ພາຍຸຢາງິອ່ອນກໍາລັງເປັນດີເປສຊັນ ພາຍຫລັງຖະຫລົ່ມຫວຽດນາມ ມີຜູ້ເສຍຊີວິດ 20 ກວ່າຄົນ
ມີຜູ້ເສຍຊີວິດຈາກອິດທິພົນຂອງພາຍຸຢາງິຢູ່ຫວຽດນາມເພີ່ມເປັນ 20 ກວ່າຄົນ. ຂະນະທີ່ພາຍຸອ່ອນກໍາລັງລົງເປັນດີເປສຊັນເຂດຮ້ອນແລ້ວ.
ວັນທີ 9 ກັນຍາ, ສໍານັກຂ່າວແຫ່ງຊາດຫວຽດນາມ (VNA) ລາຍງານວ່າ: ຈໍານວນຜູ້ເສຍຊີວິດໃນປະເທດຈາກອິດທິພົນຂອງພາຍຸໄຕ້ຝຸ່ນຢາງິເພີ່ມເປັນຢ່າງໜ້ອຍ 21 ຄົນ ແລະ ມີຜູ້ໄດ້ຮັບບາດເຈັບອີກ 220 ກວ່າຄົນ. ຂະນະທີ່ບ້ານເຮືອນເກືອບ 3,300 ຫລັງ ແລະ ເນື້ອທີ່ກະສິກໍາອີກ 120,000 ກວ່າເຮັກຕາ ໄດ້ຮັບຄວາມເສຍຫາຍຈາກອິດທິພົນຂອງພາຍຸ ເຊິ່ງສ່ວນຫລາຍຄືທາງພາກເໜືອຂອງປະເທດ ລວມທັງນະຄອນຫລວງຮ່າໂນ້ຍ.
ເຖິງວ່າກົມອຸຕຸນິຍົມວິທະຍາແຫ່ງຊາດຂອງຫວຽດນາມ ລາຍງານວ່າ: ພາຍຸຢາງິອ່ອນກໍາລັງລົງຢ່າງຕໍ່ເນື່ອງ ເປັນພາຍຸດີເປສຊັນເຂດຮ້ອນແລ້ວ, ແຕ່ຍັງເຕືອນໄພຄວາມສ່ຽງຂອງການເກີດນໍ້າຖ້ວມ ແລະ ດິນເຈື່ອນ.
ທັງນີ້, ພາຍຸຢາງິພັດຂຶ້ນຝັ່ງບໍລິເວນເມືອງຮາຍຟອງກັບແຂວງກວາງນິນ ທາງພາກເໜືອຂອງຫວຽດນາມ ໃນວັນທີ 7 ກັນຍາຜ່ານມາ ດ້ວຍຄວາມໄວລົມສູງສຸດໃກ້ສູນກາງປະມານ 200 ກິໂລແມັດຕໍ່ຊົ່ວໂມງ ຖືວ່າຮຸນແຮງທີ່ສຸດຂອງທະວີບອາຊີໃນປີນີ້ ແລະ ຫລາຍທີ່ສຸດໃນຮອບຫລາຍທົດສະວັດຂອງຫວຽດນາມ.
ໜ່ວຍງານບັນເທົາທຸກອົບພະຍົບປະຊາຊົນອອກຈາກພື້ນທີ່ສ່ຽງແລ້ວເກືອບ 50,000 ຄົນ ແລະ ຍັງມີການຮັກສາຄໍາສັ່ງໃຫ້ປະຊາຊົນໃນພື້ນທີ່ປະສົບໄພຫລີກລ່ຽງການອອກນອກເຄຫາສະຖານ. ນອກຈາກນີ້ ກະຊວງສຶກສາທິການຫວຽດນາມສັ່ງປິດໂຮງຮຽນໃນ 12 ແຂວງຊົ່ວຄາວ ລວມທັງນະຄອນຫລວງຮ່າໂນ້ຍ.
ກ່ອນພາຍຸໄຕ້ຝຸ່ນຢາງິ ເຊິ່ງເປັນພາສາຍີ່ປຸ່ນ ໝາຍຄວາມວ່າ: ແບ້ ເຄື່ອນທີ່ມາຫວຽດນາມ ພາຍຸໄດ້ພັດຜ່ານມົນທົນໄຫໜານ ທາງພາກໃຕ້ຂອງຈີນ ດ້ວຍຄວາມໄວລົມສູງສຸດໃກ້ສູນກາງຫລາຍກວ່າ 230 ກິໂລແມັດຕໍ່ຊົ່ວໂມງ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 4 ຄົນ ແລະ ໄດ້ຮັບບາດເຈັບອີກຫລາຍກວ່າ 100 ຄົນ. ອີກທັງຂ້າຊີວິດປະຊາຊົນຢູ່ຟີລິບປິນແລ້ວຫລາຍກວ່າ 20 ຄົນ. ຕໍ່ຈາກນີ້ ພາຍຸມີທິດທາງມຸ້ງໜ້າສູ່ລາວເປັນຈຸດໝາຍຕໍ່ໄປ.
