ອາຊີຕາເວັນອອກສຽງໃຕ້ຜະເຊີນນໍ້າຖ້ວມໜັກ ຫວຽດນາມໜັກທີ່ສຸດ ມີຜູ້ເສຍຊີວິດເຖິງ 200 ຄົນ
ເຖິງວ່າພາຍຸຢາກິອ່ອນກໍາລັງຈົນເກືອບສະຫລາຍຕົວໄປແລ້ວ, ແຕ່ອິດທິພົນທີ່ຍັງຫລົງເຫລືອຢູ່ ເຮັດໃຫ້ຫລາຍພື້ນທີ່ໃນອາຊີຕາເວັນອອກສຽງໃຕ້ຜະເຊີນນໍ້າຖ້ວມຢ່າງໜັກ.
ວັນທີ 12 ກັນຍາ, ສໍານັກຂ່າວແຫ່ງຊາດຫວຽດນາມ (VNA) ລາຍງານວ່າ: ຈໍານວນຜູ້ເສຍຊີວິດຈາກອິດທິພົນຂອງພາຍຸຢາກິ ເຊິ່ງພັດຂຶ້ນຝັ່ງໃນທ້າຍອາທິດຜ່ານມາ ເພີ່ມເປັນຢ່າງໜ້ອຍ 197 ຄົນ, ແຕ່ຍັງມີຜູ້ສູນຫາຍອີກຢ່າງໜ້ອຍ 128 ຄົນ ຈຶ່ງມີຄວາມເປັນໄປໄດ້ວ່າ ຈໍານວນຜູ້ເສຍຊີວິດຈາກໄພພິບັດທາງທໍາມະຊາດຄັ້ງນີ້ຈະເພີ່ມຂຶ້ນອີກຢູ່ຫວຽດນາມ.
ກົມອຸຕຸນິຍົມວິທະຍາແຫ່ງຊາດຂອງຫວຽດນາມລາຍງານວ່າ: ລະດັບນໍ້າແມ່ນໍ້າແດງສ່ວນທີ່ໄຫລຜ່ານນະຄອນຫລວງຮ່າໂນ້ຍເພີ່ມຂຶ້ນສູ່ລະດັບສູງທີ່ສຸດໃນຮອບ 20 ປີ ຫລື ນັບແຕ່ປີ 2004 ໃນວັນທີ 11 ກັນຍາ ເພີ່ມຄວາມສ່ຽງຂອງການເກີດນໍ້າຖ້ວມກະທັນຫັນຄັ້ງໃໝ່ ຈຶ່ງຂໍໃຫ້ປະຊາຊົນໃນພື້ນທີ່ສ່ຽງອົບພະຍົບ.
ຂະນະທີ່ກະຊວງກະສິກໍາຫວຽດນາມລາຍງານວ່າ: ເນື້ອທີ່ກະສິກໍາຫລາຍກວ່າ 250,000 ເຮັກຕາ ໄດ້ຮັບຄວາມເສຍຫາຍ ແລະ ສັດລ້ຽງເສຍຊີວິດເປັນຈໍານວນຫລາຍ.
ຄະນະກໍາມາທິການແມ່ນໍ້າຂອງ (MRC) ອອກຖະແຫລງການເຕືອນວ່າ: ລະດັບນໍ້າແມ່ນໍ້າຂອງເສັ້ນທາງໄຫລຜ່ານເມືອງຫລວງພະບາງ ເຊິ່ງເປັນໜຶ່ງໃນເມືອງສໍາຄັນຂອງລາວ ແລະ ເປັນມໍລະດົກໂລກຂອງອົງການການສຶກສາ, ວິທະຍາສາດ ແລະ ວັດທະນະທໍາແຫ່ງສະຫະປະຊາຊາດ (ອຸຍເນັສໂກ) ສູງເຖິງລະດັບອັນຕະລາຍ ແລະ ມີຄວາມສ່ຽງຜະເຊີນນໍ້າຖ້ວມ.
ໃນເວລາດຽວກັນ, ໂກລບໍ ນິວ ໄລ ອອບ ມຽນມາ ເຊິ່ງເປັນສື່ກະບອກສຽງຂອງທາງການມຽນມາ ລາຍງານວ່າ: ພື້ນທີ່ອ້ອມນະຄອນຫລວງເນປີດໍ ເຊິ່ງມີລັກສະນະປະເທດແບບລຸ່ມຕໍ່າ ຜະເຊີນນໍ້າຖ້ວມຢ່າງໜັກ, ສ່ວນສະຖານະການຢູ່ເມືອງຕອງອູ ໃນພະໂຄ ມີຄວາມສ່ຽງຂອງການຜະເຊີນນໍ້າຖ້ວມໜັກເຊັ່ນກັນ ແລະ ເສັ້ນທາງລົດໄຟລະຫວ່າງເມືອງຢາງກຸ້ງກັບເມືອງມັນທະເລຈໍາເປັນຕ້ອງຢຸດໃຫ້ບໍລິການຊົ່ວຄາວ ເນື່ອງຈາກມີນໍ້າຖ້ວມບາງເສັ້ນທາງ.
