ນາຍົກ ຊີ້ນຳວຽກງານການລະດົມທຶນດອກເບ້ຍຕໍ່າ ເພື່ອເປັນສິນເຊື່ອສົ່ງເສີມການຜະລິດພາຍໃນ ທົດແທນການນຳເຂົ້າ

ວັນທີ 6 ກັນຍາ 2024 ທີ່ສໍານັກງານນາຍົກລັດຖະມົນຕີ, ໄດ້ຈັດກອງປະຊຸມລະດົມທຶນດອກເບ້ຍຕໍ່າ ເພື່ອເປັນສິນເຊື່ອສົ່ງເສີມການຜະລິດເປັນສິນຄ້າສົ່ງອອກ ແລະ ທົດແທນການນຳເຂົ້າ, ເປັນປະທານ ຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ; ພ້ອມພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງກ່ຽວກັບສະພາບການຈັດຕັ້ງປະຕິບັດກອງທຶນສົ່ງເສີມວິສາຫະກິດ ແລະ ສະເໜີທິດທາງໃນຕໍ່ໜ້າ; ສະພາບການສະໜອງສິນເຊື່ອ ເພື່ອສົ່ງເສີມການຜະລິດເປັນສິນຄ້າໄລຍະຜ່ານມາ. ຈາກນັ້ນຕາງໜ້າຜູ້ປະກອບການທຸລະກິດດ້ານຕ່າງໆ ກໍໄດ້ປະກອບຄຳຄິດເຫັນຕໍ່ສະພາບການຜະລິດພາຍໃນ, ການສະໜອງສິນເຊື່ອ, ລວມທັງທ່າແຮງ, ຂໍ້ຈຳກັດ ແລະ ສິ່ງທ້າທາຍໃນວຽກງານດັ່ງກ່າວ ຂອງ ສປປ ລາວ ກໍຄືຂອງພາກທຸລະກິດ.

ໂອກາດນີ້, ທ່ານ ນາຍົກລັດຖະມົນຕີ ໄດ້ຊີ້ນຳໃຫ້ກະຊວງອຸດສາຫະກຳ ແລະ ການຄ້າ ແລະ ທະນາຄານແຫ່ງ ສປປ ລາວ ສົມທົບກັນປຶກສາຫາລື, ຖອດຖອນບົດຮຽນໃນການຄົ້ນຄວ້າສ້າງກອງທຶນສົ່ງເສີມການຜະລິດທີ່ມີດອກເບ້ຍຕ່ຳເໝາະສົມສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ ແນໃສ່ເພື່ອຊຸກຍູ້ສົ່ງເສີມຈຸນລະວິສາຫະກິດ, ທຸລະກິດຂະໜາດນ້ອຍ ແລະ ຂະໜາດກາງຢ່າງແທ້ຈິງ; ໃຫ້ກະຊວງ, ຂະແໜງການກ່ຽວຂ້ອງ ຊຸກຍູ້ສົ່ງເສີມການຜະລິດເປັນສິນຄ້າ, ສົ່ງເສີມດຶງດູດການລົງທຶນຈາກຕ່າງປະເທດໃນຂົງເຂດການຜະລິດ, ເຈລະຈາຊອກຫາຕະຫລາດໃຫ້ຜູ້ຜະລິດ ລວມທັງປັບປຸງລະບຽບການ, ຫລຸດຜ່ອນຂັ້ນຂອດຕ່າງໆ ເພື່ອອຳນວຍຄວາມສະດວກໃຫ້ແກ່ພາກທຸລະກິດ, ພ້ອມນີ້ກໍໃຫ້ນຳເອົາການສະເໜີຂອງພາກທຸລະກິດ ໄປຄົ້ນຄວ້າ ພິຈາລະນາ. ຕໍ່ພາກທຸລະກິດໄດ້ຊີ້ນຳສືບຕໍ່ພັດທະນາທຸລະກິດຂອງຕົນໃຫ້ສອດຄ່ອງກັບຍຸກສະໄໝ ໂດຍນຳໃຊ້ເຕັກໂນໂລຊີ ແລະ ນະວັດຕະກຳໃໝ່ ເພື່ອເພີ່ມສະມັດຕະພາບການຜະລິດ, ປະຢັດເວລາ ແລະ ຕົ້ນທຶນ ຄຽງຄູ່ກັບການສົ່ງເສີມ ຊ່ວຍເຫລືອຂອງຂະແໜງການກ່ຽວຂ້ອງຕາມທິດຫັນເປັນທັນສະໄໝ ເປັນກ້າວໆ; ເພີ່ມທັກສະຄວາມຮູ້ດ້ານການບໍລິຫານ-ການບໍລິການ; ຮຽກຮ້ອງພາກທຸລະກິດເອົາໃຈໃສ່ປະຕິບັດພັນທະຂອງຕົນໃຫ້ຄົບຖ້ວນ ແລະ ເຄື່ອນໄຫວທຸລະກິດສອດຄ່ອງຕາມກົດໝາຍ ແລະ ລະບຽບການຢ່າງເຂັ້ມງວດ, ພ້ອມກັນປະກອບສ່ວນສຸດຄວາມສາມາດເຂົ້າໃນການສ້າງສາພັດທະນາປະເທດຊາດ ໂດຍສະເພາະການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ດ້ວຍຄວາມເສຍສະຫລະຢ່າງແທ້ຈິງ ເຮັດໃຫ້ບັນຫາເຄັ່ງຮ້ອນຕ່າງໆ ຫລຸດຜ່ອນລົງ.

ຂ່າວ: ກົມປະຊາສຳພັນ ຫສນຍ