ອົດສະຕຣາລີວາງແຜນຈໍາກັດອາຍຸເຍົາວະຊົນຕໍ່າກວ່າ 16 ປີ ໃນການນຳໃຊ້ໂຊຊຽວມີເດຍ
ອົດສະຕຣາລີຈະຫ້າມບໍ່ໃຫ້ເດັກນ້ອຍໃຊ້ສື່ອອນລາຍ ດ້ວຍການຈໍາກັດອາຍຸຂັ້ນຕໍ່າ 16 ປີ. ພ້ອມໃຫ້ຄໍາໝັ້ນວ່າ: ຈະເຮັດໃຫ້ເຍົາວະຊົນອອກຫ່າງຈາກໂທລະສັບມືຖື ແລະ ຫັນໄປຫລິ້ນກິລາແທນ.
ວັນທີ 10 ກັນຍາ, ນາຍົກລັດຖະມົນຕີ ແອນໂທນີ ອັລບາເນຊີ ຜູ້ນໍາອົດສະຕຣາລີ ກ່າວວ່າ: ກົດໝາຍຂອງລັດຖະບານໃນການຫ້າມເດັກນ້ອຍໃຊ້ສື່ອອນລາຍຈະມີຜົນບັງຄັບໃຊ້ໃນປີນີ້ ໂດຍອະທິບາຍວ່າ: ເວັບໄຊ ແລະ ເພສຕ່າງໆ ສົ່ງຜົນກະທົບຮ້າຍແຮງຕໍ່ເຍົາວະຊົນ.
ທັງນີ້, ລັດຖະບານແຄນເບີຣາຍັງບໍ່ຕັດສິນໃຈກໍານົດອາຍຸຂັ້ນຕໍ່າທີ່ເດັກນ້ອຍສາມາດນໍາໃຊ້ສື່ອອນລາຍຕ່າງໆເຊັ່ນ: ເຟສບຸກ, ອິນສະຕາແກມ ແລະ ຕິກຕ໊ອກ, ແຕ່ຄາດວ່າຢູ່ລະຫວ່າງ 14-16 ປີ. ຂະນະທີ່ທ່ານ ອັລເບເນຊີ ສະແດງຄວາມເຫັນພ້ອມຕໍ່ການບ໊ອກຜູ້ໃຊ້ທີ່ມີອາຍຸຕໍ່າກວ່າ 16 ປີ ແລະ ທາງການອົດສະຕຣາລີຈະດໍາເນີນການທົດລອງກວດສອບອາຍຸ ເພື່ອທົດສອບແນວທາງຕ່າງໆໃນມໍ່ໆນີ້.
ທ່ານ ປີເຕີ ດັດຕັນ ຜູ້ນໍາຝ່າຍຄ້ານຂອງອົດສະຕຣາລີ ກ່າວວ່າ: ທ່ານຈະສະໜັບສະໜູນແຜນການຈໍາກັດອາຍຸຂອງລັດຖະບານເຊັ່ນກັນ ໂດຍໃຫ້ເຫດຜົນວ່າ: ຄວາມຊັກຊ້າຈະເຮັດໃຫ້ເຍົາວະຊົນສ່ຽງຕໍ່ອັນຕະລາຍຂອງສື່ອອນລາຍ ແລະ ຖືເປັນການເສຍເວລາໃນການອາໄສບໍລິສັດເທັກໂນໂລຊີໃນການຈໍາກັດອາຍຸທີ່ສາມາດເຂົ້າເຖິງແພກຟອມໄດ້.
ເຖິງຢ່າງໃດກໍຕາມ, ນັກວິເຄາະຫລາຍທ່ານກ່າວເຕືອນວ່າ: ການຈໍາກັດອາຍຸດັ່ງກ່າວ ອາດບໍ່ສາມາດຊ່ວຍເຫລືອເດັກນ້ອຍທີ່ມີບັນຫາໄດ້ ເນື່ອງຈາກແຜນການຂອງລັດຖະບານຂາດການຄິດຕຶກຕອງຢ່າງຮອບຄອບ. ອີກທັງການເຄື່ອນໄຫວທີ່ເກີດຂຶ້ນທັນທີທັນໃດນັ້ນ ອາດກີດກັນເຍົາວະຊົນຈາກການມີສ່ວນຮ່ວມທີ່ດີ ແລະ ມີຄວາມໝາຍໃນໂລກດິຈິຕອນ ແລະ ອາດເຮັດໃຫ້ພວກເຂົາຫັນໄປໃຊ້ພື້ນທີ່ອອນລາຍທີ່ມີຄຸນນະພາບຕໍ່າກວ່າ.
