ປີ 2024  ແຂວງຈໍາປາສັກ ມີໂຄງການລົງທຶນ 226 ໂຄງການ ມູນຄ່າຫລາຍກວ່າ 6,200 ຕື້ກີບ

ທ່ານ ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນແຂວງ ຈໍາປາສັກ ລາຍງານໃນໂອກາດທີ່ທ່ານ ເພັດ ພົມພີພັກ ລັດຖະ ມົນຕີກະຊວງແຜນການ ແລະ ການລົງທຶນ ເຄື່ອນໄຫວເຮັດວຽກຢູ່ແຂວງຈໍາປາສັກ ວັນທີ 6 ກັນຍາ 2024 ຜ່ານມານີ້ ວ່າ: ປີ 2024 ແຂວງຈໍາປາສັກ ມີໂຄງ ການທັງໝົດ 226 ໂຄງການ (ມູນຄ່າລວມສະພາ 6,296 ຕື້ກວ່າກີບ, ມູນຄ່າສັນຍາ 5,877 ກວ່າຕື້ກີບ, ມູນຄ່າປະຕິບັດວຽກສຳເລັດ 4,153 ຕື້ກວ່າກີບ), ໄດ້ຮັບງົບປະມານການລົງທຶນຂອງລັດ ປີ 2024 ຈາກກະຊວງ ແຜນການ ແລະ ການລົງທຶນ ທັງໝົດ 75 ຕື້ກວ່າກີບ ແລະ ໄດ້ຈັດສັນໃສ່ໂຄງການ ຈໍານວນ 226 ໂຄງການ.

ໂຄງການສົມທົບທຶນຕ່າງປະເທດ ມີ 10 ໂຄງການ, ມູນຄ່າ 4,534 ລ້ານກວ່າກີບ; ໂຄງ ການສືບຕໍ່ມີ 100 ໂຄງການ, ມູນຄ່າ 43 ຕື້ກວ່າກີບ ແລະ ບ້ວງຈົດຮັບ-ຈົດຈ່າຍ 2 ໂຄງການ, ມູນຄ່າ 6 ຕື້ກີບ; ໂຄງການຊໍາລະໜີ້ສິນ ມີ 98 ໂຄງການ, ມູນຄ່າ 17.8 ຕື້້ກວ່າກີບ; ໂຄງການສະເໜີໃໝ່ ມີ 16 ໂຄງການ, ມູນຄ່າ 3.6 ຕື້ກວ່າກີບ, ໂຄງການທີ່ສຳເລັດ ແລະ ສິ້ນສຸດ (ຕັດອອກຈາກບັນຊີ) ພາຍຫຼັງໄດ້ຊໍາລະຕາມແຜນປີ 2024 ແລະ ບ້ວງເງິນເກີນແຜນ ປີ 2023 ສາມາດຊໍາລະສໍາເລັດສິ້ນສຸດໂຄງການ ໄດ້ຈໍານວນ 34 ໂຄງການ, ໃນນັ້ນ: ໂຄງການປະເພດກໍ່ ສ້າງພື້ນຖານໂຄງລ່າງ 30 ໂຄງການ ແລະ ໂຄງການສົ່ງເສີມວິຊາການ 4 ໂຄງການ.

ສະເພາະ 6 ເດືອນຕົ້ນປີ 2024 ສາມາດກວດກາ ແລະ ຕິດຕາມ ບັນດາໂຄງ ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ໄດ້ຈໍານວນ 35 ໂຄງ ການ, ຄື: ມີຈໍານວນ 29 ໂຄງການ ທີ່ດໍາເນີນປົກກະຕິ ແລະ ມີປະສິດທິຜົນ ແລະ ປະກອບພັນທະຕໍ່ພາກລັດຢ່າງເປັນປົກກະຕິ, ທຶນຈົດທະບຽນເທົ່າກັບ 183 ລ້ານໂດ ລາ ແລະ ຈຳນວນ 6 ໂຄງການ ທີ່ຕ້ອງໄດ້ປັບປຸງຄືນແຜນດໍາເນີນໂຄງການໃຫ້ມີປະ ສິດທິພາບຂຶ້ນຕື່ມ ແລະ ສາມາດຍົກເລີກໃບທະບຽນສໍາປະທານ ໄດ້ 1 ໂຄງການ, ໂຄງການທີ່ບໍ່ມີປະສິດທິພາບ ແລະ ປະສິດທິຜົນ ບໍ່ປະຕິບັດໄປຕາມກົດໝາຍກຳນົດ, ສາມາດຍົກເລິກໃບອະນຸຍາດລົງທຶນໄດ້ 10 ໂຄງການ ແລະ ນໍາເນື້ອທີ່ດິນເຂົ້າມາໃນການຄຸ້ມຄອງຂອງພາກລັດ ຈຳນວນ 1,804 ເຮັກຕາ, ການລົງທຶນຂອງພາກເອກະ ຊົນພາຍໃນ ແລະ ຕ່າງປະເທດ ໃນ 6 ເດືອນຕົ້ນປີ 2024 ສາມາດອອກອະນຸຍາດລົງ ທຶນກິດຈະການສໍາປະທານ ໄດ້ທັງໝົດ 6 ໂຄງການ, ມູນຄ່າການອະນຸມັດ 81.42 ລ້ານໂດລາ ແລະ ໄດ້ສ້າງບັນຊີຮຽກການລົງທຶນ ຈໍານວນ 9 ໂຄງການ, ລວມເນື້ອທີ່ທັງໝົດ 2,834 ເຮັກຕາ ແລະ ສໍາເລັດການກະກຽມຂໍ້ມູນທີ່ເປັນພື້ນຖານໃນການສຳຫຼວດພົນລະເມືອງ ແລະ ທີ່ຢູ່ອາໄສ ປີ 2025.