃນລະດັບ 535.65 – 535.58 ແມັດເໜືອລະດັບນໍ້າທະເລ ໃນໄລຍະ 3 ວັນຜ່ານມາ ແລະ ຍັງບໍ່ມີການບົ່ງຊີ້ຈາກທາງຈີນວ່າຈະມີການປ່ອຍນໍ້າປະລິມານຫລາຍໃນມໍ່ໆນີ້.
ອ້າງອີງ:
