ຊາວມາເລເຊຍ 71% ສະໜັບສະໜູນການຈໍາກັດເດັກອາຍຸຕໍ່າກວ່າ 14 ປີເຂົ້າເຖິງໂຊຊຽວມີເດຍ
ຜົນສໍາຫລວດຈາກອິບຊໍ ບໍລິສັດວິໄຈການຕະຫລາດ ແລະ ສໍາຫລວດຄວາມຄິດເຫັນລະດັບໂລກ ພົບວ່າ: 71% ຂອງຊາວມາເລເຊຍເຫັນພ້ອມຕໍ່ການຈໍາກັດການເຂົ້າເຖິງໂຊຊຽວມີເດຍໃນກຸ່ມເດັກອາຍຸຕໍ່າກວ່າ 14 ປີ.
ວັນທີ 8 ກັນຍາ, ການຕິດຕາມການສຶກສາ (Education Monitor) ຂອງອິບຊໍ ເຊິ່ງສໍາຫລວດຄວາມຄິດເຫັນຂອງປະຊາຊົນໃນມາເລເຊຍ, ໄທ, ອິນໂດເນເຊຍ ແລະ ສິງກະໂປ ລະບຸວ່າ: ມາເລເຊຍເປັນປະເທດທີ່ກຸ່ມຕົວຢ່າງຄິດເຫັນກົງກັນໃນເລື່ອງນີ້ຫລາຍທີ່ສຸດເປັນອັນດັບສອງ ຮອງຈາກອິນໂດເນເຊຍ.
“ຊາວມາເລເຊຍລະມັດລະວັງການເຂົ້າເຖິງໂຊຊຽວມີເດຍຂອງເດັກຫລາຍທີ່ສຸດ. ຂະນະທີ່ຄວາມຄິດເຫັນກ່ຽວກັບການໃຊ້ສະມາດໂຟນ ແລະ ປັນຍາປະດິດ (AI) ໃນໂຮງຮຽນແຕກຕ່າງກັນອອກໄປ” ຜົນສໍາຫລວດລະບຸ.
ຂະນະດຽວກັນ, ຜົນສໍາຫລວດຍັງພົບວ່າ: ຊາວມາເລເຊຍ 51% ເບິ່ງວ່າຄວນຫ້າມຜູ້ທີ່ມີອາຍຸຕໍ່າກວ່າ 14 ປີໃຊ້ສະມາດໂຟນໃນເວລາຮຽນ ແລະ ເລີກຮຽນ, ສ່ວນ 29% ເຫັນດ້ວຍວ່າຄວນຫ້າມໃຊ້ໂມເດລພາສາ AI ຄືແຊດຈີພີທີ.
ນອກຈາກນີ້, 56% ຂອງກຸ່ມຕົວຢ່າງຊາວມາເລເຊຍເຊື່ອວ່າ: ຄູ ແລະ ໂຮງຮຽນຄວນມີໜ້າທີ່ໃນການສອນຄວາມຮູ້ດ້ານດິຈິຕອນ ແລະ ຄວາມປອດໄພໃນໂລກອອນລາຍ, ສ່ວນ 39% ເບິ່ງວ່າໜ້າທີ່ດັ່ງກ່າວຄວນເປັນຂອງຜູ້ປົກຄອງ.
