ເກນຢາໄວ້ອາໄລເຫດການໄຟໄໝ້ຫໍພັກນັກຮຽນ ມີຜູ້ເສຍຊີວິດແລ້ວ 18 ຄົນ
ເກນຢາໄວ້ອາໄລທົ່ວປະເທດ ພ້ອມທັງເລັ່ງສືບສວນ-ສອບສວນ ເພື່ອຫາສາເຫດໄຟໄໝ້ຫໍພັກນັກຮຽນຊາຍ ສົ່ງຜົນເຮັດໃຫ້ມີເດັກນ້ອຍເສຍຊີວິດແລ້ວ 18 ຄົນ.
ວັນທີ 7 ກັນຍາ, ກົມຕໍາຫລວດເຂດອັນເຢຣີ ທາງພາກກາງຂອງເກນຢາ ອອກຖະແຫລງການກ່ຽວກັບຄວາມຄືບໜ້າພາຍຫລັງເກີດໄຟໄໝ້ຫໍພັກນັກຮຽນຊາຍ ຂອງໂຮງຮຽນປະຖົມສຶກສາ ຮິລໄຊ ເອັນດາຣາຊາ ວ່າຍັງມີນັກຮຽນສູນຫາຍອີກປະມານ 70 ຄົນ, ສ່ວນຈໍານວນຜູ້ເສຍຊີວິດເພີ່ມເປັນຢ່າງໜ້ອຍ 18 ຄົນ ແລະ ມີຜູ້ໄດ້ຮັບບາດເຈັບຢ່າງໜ້ອຍ 14 ຄົນ.
ທັງນີ້, ໃນໄລຍະເວລາເກີດເຫດ ຕອນກາງຄືນຂອງວັນທີ 5 ກັນຍາຜ່ານມາ ມີການປະເມີນວ່າ: ມີເດັກນັກຮຽນຊາຍຫລາຍກວ່າ 150 ຄົນ ອາຍຸລະຫວ່າງ 9-13 ປີ ກໍາລັງນອນຫລັບພັກຜ່ອນ ເຊິ່ງຫລາຍສິບຄົນຫລົບໜີອອກມາໄດ້ທັນເວລາ. ຂະນະທີ່ສາເຫດຂອງການເກີດໄຟໄໝ້ຍັງບໍ່ແນ່ນອນ ແລະ ເຈົ້າໜ້າທີ່ພິສູດຫລັກຖານຍັງຢູ່ລະຫວ່າງຮວບຮວມຂໍ້ມູນຈາກຈຸດເກີດເຫດ.
ຂະນະທີ່ປະທານາທິບໍດີ ວິວລຽມ ຣູໂຕ ຜູ້ນໍາເກນຢາ ປະກາດໄວ້ອາໄລທົ່ວປະເທດເປັນເວລາ 3 ວັນ ເລີ່ມແຕ່ວັນທີ 9 ກັນຍານີ້. ພ້ອມທັງເນັ້ນໃຫ້ໜ່ວຍງານທີ່ກ່ຽວຂ້ອງທຸກແຫ່ງ ເລັ່ງສືບສວນ-ສອບສວນຫາສາເຫດຂອງເຫດການຄັ້ງນີ້ ແລະ ຊ່ວຍເຫລືອຄອບຄົວຂອງຜູ້ປະສົບໄພທຸກຄົນ.
