“ການສຶກສາສ້າງຄົນ ຄົນສ້າງຊາດ” ທຸກຄົນຮູ້ດີ ແຕ່ຍັງມີຫລາຍປັດໄຈທີ່ຕ້ອງປັບປຸງໃຫ້ສອດຄ່ອງ
ໂດຍ: ທິດກໍ່າ
ສົກຮຽນ 2024-2025 ໄດ້ເລີ່ມເປີດການຮຽນ-ການສອນມາແຕ່ວັນທີ 2 ກັນຍາ 2024 ເຊິ່ງຕາມປົກກະຕິແລ້ວ ແມ່ນເປີດໃນວັນທີ 1 ກັນຍາ ແຕ່ກົງກັບວັນອາທິດຈຶ່ງໄດ້ເລື່ອນມາໃສ່ວັນທີ 2 ກັນຍາ ອັນເປັນຕອນເຊົ້າວັນຈັນຈຶ່ງສາມາດເປີດການຮຽນ-ການສອນຢ່າງເປັນທາງການໄດ້.
ແນວໃດກໍຕາມ, ເຖິງວ່າຢູ່ໃນຊ່ວງສະພາບການບ້ານເມືອງພວມປະສົບບັນຫາວິກິດທາງດ້ານເສດຖະກິດ-ການເງິນ ອັນມີຜົນກະທົບຢ່າງໃຫຍ່ຫລວງຕໍ່ຊີວິດການເປັນຢູ່ຂອງຕໍາຫລວດ, ທະຫານ, ພະນັກງານ ແລະ ປະຊາຊົນບັນດາເຜົ່າໃນທົ່ວປະເທດ, ແຕ່ເພື່ອອະນາຄົດອັນສົດໃສຂອງຊາດ, ຂອງລູກຫລານ ພໍ່ແມ່ ກໍຄືຜູ້ປົກຄອງຕ້ອງໄດ້ສະຫລະທຸ້ມເທຊັບສິນ ທັງເງິນຄໍາ ເພື່ອສົ່ງເສີມລູກໄດ້ເຂົ້າຮຽນຕາມຄວາມມຸ້ງມາດປາດຖະໜາ. ນີ້ຄືເປົ້າໝາຍ, ຄວາມຮັກ, ຄວາມຫ່ວງໃຍ ແລະ ຄວາມຫວັງຂອງພໍ່ແມ່ທີ່ມີຕໍ່ລູກທີ່ຈະເປັນຄົນດີ, ມີວິຊາຄວາມຮູ້ ກາຍເປັນທຶນຮອນອັນປະເສີດຂອງຊາດໃນອະນາຄົດ.
ສະເພາະໃນສົກຮຽນປີນີ້, ກ່ອນກ້າວສູ່ສົກຮຽນໃໝ່ 2024-2025 ຄືໃນວັນທີ 9 ສິງຫາ 2024 ຜ່ານມາ, ທ່ານເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ທອງລຸນ ສີສຸລິດ ກໍໄດ້ໃຫ້ກຽດໂອ້ລົມຕໍ່ພະນັກງານການນໍາ, ຜູ້ບໍລິຫານການສຶກສາວິທະຍາສາດການກິລາ ໂດຍເນັ້ນເນື້ອໃນບາງຕອນສໍາຄັນວ່າ: ການສຶກສາສ້າງຄົນ-ຄົນສ້າງຊາດ, ຕ້ອງຫັນປ່ຽນຄ່ານິຍົມເຫັນແຕ່ໄດ້ປະລິນຍາມາໄວ້ໂອ້ອວດ, ຕ້ອງຮູ້ຮັກຕົນເອງ, ຊອກຮູ້ຮໍ່າຮຽນດ້ວຍຕົນເອງ. ບົດຮຽນຂອງປະເທດທີ່ເຂົາຈະເລີນກ້າວໜ້າປະກອບດ້ວຍຄົນ 5 ຢ່າງຄື: ໜຶ່ງມີຄົນຮັກຊາດຢ່າງດູດດື່ມເປັນຈໍານວນຫລາຍພາຍໃນປະເທດ, ສອງມີຄົນຈໍານວນຫລາຍໃນພົນລະເມືອງຂອງຕົນທີ່ສະແຫວງຫາຄວາມຮູ້, ສາມມີຄົນຈໍານວນຫລາຍທີ່ຮູ້ຕົນເອງ ທັງຮູ້ສົມທຽບຕົນເອງໃສ່ຄົນອື່ນ ປະເທດອື່ນ, ສີ່ດຸໝັ່ນຂະຫຍັນພຽນ ມານະອົດທົນຜ່ານຜ່າຕໍ່ອຸປະສັກຕ່າງໆທີ່ຂວາງໜ້າ, ຫ້າຮູ້ປະຢັດອົດອອມດໍາລົງຊີວິດແບບລຽບງ່າຍ. ໄປຄຽງຄູ່ກັນນັ້ນ ກ່ອນມື້ເປີດສົກຮຽນໃໝ່ 2024-2025 ທ່ານນາຍົກລັດຖະມົນຕີ ສອນໄຊ ສີພັນດອນ ກໍໄດ້ສົ່ງໂທລະເລກອວຍພອນເນື່ອງໃນໂອກາດວັນເປີດສົກຮຽນໃໝ່ດ້ວຍເນື້ອໃນສໍາຄັນບາງຕອນຄື: ພັກ ແລະ ລັດຖະບານຍາມໃດກໍເປັນຫ່ວງເປັນໄຍຕໍ່ການສຶກສາ, ຖືເອົາການສຶກສາເປັນວຽກງານທີ່ສໍາຄັນອັນດັບໜຶ່ງ, ຖືເອົາການສຶກສາໄປກ່ອນບາດກ້າວໜຶ່ງ, ຖືເອົາຄົນເປັນເປົ້າໝາຍໃນການສ້າງສາພັດທະນາປະເທດຊາດ.
ດັ່ງທີ່ຮູ້ນໍາກັນແລ້ວວ່າ, ການສຶກສາເປັນຮາກເຫງົ້າ ແລະ ເປັນກົກໃນການສ້າງຄົນໃຫ້ເປັນຊັບພະຍາກອນອັນປະເສີດຂອງຊາດ ປະເທດຊາດຈະເລີນຮຸ່ງເຮືອງຮັ່ງມີ ແລະ ພັດທະນາໄປເໝືອນດັ່ງຊາດອື່ນເຂົາທີ່ຈະເລີນແລ້ວ ກໍຍ້ອນມີຄົນດີ, ຄົນເກັ່ງ, ມີວິຊາຄວາມຮູ້, ມີຄຸນສົມບັດ, ມີຄວາມຮັກຊາດ, ມີສິນທໍາປະຈໍາໃຈ, ມີຄວາມສັດຊື່ບໍລິສຸດຕໍ່ປະເທດ ແລະ ປະຊາຊົນ. ໄປພ້ອມກັນນັ້ນ ກໍໄຮ້ຄົນສໍ້ລາດບັງຫລວງໃນສັງຄົມບ້ານເມືອງ ບໍ່ເຫັນແກ່ຜົນປະໂຫຍດສ່ວນຕົວເໜືອກວ່າຜົນປະໂຫຍດຂອງຊາດ.
ເຖິງຢ່າງໃດກໍດີ, ສິ່ງທີ່ໜ້າເປັນຫ່ວງໃນສົກສຶກສາປີນີ້ຄື: ຈໍານວນນັກຮຽນໃນແຕ່ລະຊັ້ນ, ແຕ່ລະຂັ້ນມີທ່າອ່ຽງຫລຸດລົງ ໂດຍສະເພາະໃນຂັ້ນວິທະຍາໄລ, ມະຫາວິທະຍາໄລ ອັນສາເຫດກໍຍ້ອນວ່າສະພາບການບ້ານເມືອງເຮົາເກີດວິກິດທາງດ້ານເສດຖະກິດ-ການເງິນ, ນັກຮຽນ-ນັກສຶກສາຈໍານວນບໍ່ໜ້ອຍປະລະການຮຽນແລ້ວຫັນໄປອອກແຮງງານຢູ່ຕ່າງປະເທດ ເພື່ອເອົາຊີວິດຢູ່ລອດໃນບັ້ນວິກິດ. ໃນອະນາຄົດກໍເຊື່ອແນ່ວ່າ ທຸກສິ່ງຢ່າງຖ້າບ້ານເມືອງຈະເລີນຮັ່ງມີພົ້ນຈາກວິກິດ ການຮໍ່າຮຽນຂອງລູກຫລານອາດກັບມາມີບັນຍາກາດຄຶກຄັກ ເພາະການສຶກສາຄືການສ້າງຄົນ-ຄົນສ້າງຊາດ.
