ແມ່ນ້ຳອາເມຊອນຜະເຊີນໄພແຫ້ງແລ້ງຮຸນແຮງ ນໍ້າຫລຸດຕໍ່າສຸດເປັນປະຫວັດສາດ ກະທົບນໍ້າດື່ມ-ນໍ້າໃຊ້
ລະດັບນໍ້າໃນແມ່ນໍ້າມາເດຣາ (Madeira) ເຊິ່ງເປັນໜຶ່ງໃນແມ່ນໍ້າສາຂາໃຫຍ່ທີ່ສຸດຂອງແມ່ນໍ້າອາເມຊອນ ໃນເວລານີ້ກໍາລັງຜະເຊີນໄພແຫ້ງແລ້ງຮຸນແຮງທີ່ສຸດ ແລະ ປະລິມານຝົນທີ່ຫລຸດລົງ ເຊິ່ງສ້າງຄວາມທ້າທາຍແບບບໍ່ເຄີຍມີມາກ່ອນໃຫ້ຊາວຣິເບຣິນໂຮ (Ribeirinhos) ທີ່ອາໄສຢູ່ຕາມແຄມຝັ່ງແມ່ນໍ້າສາຍນີ້.
ເມື່ອແມ່ນໍ້າກາຍເປັນເສັ້ນທາງທີ່ຍາກຈະແລ່ນເຮືອ ແລະ ນໍ້າບໍ່ສະອາດພຽງພໍຈະດື່ມ, ທ້ອງຖິ່ນຊົນນະບົດດັ້ງເດີມຫລາຍແຫ່ງທີ່ອາໄສຢູ່ຕາມແຄມຝັ່ງແມ່ນໍ້າຈຶ່ງຕ້ອງອາໄສການຈັດສົ່ງນໍ້າດື່ມຈາກພາຍນອກເປັນຫລັກ ໂດຍກຸ່ມຜູ້ສູງອາຍຸເປັນກຸ່ມທີ່ໄດ້ຮັບຜົນກະທົບຢ່າງໜັກ ເພາະພວກເຂົາຕ້ອງຍ່າງໄກຂຶ້ນເພື່ອໄປຫານໍ້າ ເຊິ່ງປົກກະຕິແລ້ວຊາວຣິເບຣິນໂຮຈະໃຊ້ນໍ້າໂດຍກົງຈາກແມ່ນໍ້າ ຫລື ຜ່ານລະບົບເຊື່ອມຕໍ່, ແຕ່ເມື່ອນໍ້າຫລຸດລົງຫລາຍ ລະບົບການຈັດຫານໍ້າແບບເກົ່າບໍ່ສາມາດນໍາໃຊ້ໄດ້.
ທ່ານ ເຈົາ ແຟຣໄຣຣາ ຜູ້ນໍາທ້ອງຖິ່ນກ່າວວ່າ: ຝັ່ງແມ່ນໍ້າຫ່າງຈາກເຮືອນບາງຫລັງເຖິງ 800 ແມັດ ເຊິ່ງເປັນໄລຍະທາງໄກສໍາລັບຜູ້ສູງອາຍຸ ຫລື ຜູ້ທີ່ມີບັນຫາດ້ານສຸຂະພາບ. ໃນເວລານີ້ ປະຊາຊົນຫລາຍຄົນຈຶ່ງອາໄສນໍ້າດື່ມຈາກອົງກອນບໍ່ສະແຫວງຫາຜົນກໍາໄລ ຫລື ລັດຖະບານທ້ອງຖິ່ນໃນການຈັດຫານໍ້າດື່ມ.
ໜ່ວຍງານທໍລະນີວິທະຍາຂອງເບຣຊິນ (SGB) ເຕືອນໃນໄລຍະຜ່ານມາວ່າ: ແມ່ນໍ້າທຸກສາຍໃນກຸ່ມນໍ້າອາເມຊອນຈະມີທ່າອ່ຽງຫລຸດຕໍ່າກວ່າລະດັບປົກກະຕິທີ່ເຄີຍບັນທຶກໄວ້. ນອກຈາກນີ້ ຜົນຈາກລະດັບນໍ້າຫລຸດລົງຍັງສົ່ງຜົນກະທົບຕໍ່ການຂົນສົ່ງຖົ່ວເຫລືອງ ແລະ ສາລີໃນລັດທາງພາກກາງ-ພາກຕາເວັນຕົກເຊັ່ນ: ມາດູໂກຣຊູ ເຊິ່ງເປັນພື້ນທີ່ປູກພືດຕົ້ນຕໍຂອງປະເທດນໍາອີກ.
ນອກຈາກນີ້, ເບຣຊິນຍັງຜະເຊີນໄຟໄໝ້ປ່າຮຸນແຮງໃນເດືອນສິງຫາຜ່ານມາ ເຊິ່ງທະວີຄວາມຮຸນແຮງຂຶ້ນຈາກສະພາບໄພແຫ້ງແລ້ງ ແລະ ຄື້ນຄວາມຮ້ອນທີ່ເຊື່ອມໂຍງກັບການປ່ຽນແປງສະພາບອາກາດໂດຍກົງ, ສະພາບແຫ້ງແລ້ງເຮັດໃຫ້ພື້ນທີ່ຂະໜາດໃຫຍ່ຂອງປ່າອາເມຊອນມີຄວາມບອບບາງຕໍ່ໄຟໄໝ້ປ່າ ໂດຍໄຟໄໝ້ປ່າເຫລົ່ານີ້ເກີດຂຶ້ນຄຽງຄູ່ກັບອຸນຫະພູມທີ່ສູງເປັນປະຫວັດສາດ ເຊິ່ງນັກວິທະຍາສາດດ້ານສະພາບອາກາດຊີ້ວ່າ: ສະພາບແບບນີ້ມີໂອກາດເກີດເພີ່ມຂຶ້ນເຖິງ 5 ເທົ່າ.
ອ້າງອີງ:
