ເຈົ້າຫນ້າທີ່ອາວຸໂສຄະນະກຳມະການຄຸ້ມຄອງໄພພິບັດອາຊຽນຮ່ວມຫາລືວຽກງານຕ້ານໄພພິບັດ
ວັນທີ 4 ເມສານີ້, ກະຊວງແຮງງານ ແລະ ສະຫວັດດີການສັງຄົມ, ໄດ້ຈັດກອງປະຊຸມເຈົ້າຫນ້າທີ່ອາວຸໂສຄະນະກຳມະການຄຸ້ມຄອງໄພພິບັດອາຊຽນຄັ້ງທີ 30 (ACDM), ຂຶ້ນທີ່ ນະຄອນຫລວງວຽງຈັນ, ໂດຍການເປັນປະທານຂອງທ່ານ ຄຳແພງ ໄຊສົມແພງ ລັດຖະ ມົນຕີກະຊວງດັ່ງກ່າວ, ມີທ່ານຮອງເລຂາທິການໃຫຍ່ອາຊຽນ, ຜູ້ຮັກສາການຫົວໜ້າສູນປະສານງານຊ່ວຍເຫລືອດ້ານມະນຸດສະທຳອາຊຽນ ແລະ ຕົວແທນຈາກບັນດາປະເທດອາ ຊຽນເຂົ້າຮ່ວມ.
ທ່ານຫົວໜ້າກົມສັງຄົມສົງເຄາະ ກ່າວວ່າ: ກອງປະຊຸມຄັ້ງນີ້ ຈະໄດ້ຮັບຟັງການລາຍງານຄວາມຄືບໜ້າຜົນສຳເລັດ ແລະ ປະເດັນທີ່ເປັນຂໍກຸນແຈຂອງແຜນງານທີ່ເປັນບູລິມະສິດ, ພາຍໃຕ້ເຄືອຂ່າຍຂອງໜ່ວຍງານວິຊາການເຊັ່ນ: ການປະເມີນຄວາມສ່ຽງໄພພິບັດ, ການປ້ອງກັນ ແລະ ບັນເທົາໄພພິບັດ, ການຄຸ້ມຄອງຄວາມຮູ້ ແລະ ນະວັດຕະກຳ, ການກຽມພ້ອມ ແລະ ການຕອບໂຕໄພພິບັດ, ລວມທັງການຟື້ນຟູຫລັງໄພພິບັດ, ນອກນີ້ ຍັງໄດ້ຮັບຟັງລາຍງານກ່ຽວກັບຂອບວຽກການຕິດຕາມ ແລະ ປະເມີນຜົນການປະຕິບັດສັນຍາ AADMER ແລະ ການຈັດຕັ້ງປະຕິບັດຖະແຫລງການໜຶ່ງອາຊຽນ ໜຶ່ງການຕອບໂຕ້, ຊຶ່ງປະກອບດ້ວຍຄວາມຍືນຍົງຂອງສູນປະສານງານຊ່ວຍເຫລືອ ດ້ານມະນຸດສະທຳອາຊຽນ (AHA Center), ການທົບທວນຄືນແຜນຕອບໂຕ້ໄພພິບັດຮ່ວມຂອງອາຊຽນ, ທິດທາງສຳລັບອາຊຽນ ເພື່ອການຕອບໂຕ້ຢູ່ນອກຂົງເຂດຕົນ ລວມທັງການກະຕຸກຊຸກຍູ້ໃຫ້ເລຂາທິການໃຫຍ່ອາຊຽນເປັນຜູ້ປະສານງານການຊ່ວຍເຫລືອດ້ານມະນຸດສະທຳອາຊຽນ.
ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ມີຄຳເຫັນວ່າ: ໄລຍະຜ່ານມາ, ຄະນະກຳມະການໄພພິບັດອາຊຽນ ໄດ້ມີຄວາມເອົາໃຈໃສ່ໃນການຈັດຕັ້ງປະຕິບັດສັນຍາ (AMERR) ແລະ ຖະແຫລງການອາຊຽນ ວ່າດ້ວຍຮ່ວມມືກັນເປັນໜຶ່ງດຽວໃນການຕອບໂຕ້ໄພພິບັດ, ໂດຍຜ່ານໂຄງການຮ່ວມມືໃນອາຊຽນ ແລະ ໂຄງການຮ່ວມມືກັບບັນດາປະເທດຄູ່ຮ່ວມເຈລະຈາ. ນອກນີ້ ຍັງໄດ້ສືບຕໍ່ຜັນຂະຫຍາຍ 8 ແຜນງານທີ່ເປັນບູລິມະສິດຄື: ການຮັບຮູ້ຄວາມສ່ຽງຂອງຊຸມຊົນອາຊຽນ (AWARE), ສ້າງບັນດາໂຄງລ່າງພື້ນຖານ ແລະ ສະຖານທີ່ບໍລິການສຳຄັນຕ່າງໆໃຫ້ມີຄວາມທົນທານ ແລະ ປອດໄພຈາກໄພພິບັດ (BUILD SAFETY), ສ້າງຊຸມຊົນອາຊຽນໃຫ້ມີຄວາມສາມາດກຽມພ້ອມຮັບມືກັບໄພພິບັດ ແລະ ການປ່ຽນແປງດິນຟ້າອາກາດ (ADVANCE), ປົກປ້ອງເສດຖະກິດ ແລະ ຜົນປະໂຫຍດທາງສັງຄົມຂອງຊຸມຊົນອາຊຽນຈາກໄພພິບັດ ຜ່ານລະບົບຖ່າຍໂອນຄວາມສ່ຽງ ແລະ ການປົກປ້ອງສັງຄົມ (PROTECT), ເພີ່ມທະວີກົນໄກການນຳພາຂອງອາຊຽນໃນການຕອບໂຕ້ໄພພິບັດ (RESPOND), ເພີ່ມທະວີຄວາມອາດສາມາດໃນການຮ່ວມກັນເປັນໜຶ່ງດຽວຂອງອາຊຽນ ເພື່ອຕອບໂຕ້ໄພພິບັດ (EQUIP), ອາຊຽນ ສາມາດຟື້ນຟູໄວຫລັງໄພພິບັດ (RECOVER) ແລະ ການນຳພາຂອງອາຊຽນໃນຮູບແບບໃໝ່ ແລະ ທັນສະໄໝໃນວຽກງານຄຸ້ມຄອງໄພພິບັດ (LEAD), ຊຶ່ງໃນນີ້ ລວມທັງການຈັດຕັ້ງປະຕິບັດວິໃສທັດອາຊຽນ 2025 ກ່ຽວກັບການຄຸ້ມຄອງໄພພິບັດ.
